އެއްވެސް މީހަކު ފުލުހުންނަށް ދެރައެއް ދިނުމަކަށް ނޭދޭކަމަށާއި ފުލުހުންނާއި ގުޅޭގޮތުން މަޖިލީހުގެ ތަޅުމުގައި ފާހަގަކުރަމުންދާ ކަންތައްތަކަކީ މުޖުތަމަޢުގެ ތެރޭގައި ހިނގަމުންދާ ކަންކަމުގެ ސަބަބުން ދައްކަވަމުންދާ ވާހަކަތަކެއް ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
އަންގާރަ ދުވަހުގެ ޖަލްސާގައި ވަނީ ސަރުކާރުގެ ފަރާތުން ހެންވޭރު ހުޅަނގު ދާއިރާގެ މެމްބަރ ހަސަން ލަތީފު ހުށަހަޅުއްވާފައިވާ ފުލުހުންގެ ޤާނޫނަށް އިސްލާހު ގެނައުމުގެ ބިލަށް ބަހުސްކުރައްވާފަ އެވެ. މިބިލްގެ ބަހުސްގައި ގިނަ މެމްބަރުން ވަނީ ފުލުހުންގެ ފުށުން ފެންނަމުންދާ ނުރަނގަޅު ކަންކަން އަދި އެމުއައްސަސާގައި ހުރި ގިނަ މައްސަލަތަކެއް ފާހަގަކުރައްވާ ވާހަކަ ދައްކަވާފަ އެވެ. ބިލަށް ބަހުސްކުުރުމުގެ ފުރުސަތު ހުޅުވާލައްވަމުން ދެއްކެވި ވާހަކަފުޅުގައި ރައީސް ނަޝީދު ވިދާޅުވީ ބިލާގުޅޭ ގޮތުން މެމްބަރުން ބަހުސްކުރައްވާއިރު ފުލުހުންގެ މުއައްސަސާ އިންތިޒާމުވެފައި އޮންނަންވީ ގޮތް ވިސްނެވުން މުހިންމު ކަމަށެވެ. އެގޮތުން ލާމަރުކަޒު ވެފައި އޮންނަންވީ ގޮތާއި ފުލުހުންގެ ވެރިން ކަނޑައެޅެންވީގޮތް އަދި ޕްރޮމޯޝަން ލިބެންވީ ގޮތާ މެދު މެމްބަރުން ވިސްނުން ގެންގުޅުއްވަންޖެހޭ ކަމަށެވެ.
މިހާރު ފުލުހުންގެ ބޯޑުތަކާއި ނުވަތަ މުއައްސަސާގެ އެތެރޭގެ ކަންކަން އިންތިޒާމު ކޮށްފައި ހުރި ގޮތް ދެނެގަނެ އެއިންތިޒާމުތަކަށް ބަދަލު ގެންނަންޖެހޭ ކަމަށް ރައީސް ނަޝީދު ވިދާޅުވި އެވެ. އަދި މިހާރުވެސް މަޖިލީހުގެ ކޮމިޓީތަކުން ފުލުހުންގެ ބައެއް ތަހުޤީޤުތައް ބަލަމުންދާކަމަށް ރައީސް ނަޝީދު ވިދާޅުވި އެވެ. އޭގެތެރޭގައި އެމްއެމްޕީއާރުސީގެ ބޮޑު ޚިޔާނާތުގެ މައްސަލަ ހިމެނޭއިރު އެކަމުގައި ޝާމިލްވާ ފުލުހުން ސަސްޕެންޑް ކުރެވެން ޖެހޭކަމަށް ރައީސް ނަޝީދު ވިދާޅުވި އެވެ.
މީގައި ދިމާވާ އެއްކަމަކަށް ވަނީ ފުލުސް އޮފީހުގައި އެބަތިބި މިވައްކަމުގައި ތިބި ކުދިން. އެއޮފީހުގައި އެކުދިން ތިބެ ދެން ވަރަށް އުނދަގޫވާނެ އެކުދިން ތިބެގެން ތަހުގީގެއް ކުރިޔަށް ގެންދަން. އެހެންވީމާ ވަރަށް ބޭނުންތެރި ފުލުސް އޮފީހުގައި ވައްކަމަށް ތުހުމަތު ކުރެވިފައި ތިބި ކުދިން މިހާރުން މިހާރަށްވެސް ސަސްޕެންޑް ކުރުން. ކޮށްފައިނޫނީ ވަރަށް އުނދަގޫވާނެ ކުރިޔަށް ގެންދަން.ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރައީސް ނަޝީދު ވިދާޅުވީ ފުލުހުންނާއި އެކިކަހަލަ ކުށްތަކަށް އަރައިގަންނަ މީހުންނާ ދެމެދު އޮންނަ ގުޅުންތައް ބެލުމަކީ މުހިންމު ކަމެއް ކަމަށެވެ.
ޑްރަގްގެ މައްސަލަތައް ފުލުހުންގެ ތެރޭގައި ހިނގަމުން އަންނަ އަދި ބޮޑެތިކޮށް ޑްރަގްގެ ވިޔަފާރިކުރަމުން އަންނަ މީސްމީހުންނާއި އޮންނަގުޅުންތައް ބެލުން މުހިންމު. އަދި ސްޓާރ ފޮސް އާއި ގޭންގްތަކާއި އޮންނަ ގުޅުން ދެނެގަތުން އެއީ މުހިންމު ކަމެއް. އަދި ހަމައެއާއެކު އަޑީ ދައުލަތެއް އޮތް ކަމަށް އެތައް ބަޔަކަށް އެބަ ޝައްކުކުރެވޭ. އެކިއެކި ތަހުގީގު އެބަ އަނބުރާލެވޭ އެބަ ވާއެއް ނުވާއެއް ނޭންގި. މެމްބަރުންނަށް އެނގޭނެ ރިލްވާންގެ މަރާލި މައްސަލާގައި ފާރަލީ ފުލުހެއް. އަދި އަފްރާޝީމްގެ ގާތިލް އަދި ފަހުން އައި ބޮޑެތި މައްސަލަތަކުގައިވެސް ފުލުހުންގެ ކަންކަން އެބަހިމެނޭ. މިކަމާއި އިލްމީ ނަޒަރަކުން ބަލަންވާނެ. މެމްބަރުންނަށްވުރެ ރަނގަޅަށް ފުލުހުންގެ ކަންކަން ދެފަރާތުން އެނގިފައިވާ ބަޔަކު ނުތިބޭނެ.ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރައީސް ނަޝީދު ވިދާޅުވީ ފުލުހުންގެ ފަރާތުން ނުހައްގުން އަނިޔާ ލިބިފައިވަނީ ހަމައެކަނި ރައްޔިތުންގެ މަޖިލީހުގެ މެމްބަރުންނަށް ނޫންކަމަށެވެ. ރާއްޖޭގެ އެކި ކަންކޮޅުތަކުގައި އެކި ގޮތްގޮތަށް މިކަން ކުރިޔަށްދާ ކަމަށާއި އެކަންކަން ރަނގަޅަށް ތަހުގީގު ނުކުރެވުމަކީ ގެއްލުމެއްގެ ގޮތުގައި އެބަ ފާހަގަކުރެވޭ ކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ މިހާރު ހުށަހެޅިފައިވާ އިސްލާހުތަކާއެކު ފުލުހުންގެ ތެރޭގައިވާ ގިނަ މައްސަލަތަކަކަށް ހައްލު ލިބިގެންދާ ކަަމަށެވެ.
