ލ. ގަން އަދި ސ. ގަމުގައި މިމަހުގެ 23 ގައި އަސްކަރީ ޚާއްސަ ތަމްރީނެއް ކުރިއަށް ގެންދާތީ ކަނޑުދަތުރުފަތުރު ކުރާ ފަރާތްތަކުން މިކަމަށް ސަމާލުކަމެއް ދީގެން ދަތުރުފަތުރު ކުރުމަށް އިލްތިމާސްކޮށްފި އެވެ.
މޯލްޑިވްސް ޓްރާންސްޕޯޓް އޮތޯރިޓީން ބުނީ މޯލްޑިވްސް ނޭޝަނަލް ޑިފެންސް ފޯސް (އެމް.އެން.ޑީ.އެފް) އިން ކުރިއަށް ގެންދާ އަސްކަރީ ތަމްރީނެއްގައި 2020 ޖުލައި 19 އިން 23 އަށް، ކޮންމެ ދުވަހެއްގެ 06:00 އިން 18:00 އަށް ލ. ގަމުގެ އިރުން 07 ނޯޓިކަލް މޭލު ބޭރުގައި ބޭއްވުމަށް ހަމަޖެހިފައިވާ ކަމަށް އޮތޯރިޓީއަށް އަންގާފައިވާ ކަމަށެވެ.
މީގެއިތުރުން މިއަސްކަރީ ތަމްރީން ސ. ގަމުގައިވެސް 19 ޖުލައިން ފެށިގެން 23 ޖުލައިގެ ނިޔަލަށް ކުރިއަށް ގެންދަން ވަނީ ނިންމާފައެވެ. ސ. ގަމުގެ ދެކުނުން 07 ނޯޓިކަލް މޭލު ބޭރުގައި ކުރިއަށް ގެންދާ މިޚާއްސަ ތަމްރީނުތަކުގައި ބަޑިޖެހުމަށް ވެސް ވަނީ ހަމަޖެހިފައެވެ.
ތަމްރީނުގައި ވައިގެ ސަރަހައްދު ބޭނުންކުރާނެ ގޮތުގެ ތަފްސީލް
- ބޭނުންކުރާ ހަތިޔާރު/ ޕައިކޯޓެކްނިކްސް: މެޝިން ގަން ފަޔަރިންގ
- ވައިގެ ސަރަހައްދު ބޭނުންކުރޭނެ އެންމެ ދުރުމިން: 5000 މީޓަރ
- ވައިގެ ސަރަހައްދު ބޭނުންކުރާނެ އެންމެ އުސްމިން: 100 މީޓަރ
- ވައިގެ ސަރަހައްދު ބޭނުންކުރާނެ އެންމެ ތިރިމިން: ސީ. ލެވެލް
- ވައިގެ ސަރަހައްދު ބޭނުންކުރާނެ ޑައިރެކްޝަން: ލ. ގަމުގެ އިރުން 07 މޭލު ބޭރުގައި އަދި ސ. ގަމުގެ ދެކުނުން 07 މޭލު ބޭރުގައި
ޓްރާންސްޕޯޓް އޮތޯރިޓީން ބުނީ ލ. ގަމުގެ އިރުން ކަނޑު ދަތުރުފަތުރުކުރާ ފަރާތްތަކުން މިކަމަށް ސަމާލުކަން ދީގެން ދަތުރުފަތުރު ކުރުމުގެ ކަންކަން ކުރިއަށް ގެންދިއުމަށް އެދޭ ކަމަށެވެ. އަދި ސ. ގަމުގެ ދެކުނުން ކަނޑު ދަތުރުފަތުރުކުރާ ފަރާތްތަކުން މިކަމަށް ސަމާލުކަމެއް ދިނުމަށް ވަނީ އެދިފައެވެ.