އަވަށްޓެރި ސްރީލަންކާގައި ތާށިވެފައި ތިބި 200ށް ވުރެ ގިނަ ދިވެހިން ބުދަ ދުވަހު ރާއްޖެ ގެންނާނެ ކަމަށް ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) އިން ބުނެފި އެވެ.

ކޮވިޑް-19 އާ ގުޅޭ އެންމެ ފަހުގެ މަޢުލޫމާތު ޙިއްސާ ކުރުމަށް އަންގާރަ ދުވަހުގެ ރޭ ބެއްވި ނޫސްވެރިންގެ ބައްދަލުވުމުގައި ކޮވިޑް -19 ޓާސްކްފޯސްގެ ތަރުޖަމާނު މަބްރޫކް ޢަޒީޒް ވިދާޅުވީ ކޮވިޑް-19 ގެ ސަބަބުން އެކި ޤައުމުތަކުގައި ތާށިވެފައި ތިބި ދިވެހިން ރާއްޖެ ގެނައުމަށް ފޮރިން މިނިސްޓްރީން ކުރަމުން އަންނަ މަސައްކަތުގެ ތެރެއިން ސްރީލަންކާގައި ތާށިވެފައި 262 ދިވެއްސަކު ބުދަ ދުވަހު މާލެ ގެނައުމަށް ހަމަޖެހިފައިވާ ކަމަށެވެ.

ދިވެހިން ގޮވައިގެން އަންނަ ސްރީލަންކަންގެ އެއަރލައިގެ ފްލައިޓް ރާއްޖެ އައުމަށް ހަމަޖެހިފައި ވަނީ ބުދަ ދުވަހުގެ ހެނދުނު 8:25 ގައެވެ.

މަބްރޫކް ވިދާޅުވީ މި ޕްލައިޓުން ރާއްޖެ ގެންނަ ފަރާތްތައް ކަނޑައަޅާފައި ވަނީ ވަކި އުޞޫލަކުން ކަމަށާއި، އޭގެތެރޭގައި ހިމެނެނީ އާސަންދަ މެދުވެރިކޮށް ބޭސް ކުރުމަށް ސްރީލަންކާއަށް ދަތުރުކޮށްފައިވާ ފަރާތްތަކާއި، ޚާއްޞަ އެހީއަށް ބޭނުންވާ ފަރާތްތަކާއި، ޓުއަރިސްޓް ވިސާގައި ދަތުރުކޮށް އަދި މާލީ އެހީތެރިކަމަށް ބޭނުންޖެހިފައިވާ ފަރާތްތަކާއި، ލޮކްޑައުން އާ ގުޅިގެން ފްލައިޓް ކެންސަލްވި ފަރާތްތަކާއި އަދި އެހެން ސަބަބުތަކަށް ޓަކައި ވެސް ޓުއަރިސްޓުންގެ ގޮތުގައި ދަތުރުކޮށް އާދެވޭނެ ގޮތެއް ނެތިފައި ތިބި ފަރާތްތައް ކަމަށެވެ.

އެފަރާތްތައް މާލެ އައުމުން ކަރަންޓީން ކުރެވޭނެ ކަމަށާއި ކަރަންޓީންވާނެ ގޮތެއް ބެލުމަށްޓަކައި އެޗްޕީއޭއިން ވަނީ ހުރިހާ ފަރާތްތަކަށް ފޯމެއް ފޮވުވާފައިވާ ކަމަށް މަބްރޫކް ވިދާޅުވި އެވެ.

އޭގެ ތެރެއިން 153 މީހެއްގެ ފޯމުގައި ހޯމް ކަރަންޓީން ވެވޭނެ ކަމަށް ބުނެފައިވާ ކަމަށާއި 13 އަތޮޅެއްގައި ކަރަންޓީން ވުމަށް އެދިފައިވާ ކަމަށް އޭނާ ވިދާޅުވި އެވެ.

ކަރަންޓީން ވާ ފަރާތްތައް އަތޮޅުތަކަށް ފޮނުވުމުގެ މަސައްކަތް ކުރަމުންދާނީ މޯލްޑިވްސް ނެޝަނަލް ޑިފެންސް ފޯރސް (އެމްއެންޑީއެފް)ގެ ފަރާތުން ކަމަށް މަބްރޫކް ވިދާޅުވި އެވެ.

މަބްރޫކް ވިދާޅުވީ ވަރަށް ގިނަ ފަރާތްތަކުން މި ފޯމު ފުރާފައި ނުވާކަމަށާއި ފުރާފައިވާ ފޯމުތަކުގެ ތެރެއިންވެސް ބައެއް ފޯމުތަކުގައި އެފަރާތްތަކަށް ހޯމް ކަރަންޓީން ވެވޭކަން ފާހަގަ ކޮށްފައި ނުވާކަމަށެވެ. އަދި ބައެއް ފޯމުގައިވާ ލިޔުން ސާފު ނުވާކަންވެސް މަބްރޫކް ފާހަގަ ކުރެއްވި އެވެ.

ގިނަ ފަރާތްތަކުން ފޯމު ފުރިހަމަކޮށްފައި ނުވުމުގެ ސަބަބުން ދަތުރުގެ އިންތިޒާމު ހަމަޖެއްސުމުގައި ކޮންމެވެސް ވަރެއްގެ ލަސްތަކެއް ހުރެދާނެ ކަމަށް އެމްއެންޑީއެފުން ފާހަގަ ކޮށްފައިވާ ކަމަށް މަބްރޫކް ވިދާޅުވި އެވެ.

ކުރިއަށް ހުރި ފްލައިޓުތަކުގައި އަންނަ ފަރާތްތަކުން ދުރާލާ އެ ފޯމް ފުރުމަށް ފަހު ފޯމު ފޮނުވުމަށް މަބްރޫކް ވަނީ އެދިފަ އެވެ.