ނ. ހޮޅުދޫ ފެން ހިންދާ ނިޒާމުގެ 70 އިންސައްތަ މަސައްކަތް ނިމިއްޖެއެވެ.
ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) މެނޭޖިން ޑިރެކްޓަރު މޫސާ އަލިމަނިކު (މޫކޭ) ވިދާޅުވީ ކޮންމެ ވިއްސާރަ ވިލާގަނޑަކާއިއެކު ހޮޅުދޫ ރައްޔިތުން ނުކުމެ ރަށުން ފެން ހިއްކުމުގެ މަސައްކަތް ކުރަން ޖެހުމަކީ އާދަކޮށް ކުރަމުން އައި ކަމެއް ކަމަށެވެ.
ރައީސް ސޯލިހުގެ ސަރުކާރުން މި މައްސަލައަށް ދާއިމީ ހައްލެއް ހޯދުމުގެ އަމަލީ މަސައްކަތް ފަށާފައިވާކަން ފާހަގަކުރައްވާ މޫކޭ ވިދާޅުވީ މަސައްކަތް ބާރު ސްޕީޑްގައި ކުރިއަށްދާ ކަމަށެވެ. އަދި މިހާރު 70 އިންސައްތަ މަސައްކަތް ނިމިފައިވާ ކަމަށް މޫސާ އަލިމަނިކު ވިދާޅުވިއެވެ.
ވާރޭ ވެހުމުގެ ސަބަބުން ހޮޅުދޫގެ ފެންބޮޑުވުމުގެ މައްސަލަ ހައްލުކުރުމަށް ޖުމްލަ ހަ މިލިއަން ފަސްލައްކަ ފަސްދޮޅަސް ނުވަ ހާސް ބައްތިރީސް ރުފިޔާ ޚަރަދުވާނެ ކަމަށް ވަނީ ލަފާކޮށްފައެވެ. މި މަޝްރޫއަކީ ސަރުކާރުގެ ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ދަށުން ކުރިއަށް ގެންދާ މަޝްރޫއެކެވެ.
