ރާއްޖެއިން ކޮވިޑް-19 އަށް ޕޮޒިޓިވްވާ އަދަދު މަދުކަމަށް ދެއްކުމުގެގޮތުން ޓެސްޓުކުރެވޭ އަދަދު މަދު ކޮށްފައިނުވާނެ ނެޝަނަލް އިމަރޖެންސީ އޮޕަރޭޝަން ސެންޓަރު (އެންއީއޯސީ) އިން ބުނެފި އެވެ.
ކޮވިޑް-19 އާ ގުޅޭ އެންމެ ފަހުގެ މައުލޫމާތު ހާމަކުރަން ހޮނިހިރު ދުވަހުގެރޭ އެންއީއޯސީގައި ކުރިޔަށް ދިޔަ ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު އަދި ރައީސް އޮފީހުގެ އަންޑަރ ސެކެރެޓަރީ މުހައްމަދު މަބްރޫކް އަޒީޒް ވިދާޅުވީ، ޕޮޒިޓިވްވާ ކޭސްތަކުގެ އަދަދުތައް ތިރިކުރުމުގެގޮތުން ސާމްޕަލް ނަގާ އަދަދާއި ޓެސްޓު ކުރެވޭ އަދަދު މަދު ކަމަށް ބުނެ ބައެއް ރިޕޯޓްތައް ދައުރުވަމުންދާ ކަމަށެވެ.
އެކަމަކު ޕޮޒިޓިވްވި މީހުންގެ އަދަދު މަދުވުމަކީ ބަލި ރާއްޖެއިން ނެތިގެން ދިޔައީ ނޫންކަން ފާހަގަކުރައްވަމުން މަބްރޫކް ވިދާޅުވީ، އެހެން ގައުމުތަކުގެ ތަޖުރިބާ އަށް ބަލާފައި ފޭސް އެކެއްގައި ހުޅުވާލާއިރު ގިނަ ކޭސްތަކެއް ފެނިގެން ދިޔުން އެކަށީގެންވާ ކަމަށެވެ. މަބްރޫކް ވަނީ މޭ މަހުގެ 30 ފެށިގެން ޖޫން މަހުގެ ހަވަނަ ދުވަހާ ހަމަޔަށް ނަގާފައިވާ ސާމްޕަލްތަކުގެ ތަފާސް ހިސާބުތައް ހާމަކުރައްވާފަ އެވެ.
- 30 މޭ 653 ސާމްޕަލް - 81 ޕޮޒިޓިވް ކޭސް
- 31 557 ސާމްޕަލް - 101 ޕޮޒިޓިވް ކޭސް
- 1 ޖޫން 835 ސާމްޕަލް - 56 ޕޮޒިޓިވްކޭސް
- 2 ޖޫން 704 ސާމްޕަލް - 12 ޕޮޒިޓިވް ކޭސް
- 3 ޖޫން 618 ސާމްޕަލް - 9 ޕޮޒިޓިވް ކޭސް
- 4 ޖޫން 685 ސާމްޕަލް - 22 ޕޮޒިޓިވް ކޭސް
- 5 ޖޫން 957 ސާމްޕަލް - 11 ޕޮޒިޓިވް ކޭސް
- 6 ޖޫން 723 18 ސާމްޕަލް - 18 ކޭސް
އޭނާ ވިދާޅުވީ، އައިޖީއެމްޗްގެ ލެބޯރަޓަރީގައި ކޮވިޑް-19 އަށް ޓެސްޓުކުރާ އެކްސްޓްރެކްޝަން މެޝިންގައި މައްސަލައެއް ދިމާވި ކަމަށެވެ. ނަމަވެސް ޓެސްޓު ކުރެވޭ އަދަދު މަދެއް ނޫން ކަމަށް މަބްރޫކް ވިދާޅުވި އެވެ. އެ މެޝިން ރަނގަޅު ކުރުމުގެ މަސައްކަތް ކުރެވެމުންދާ ކަމަށް އެންއީއޯސީން ބުންޏެވެ.
