ނޭޝަނަލް އިންޓެގްރިޓީ ކޮމިޝަން (އެންއައިސީ)ން މިހާތަނަށް އެއްވެސް މައްސަލައެއް ޕީޖީ އޮފީހަށް ފޮނުވާފައި ނުވަނީ އެކަށީގެންވާ ވަރަށް ހެކި ނުލިބޭތީ ކަމަށް އެންއައިސީގެ ރައީސް އަހުމަދު ސުލައިމާނު ވިދާޅުވެއްޖެއެވެ.
ހޮނިހިރު ދުވަހުގެރޭ ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަދައްކަވަމުން ސުލައިމާނު ވިދާޅުވީ، ފުލުހުންނާ ގުޅިގެން ހުށައެޅޭ ޖިނާއީ މައްސަލަތައް ތަހުޤީޤުކުރުމަށް ބަލާއިރު، ޤާނޫނުން ބޮޑަށް ބުރަވެވެނީ ޖިނާއީ މައްސަލައެއްނަމަ އެކަން ތަހުޤީޤު ކުރުމަށް ފުލުހުންނަށް ހުށައެޅުމަށް ކަމަށެވެ.
އެންއައިސީ އުފެދިގެން މިހާތަނަށް އައިއިރުވެސް އެއްވެސް މައްސަލައެއްގައި ދައުވާ ކުރަން ޕީޖީ އޮފީހަށް ހުށައަޅާފައި ނުވާ ސަބަބާ ގުޅޭގޮތުން ވާހަކަ ދައްކަވަމުން ސުލައިމާނު ވިދާޅުވީ، ޖިނާއީ މައްސަލަތައް ސާބިތުކުރާ މިންގަނޑު ވަރަށް ތަފާތު ކަމަށެވެ. އެގޮތުން ޖިނާއީ މައްސަލަތައް ޝައްކެއް ނެތް މިންވަރަށް ސާބިތުވާންޖެހޭކަން ފާހަގަކުރައްވައި އޭނާ ވިދާޅުވީ، އެ މިންވަރަށް ތަހުޤީޤަށް ސާބިތު ނުވާހާ ހިނދަކު ދައުވާ ކުރުމަށް ނުފޮނުވާ ކަމަށެވެ.
އަޅުގަނޑަށް ޤަބޫލު ކުރެވޭ ގޮތުގައި އެންއައިސީ އުފެދިގެން މިހާތަނަށް އައިއިރު އެންއައިސީން މައްސަލަތައް ބަލައި ތަހުޤީޤު ކުރުމުގައި ޖިނާއީ މައްސަލައާއި، މަދަނީ މައްސަލަ ސާބިތު ކުރުމުގައި ވަރަށް ތަފާތުވާނެ، ހަޤީޤަތުގައި މަދަނީ މައްސަލައެއްގައި ސާބިތުކުރާ ވަރަށްވުރެ، ޖިނާއީ މައްސަލައިގައި އޮންނާނީ ޝައްކެއް ނެތް މިންވަރަށް ސާބިތު ކުރަން، އެހެން ނޫން ކަމަށް ވާނަމަ ހުށައެޅިއަސް އެ ދައުވާއެއް ކުރުމަށް ޕީޖީ ފަހަރެއްގައި އިންކާރު ކޮށްފާނެ، އެހެންވީމާ ހަޤީޤަތުގައި އެ މިންވަރަށް ސާބިތު ނުވާހާ ހިނދަކު އަޅުގަނޑުމެންނަށް ދައުވާ ކުރުމަށްޓަކައި ޖިނާއީ މައްސަލައެއް ގޮތަށް ހުށައެއްނޭޅޭނެ.އެންއައިސީގެ ރައީސް އަހުމަދު ސުލައިމާނު
ސުލައިމާނު ވިދާޅުވީ، މައްސަލަތައް ބެލުމަށް އެންއައިސީއާ ހަމައަށް އައުމުން އިންވެސްޓިގޭޓަރުންނާ ޙަވާލު ކުރެވި އެ މަސައްކަތް ކުރިއަށްދިޔަ ނަމަވެސް، ޕީޖީ އޮފީހަށް މައްސަލަ ފޮނުވާނީ އެކަށީގެންވާ ހެކި ހުރުމުން ކަމަށެވެ.
އޭގެ އިތުރުން، މިނިވަން މުއައްސަސާތަކުގެ ކޮމިޓީއަށް ބޭނުންވާ މައުލޫމާތުތައް ފޯރުކޮށް ނުދެވުނު ސަބަބާއި ގުޅޭގޮތުން ސުލައިމާނު ވިދާޅުވީ، މަޖިލީހުގެ އެދިވަޑައިގަތުމަށް ފުރަގަސް ދިނުމުގެ ވިސްނުމެއް ނެތް ކަމަށެވެ. އެގޮތުން މަޖިލީހުގެ ސިޓީތަކަށް ޖަވާބު ދެއްވާފައިވާނެކަން ފާހަގަ ކުރައްވައި ސުލައިމާން ވިދާޅުވީ، މި މައްސަލައިގައި ދިމާވެގެން އުޅޭ ކަމަކީ "ކޮމިއުނިކޭޝަން އެރަރ" އެއް ކަމަށެވެ.
އެންއައިސީގެ މަސައްކަތަށް ގިނަ ގޮންޖެހުންތަކެއް ހުރިކަން ފާހަގަކުރައްވައި ސުލައިމާނު އިތުރަށް ވިދާޅުވީ، މައްސަލަ ހުށައަޅާ ފަރާތްތަކާ ފަހުން ކޮންޓެކްޓް ކުރަން އުނދަގޫވުމާއި، ދަތުރުތައް ކުރުމަށްދާ ޚަރަދުގެ އިތުރުން، އެންއައިސީގެ ދައުރު އަދާ ކުރުމުގައި ދިމާވާ މުވައްޒަފުންގެ ދަތިކަންވެސް ހިމެނޭ ކަމަށެވެ. އަދި ޖިނާއީ މައްސަލައެއް ކަމަށް ބެލެވޭ މައްސަލައެއް ނަމަ އަޑުއެހުންތައް ބޭއްވުމުގެ ފުރުސަތު ޤާނޫނުން ލިއްބައިދިން ނަމަވެސް، އޮފީހުގެ ޖާގައިގެ ދަތިކަމާއި، ވަސީލަތްތަކުގެ ދަތިކަމާއެކު އެކަން ކުރުމަށް ގޮންޖެހުންތަކެއް ހުރިކަން އޭނާ ފާހަގަ ކުރެއްވިއެވެ.
ސުލައިމާން ވިދާޅުވީ، އެކަންކަން ޙައްލު ކުރުމަށް ބަޖެޓުގައިވެސް އެތައް ފަހަރަކު ޖެއްސެވި ކަމަށާއި، ނަމަވެސް މިހާތަނަށްވެސް އެ މަސައްކަތަށް ބަޖެޓް ލިބިފައި ނުވާ ކަމަށެވެ.
