ލ. ގަމުން، ހިންނަވަރު ދާއިރާގެ މެމްބަރު ޖީހާން މަހްމޫދަށް ގޯތި ލިބިވަޑައިގެން ގޮތާ މެދު ބައެއް މީޑިއާތަކުގައި ދެކެވެމުންދަނީ ޙަޤީޤަތާ ޚިލާފު ވާހަކަތަކެއް ކަމަށް ގަމު ކައުންސިލުން ބުނެފިއެވެ.

ގޯތި ދޫކުރުމުގައި ޕޮއިންޓް ދީފައިވާ ގޮތް އޮޅުން ފިލުވާދެމުން ކައުންސިލުން ނެރުނު ބަޔާނެއްގައި ބުނީ، ގޯއްޗަށް އެދި ހުށަހެޅި ފޯމު އިވެލުއޭޓް ކުރުމަށްފަހު ޕޮއިންޓް ދިނުމުގައި ބަލާފައިވާ ކަންތައްތަކުގެ ތެރެއިން ގަމުގައި ދިރިއުޅޭ މީހުންނަށް ދިނުމަށް ކަނޑައެޅިފައިވާ 10 ޕޮއިންޓް ދިނުމުގައި ޢަމަލު ކޮށްފައިވާނީ ކައުންސިލްގެ ގޯތި އިވެލުއޭޓްކުރާ ކޮމެޓީން ކަނޑައަޅާފައިވާ މިންގަނޑަށް ކަމަށެވެ.

ކައުންސިލުން އެހެން ބުނެފައިވާއިރު، މެމްބަރު ޖީހާން މާލޭގައި ދިރިއުޅުއްވާ ފަރާތަކަށްވެފައި، ރަށުގައި ދިރިއުޅޭ މީހުންނަށް ދިނުމަށް ކަނޑައެޅިފައިވާ 10 ޕޮއިންޓް ލިބިވަޑައިގަތުމުން ހިޔާލު ތަފާތުވުންތަކެއް ވަނީ އުފެދިފައެވެ. އަދި އެއީ އުސޫލާ ޚިލާފަށް ކޮށްފައިވާ ކަމެއް ކަމަށް ބައެއް ފަރާތްތަކުން ތުހުމަތު ކޮށްފައި ވެއެވެ. ނަމަވެސް ކައުންސިލުން ބުނެފައިވަނީ ރަށުން ބޭރު މީހެއް ނަމަވެސް ގޯއްޗަށް އެދުނު މީހާ ރަށުގެ ރަށްވެސަކާއި ކައިވެނި ކޮށްގެން އުޅޭ ނަމަ އެ ޕޮއިންޓް ލިބޭނެ ކަމަށެވެ.

އެގޮތުން ރަށުގައި ދިރިއުޅޭ މީހުންނަށް ޕޮއިންޓް ދިނުމުގައި ކައުންސިލްގެ ގޯތި އިވެލުއޭޓް ކުރާ ކޮމެޓީން ކަނޑައަޅާފައިވާ މިންގަނޑުތައްވެސް ބަޔާނުގައި ބަޔާންކޮށްފައި ވެއެވެ.

ޕޮއިންޓް ދިނުމުގައި ބަލާ މިންގަނޑުތައް:

ކައުންސިލުން ބުނީ، މިފަދަ މީހުން ރަށުން ބޭރުގައި ދިރިއުޅެމުން ދިޔަ ނަމަވެސް ގަމުގައި ދިރިއުޅޭ ނަމަ ދިނުމަށް ކަނޑައެޅިފައިވާ 10 ޕޮއިންޓް އެމީހަކަށް ދިނުމަށް ނިންމާފައިވާ ކަމަށެވެ. އެގޮތުން މި އުސޫލަށް ފެތޭގޮތަށް ހުރި ހުރިހައި ފަރާތްތަކަށް ދޭންޖެހޭ ޕޮއިންޓުތައް ދެވިފައިވާ ކަންވެސް ކައުންސިލުން ފާހަގަ ކޮށްފައިވެއެވެ.

އޭގެ އިތުރުން، މެމްބަރު ޖީހާން މަޙުމޫދަށް ޕޮއިންޓް ދީފައިވަނީ ވެސް މި މިންގަނޑުންކަން ފާހަގަކޮށް ކައުންސިލުން ބުނީ، މެމްބަރު ޖީހާންއަށް ޕޮއިންޓް ދީފައިވާ ގޮތާމެދު ދެކެވެމުންދަނީ ޙަޤީޤަތާ ޚިލާފު ވާހަކައެއް ކަމަށެވެ.

މެމްބަރު ޖީހާންއަށް ގޯތި ލިބިވަޑައިގެން ގޮތާމެދު ދެކެވޭ ވާހަކަތަކާއި، އުފެދިފައިވާ ދެބަސްވުންތަކާ ގުޅިގެން އެންމެ ފަހުން ޖީހާން ވަނީ ގޯތި ދޫކޮށްލުމަށްވެސް ނިންމާފައެވެ. އަދި ޕޮއިންޓް އިތުރު ކުރުމަށް އެއްވެސް ނުފޫޒެއް ފޯރުވާފައި ނުވާނެކަން ވެސް މެމްބަރު ޖީހާން ފާހަގަ ކުރައްވާފައިވެއެވެ.