މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ އައު ކޮމިޝަނަރ ޖެނެރަލަށް ޑިރެކްޓަރުންގެ ބޯޑުގެ މެމްބަރުންގެ މުސާރަ ދޭން ނުފެންނަކަމަށް ރައްޔިތުންގެ މަޖިލީހުން ފާސްކޮށްފިއެވެ.

ރައްޔިތުންގެ މަޖިލިހުން މިގޮތަށް ފާސްކުރީ، ޓެކްސް ނެގުމާއި ބެހޭ އިދާރީ ޤާނޫނަށް ގެނެވުނު 2 ވަނަ އިސްލާހަށް އަމަލުކުރަން ފެށުމުން އަލަށް އެކުލަވާލެވުނު މީރާގެ ބޯޑުގައި ކޮމިޝަނަރ ޖެނެރަލް އޮފް ޓެކްސޭޝަން ހިމެނި ވަޑައިގަންނަވަނީ އެ ޤާނޫނުގައި ބަޔާންކޮށްފައިވާ ގޮތަށް ވޯޓު ނުދެވޭ މެމްބަރެއްގެ ގޮތުގައި ކަަމަށްވާތީއެވެ.

އަންގާރަ ދުވަހުގެ ޖަލްސާގައި މިގޮތަށް ފާސްކޮށްފައިވަނީ މިކަން ދިރާސާކުރި މާލިއްޔަތު ކޮމިޓީގެ ރިޕޯޓް ފާސްކުރުމަށް ނެގުނު ވޯޓުގައި ބައިވެރިވެވަޑައިގެންނެވި 63 މެމްބަރުންގެ އިއްތިފާގުންނެވެ. މާލިއްޔަތު ކޮމިޓީން މިގޮތަށް ނިންމީ ޓެކްސް ނެގުމާބެހޭ އިދާރީ ޤަނޫނަށް ގެނެވުނު އިސްލާހަށް 2019 ވަނަ އަހަރުގެ ސެޕްޓެމްބަރ މަހުގެ 12 ވަނަ ދުވަހު އަމަލު ކުރަން ފެށުމާ ގުޅިގެން މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ ބޯޑުގެ މެމްބަރުންގެ މުސާރަ ދިނުމުގައި އަމަލުކުރާނެ އުސޫލަކާއި ގުޅޭގޮތުން ލަފައަކަށް އެދި މީރާއިން ހުށަހަޅާފައިވާ މައްސަލަ ދިރާސާކުރުމަށްފަހުއެވެ.

ކޮމިޓީން ނިންމާފައިވަނީ ދައުލަތުގެ މާލިއްޔަތުގެ ކަންކަން ބެލެހެއްޓުމުގެ މަސްއޫލިއްޔަތު ހަވާލުކޮށްފައިވާ ވުޒާރާގައި ޓެކުހާ ބެހޭ ސިޔާސަތުތަކާ ގުޅޭ ކަންކަން ބެލެހެއްޓުމަށް މިނިސްޓަރ ކަނޑައަޅުއްވާ ފަރާތެއްގެ ގޮތުން ބޯޑުގެ ޗެއަރޕާސަންގެ ގޮތުގައި އައްޔަނުކުރުމާއެކު މިހާރުގެ ޗެއަރޕާސަނަށް ޑިރެކްޓަރުންގެ ބޯޑުގެ ޗެއަރޕާސަން މުސާރަ ދިނުމަށް ފެންނަ ކަމަށެވެ.

އޭގެ އިތުރުން، ދައުލަތުގެ މާލިއްޔަތުގެ ކަންކަން ބެލެހެއްޓުމުގެ މަސްއޫލިއްޔަތު ހަވާލުކޮށްފައިވާ ވުޒާރާގައި ޓެކުހާ ބެހޭ ސިޔާސަތުތަކާއި ގުޅޭ ކަންކަން ބެލެހެއްޓުމަށް ފިނޭންސް މިނިސްޓަރ ކަނޑައަޅުއްވާ ފަރާތެއްގެ ގޮތުން ބޯޑުގެ ޗެއަރޕާސަންގެ ގޮތުގައި އައްޔަނުކުރުމާއެކު އެތާރީޚުން ފެށިގެން ކުރީގެ ކޮމިޝަނަރ ޖެނެރަލަށް ޑިރެކްޓަރުންގެ ބޯޑުގެ މެމްބަރުންގެ މުސާރަ ދިނުމަށް ނުފެންނަ ކަމަށްވެސް ކޮމިޓީން ވަނީ ނިންމާފައެވެ.

ކޮމިޓީ ރިޕޯޓްގައި ބުނެފައިވަނީ 2015 ވަނަ އަހަރު މީރާގެ ޑިރެކްޓަރުންގެ ބޯޑުގައި ހިމެނޭ 5 މެންބަރެއްގެ މަޤާމުގެ މުއްދަތު 2 އޮގަސްޓު 2015 ގައި ހަމަވުމާ ގުޅިގެން، 10 އޮގަސްޓު 2015 ވަނަ ދުވަހު ޢައްޔަން ކުރައްވާފައިވާ އައު ބޯޑުގެ މެންބަރުންނާއެކު ބޭއްވި ޑިރެކްޓަރުންގެ ބޯޑުގެ ބައްދަލުވުމުގައި، ބޯޑުގެ ޗެއަރޕަރސަން ކަމަށް ކޮމިޝަނަރ ޖެނެރަލް އޮފް ޓެކްސޭޝަން ޔަޒީދު މުޙައްމަދު އަދި ޑެޕިއުޓީ ޗެއަރޕަރސަން ކަމަށް ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން ހަސަން ޒަރީރު ބޯޑުގެ މެންބަރުންގެ އަޢްލަބިއްޔަތުން ޢައްޔަންކުރެއްވުމާއެކު، އެބޯޑުގެ ޗެއަރޕަރސަން އަދި ވައިސް ޗެއަރޕަރސަންއަށް ދެމުން ގެންދާ މުސާރަ އެފަރާތްތަކަށް ދިނުމާ މެދު މާލިއްޔަތު ކޮމިޓީގެ ލަފައަކަށް ފޮނުއްވާފައިވާ ކަމަށެވެ.

މަޤާމުގެ ހައިޞިއްޔަތުން ޑިރެކްޓަރުންގެ ބޯޑުގައި ހިމެނިވަޑައިގަންނަވާ މެންބަރުންނަށް އެބޭފުޅުންނަށް ކަނޑައެޅިފައިވާ މުސާރައާއި ޢިނާޔަތްތައް ފިޔަވައި އެހެން އެލަވަންސެއް ލިބިދިނުމަށް ނުފެންނަކަމަށް 18 ވަނަ މަޖިލީހުގެ މާލިއްޔަތު ކޮމިޓީގެ ބައެއް މެންބަރުން ފާހަގަކޮށްފައިވާ ކަމަށް ރިޕޯޓުގައި ބަޔާންކޮށްފައިވެއެވެ. އަދި މަޤާމުގެ ހައިސިއްޔަތުން އެ ބޯޑުގައި ހިމެނިވަޑައިގަންނަވާ ބޭފުޅުންނަށް، މުސާރަ އާއި ޢިނާޔަތްތަކުގެ އިތުރުން އެލަވަންސް ލިބިވަޑައިގަންނަވާ ކަމަށްވެސް 18 ވަނަ މަޖިލީހުގެ މާލިއްޔަތު ކޮމިޓީގެ ބައެއް މެންބަރުން ފާހަގަކުރެއްވިކަން ޔައުމިއްޔާއިން އެގެން އޮތްކަމަށް ކޮމިޓީ ރިޕޯޓުގައި ފާހަގަކޮށްފައިވެއެވެ.

2015 ވަނަ އަހަރު މީރާގެ ބޯޑު އެކުލަވާލިއިރު، ކޮމިޝަނަރ ޖެނެރަލް އޮފް ޓެކްސޭޝަން އެ ބޯޑުގެ ޗެއަރޕަރސަން ކަމަށް އަދި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން އެ ބޯޑުގެ ވައިސް ޗެއަރޕަރސަން ކަމަށް ވަނީ އައްޔަނުކޮށްފައެވެ. އަދި ޑިރެކްޓަރުންގެ ބޯޑަށް ކަނޑައަލާފައިވާ މުސާރައާއި އިނާޔަތްތައް 2015 ވަނަ އަހަރު ޢައްޔަންކުރެވުނު ބޯޑުގެ މެމްބަރުންނަށް ދިނުމަށް ވަނީ ނިންމާފައެވެ.

މި ނިންމުމާއި ގުޅިގެން، ކޮމިޝަނަރ ޖެނެރަލް އޮފް ޓެކްސޭޝަން ޑިރެކްޓަރުންގެ ބޯޑުގެ ޗެއަރޕަރސަންގެ މުސާރަ އަދި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން ވައިސް ޗެއަރޕަރސަންގެ މުސާރަ ނެންގެވުމަށް ހަމަޖެހި، ބޯޑުގައި ހިމެނިވަޑައިގަންނަވާ ނޮން އެގްޒެކެޓިވް 5 މެންބަރުންނަށް، ބޯޑުގެ މެންބަރުންގެ މުސާރަ ހަމަޖެހި، އޭރުގެ މީރާ ބޯޑުގެ 7 މެންބަރުންނަށް މުސާރަ ހަމަޖެހިގެން ގޮސްފައިވާކަމަށް ކޮމިޓީ ރިޕޯޓްގައި ވަނީ ފާހަގަކޮށްފައެވެ.

މީރާގެ ޑިރެކްޓަރުންގެ ބޯޑުގެ ޗެއަރޕާސަންއަށް މަހަކު 17،000ރ.، ޑިރެކްޓަރުންގެ ބޯޑުގެ ޑެޕިއުޓީ ޗެއަރޕާސަންއަށް މަހަކު 16،000ރ. ލިބިވަޑައިގަންނަވައެވެ. އަދި ޑިރެކްޓަރުންގެ ބޯޑުގެ މެމްބަރުންނަށް 15،000ރ. ލިބިވަޑައިގަންނަވައެވެ.