ކ. ހުރާ ބިންހިއްކުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ނިންމާލައިފި އެވެ.

އެމްޓީސީސީ އިން ބުނީ ހުރާ ބިން ހިއްކުމުގެ މަސައްކަތް ނިންމާލާފައިވަނީ 25 މާޗުގައި ކަމަށާއި މަސައްކަތް ނިންމާ ސައިޓް ޑިމޮބަލައިޒް ކޮށްފައިވާ ކަމަށެވެ. ހުރާގެ ހިއްކި ބިމުގައި ބޯހިޔާވަހިކަމުގެ މައްސަލައަށް ހައްލު ހޯދުމުގެ އިތުރުން ވިޔަފާރީގެ ބޭނުމަށް ވެސް ބިން ބޭނުން ކުރެވޭނެ ކަމަށް ވެސް އެމްޓީސީސީން ބުނެއެވެ.

މީގެ އިތުރުން އެމްޓީސީސީން ބުނީ ހިއްކާފައިވާ ސަރަހައްދު ހިމާޔަތް ކުރަން 1،626 މީޓަރުގެ ސަރަހައްދެއްގައި ރިވެޓްމެންޓު ޖަހާ 152 މީޓަރުގެ ސަރަހައްދެއްގައި ވަނީ ތޮށި ވެސް ލާފައިވާ ކަމަށެވެ.

ހުރާއަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދުމަށް ބިން ހިއްކުމަށް އެމްޓީސީސީއާ ހަވާލުކޮށްފައިވަނީ 25 ޖުލައި 2018 ގައެވެ. އެމަޝްރޫއުގެ ދަށުން ހުރާއިން 10 ހެކްޓަރުގެ ބިން ހިއްކާފައިވެއެވެ.

ހުރާގެ ބިން ހިއްކުމުގެ މަޝްރޫއު ކުރިއަށް ގެންގޮސްފައިވަނީ ދެފިޔަވައްސަކަށް ބަހާލައިގެންނެވެ. އެގޮތުން ފުރަތަމަ ފިޔަވަހީގެ މަސައްކަތަށް 33.73 މިލިއަން ރުފިޔާ، އަދި ދެވަނަ ފިޔަވަހީގެ މަސައްކަތްތަކަށް 71.32 މިލިއަން ރުފިޔާ ހަރަދުކޮށްފައިވެއެވެ.