ފަތުރުވެރިކަން އަލުން ހުޅުވާލުމަށް ތާއީދުކުރައްވާ ކަމަށް ފަތުރުވެރިކަމުގެ ދާއިރާގައި މަސައްކަތް ކުރައްވާ ގިނަ ސްޓެކްހޯލްޑަރުން ވިދާޅުވެއްޖެއެވެ.

އާދިއްތަ ދުވަހުގެރޭ ރާއްޖެޓީވީން ގެނެސްދިން "ބޮޑު ސުވާލު" ޕްރޮގްރާމްގައި ބައިވެރިވެ ވަޑައިގެން އައު އާންމު ޙާލަތުގައި ފަތުރުވެރިކަމުގެ ސިނާއަތް އަލުން ހިނގައިގަނެދާނެތޯ ކުރި ސުވާލަށް ޖަވާބު ދެއްވަމުން މަންތާ އެއާގެ ސީއީއޯ މުޙައްމަދު ޙަލީލް ވިދާޅުވީ، އައު އާންމު ޙާލަތަކަށް ދާއިރު، ކޮވިޑް-19 އާ އެކު އުޅެން ދަސްކުރަން ޖެހޭ ކަމަށެވެ. އެގޮތުން ފްލައިޓް ތެރޭގައިވެސް މާސްކް އެޅުމާއި، ސެނިޓައިޒަރ ބޭނުން ކުރެވޭނެ ގޮތަށް ހުރުން މުހިއްމުކަން ފާހަގަ ކުރައްވައި ޙަލީލް ވިދާޅުވީ، އެއާލައިންތަކުންވެސް އެކަންކަން ގާތުން ބަލައި މޮނިޓަރ ކުރަން ޖެހޭ ކަމަށެވެ.

އެކަމާ ގުޅޭގޮތުން ނޭޝަނަލް ބޯޓިންގ އެސޯސިއޭޝަން އޮފް މޯލްޑިވްސް ގެ ރައީސް އަހުމަދު އަފްރާހު ވިދާޅުވީ، ޓޫރިޒަމް މިނިސްޓްރީން ފަތުރުވެރިކަމުގެ ސިނާއަތުގެ މަސްއޫލުވެރިންނާ މަޝްވަރާކޮށް، ފަތުރުވެރިކަމާ ގުޅޭ ޚާއްސަ ގައިޑްލައިންތަކެއް ހަދަމުންދާ ކަމަށެވެ. އަދި މިނިސްޓްރީގެ ގައިޑްލައިންއާ އެއްގޮތްވާ ގޮތުގެ މަތިން އައު އާންމު ޙާލަތުގައި ބޯޓުތައް އޮޕަރޭޓް ކުރުމާ ގުޅޭ އެސްއޯޕީއެއް ޤާއިމު ކުރުމުގެ މަސައްކަތް ކުރަމުންދާކަންވެސް އަފްރާހް ފާހަގަ ކުރެއްވިއެވެ.

މި ޕްރޮގްރާމްގައި ވާހަކަ ދައްކަވަމުން މަޓާޓޯގެ ރައީސް އަބްދުﷲ ސުއޫދު ވިދާޅުވީ، އައު އާންމު ޙާލަތުގައި ރާއްޖެ ހުޅުވާލުމަށް ވަރަށް ބޮޑަށް ތާއީދު ކުރައްވާ ކަމަށާއި، އެކަމަށްޓަކައި އޭޖެންސީތަކުންވެސް ދުރާލާ ތައްޔާރުވާން ޖެހޭ ކަމަށެވެ. ސުއޫދު ވިދާޅުވީ، ވައިގެ ބަނދަރުތައް އެކަމަށް ތައްޔާރަށް ތިބިތޯ ބެލުމަކީވެސް ވަރަށް މުހިއްމު ކަމެކެވެ.

އޭގެ އިތުރުން، އިކުއިޓޯރިއަލް ޓްރެވަލް އެންޑް ޓޫރިޒަމް އެސޯސިއޭޝަންގެ ރައީސް މުޙައްމަދު ވަޙީދު ވިދާޅުވީ، ދެކުނުގައި ފަތުރުވެރިކަން އިތުރަށް ތަރައްޤީ ކުރުމުގެ ވާހަކަތައް މިހާރުވެސް ދެކެވެމުންދާ ކަމަށާއި، ގަން އެއާޕޯޓް ބޭނުންކޮށްގެން ސަރަޙައްދުގައި ފަތުރުވެރިކަން ހިންގުމަކީ އައްޑޫގެ ކުރިއެރުމަށްވެސް ލިބޭނެ ފުރުސަތެއް ކަމަށެވެ. ވަޙީދު ވިދާޅުވީ، މިއީ އައްޑޫ، ފުވައްމުލަކު، ހުވަދޫ އަދި ލ އަތޮޅުގައިވެސް ފަތުރުވެރިކަން އިތުރަށް ތަރައްޤީ ކުރުމަށް ލިބިގެންދާ ފުރުސަތެއް ކަމަށެވެ.

އޭގެ އިތުރުން، ޓޫރިޒަމް މިނިސްޓްރީގެ އެސްއޯޕީތަކާ އެއްގޮތްވާ ގޮތުގެ މަތިން އަމަލުކޮށްފިނަމަ ފަތުރުވެރިކަން އަލުން ފެށުމަކީ ކުރެވިދާނެ ކަމެއްކަން ވަޙީދު ފާހަގަ ކުރެއްވިއެވެ.

ޕްރޮގްރާމްގައި ދެއްކެވި ވާހަކައިގައި ޑައިވަރސް އެސޯސިއޭޝަން އޮފް މޯލްޑިވްސްގެ ރައީސް އާދަމް އަޝްރަފް ވިދާޅުވީ، ކޮވިޑް-19 އާ ގުޅިގެން ޑައިވިންގެ މަސައްކަތްތަކަށްވެސް ބޮޑެތި ބަދަލުތަކެއް އައިސްފައިވާ ކަމަށެވެ.

އަޝްރަފް ވިދާޅުވީ، މިވަގުތު އޮތް އެންމެ ބޮޑު އެއް ގޮންޖެހުމަކީ ޑައިވިންގެ މައްސަލައެއް ދިމާވެއްޖެ ނަމަ ފަރުވާ ދިނުމަށް ދާން ޖެހެނީ ރިސޯޓުތަކުގައި ހެދިފައިވާ ޗެމްބަރތަކަކަށް ކަމަށާއި، މިވަގުތު ރިސޯޓުތައް ބަންދުކޮށްފައި އޮތުމާއެކު ޑައިވަރުންނަށް އެ ގޮންޖެހުންވެސް އޮތް ކަމަށެވެ.

އޭގެ އިތުރުން، މޯލްޑިވްސް އެސޯސިއޭޝަން އޮފް ޔޮޓް އޭޖެންޓްސް (މާޔާ) ގެ ރައީސް މުޙައްމަދު ނަޝީދު ވިދާޅުވީ، މިހާރުވެސް މާޔާގެ ބައެއް އޮޕަރޭޝަންސް ކުރިއަށްދާ ކަމަށާއި، މިވަގުތު ފަތުރުވެރިކަން ހުޅުވާލިއަސް އެ ދާއިރާއިން ކުރަންޖެހޭ އޮޕަރޭޝަންތައް ހުރީ ތައްޔާރަށް ކަމަށެވެ. އެގޮތުން އަންނަ ހަފްތާގައި ހުޅުވާލިއަސް މާޔާގެ މަސައްކަތްތައް ކުރިއަށްދާނެކަން ނަޝީދު ފާހަގަ ކުރެއްވިއެވެ.

ޕްރޮގްރާމްގައި ބައިވެރިވެވަޑައިގެން ދެއްކެވި ވާހަކައިގައި ރިސޯޓު ލައިފްގެ މެނޭޖިންގ ޑިރެކްޓަރ ޝާޒް ވަލީދް ވިދާޅުވީ، ކޮވިޑް-19އާ އެކު އުޅެން ދަސްކުރަން ޖެހޭ ކަމަށާއި، އެގޮތުން ރާއްޖެ އަލުން ހުޅުވާލާއިރު ޑޮމެސްޓިކް ޓޫރިޒަމުން ފަށައިގަތުން ރަނގަޅު ކަމަށެވެ. އަދި އެއް ރަށުން އަނެއް ރަށަށް މީހުން ދަތުރު ކުރެވޭނެ އުސޫލުތަކެއް އެކަމުގައި ޤާއިމުކޮށް، ސީޕްލޭންތައްވެސް ވަކި ޓަރމިނަލެއްގެ ތެރެއިން ސްކްރީން ކުރެވޭނެ ގޮތް ހެދިދާނެކަން ޝާޒް ފާހަގަ ކުރެއްވިއެވެ.

އޭގެ އިތުރުން، މޯލްޑިވްސް ސަރފިންގ އެސޯސިއޭޝަންގެ ބޯޑު މެމްބަރު ނަފްޝާލް ނާސިރު ވިދާޅުވީ، އަދިވެސް ދުނިޔޭގެ ގިނަ ބަޔަކު ޕޮޒިޓިވްވަމުންދާ ކަމަށާއި، ނަމަވެސް އައު އާންމު ޙާލަތެއްގައި ފަތުރުވެރިކަން އަލުން ފަށަން ޖެހޭކަން ޤަބޫލު ކުރައްވާ ކަމަށެވެ.