ރާއްޖޭގައި ފުޅާ ދާއިރާއެއްގައި ކޮންސްޓްރަކްޝަންގެ ވިޔަފާރި ކުރަމުން އަންނަ އަައިމާ ކޮންސްޓްރަކްޝަނުން ހަދަމުން ދިޔަ ދެ ރިސޯޓް ސައިޓެއްގައި ހަމަނުޖެހުން ހިންގި 431 ބިދޭސީއަކު ފުރުވާލައިފި އެވެ.

އެ ކުންފުނިން ހަދަމުން ދިޔަ ދެ ރިސޯޓުގައި ތިބި ބިދޭސީން ހަމަނުޖެހުން ހިންގުމުން އައިމާއިން ވަނީ އެ މީހުން ވަގުތީ ބޯހިޔާވަހިތަކަކަށް ބަދަލުކޮށްފަ އެވެ. އައިމާގެ އޮފިޝަލަކު ރާއްޖެ.އެމްވީ އަށް ވިދާޅުވީ، މި ދުވަސްތަކުގެ ތެރޭގައި އެ އެންމެންނަށް މުސާރަ ދީފައިވާނެ ކަމަށެވެ.

ހަމަނުޖެހުން ހިންގި ބިދޭސީންގެ ތެރެއިން އިންޑިއާގެ 166 މީހަކު ވަނީ ބުރާސްފަތު ދުވަހު އެ ކުންފުނިން ޗާޓަރުކުރި އިންޑިގޯގެ ފްލައިޓެއްގައި ފުރުވާލާފަ އެވެ. އަދި ހޮނިހިރު ދުވަހު ބަންގްލަދޭޝްގެ 265 މީހަކުވެސް ވަނީ ފުރުވާލަފަ އެވެ. އެމީހުން ފުުރުވާލީ ބަންގްލަދޭޝްގެ ބީމަން އެއާލައިންގެ ޗާޓަރު ފްލައިޓެއްގައި އެވެ.

އައިމާއިން އިން ބުނީ، އެ މީހުންގެ ތެރެއިން 80 މީހުންނަކީ އެ މީހުން އަމިއްލަ އަށް ދާން ބޭނުންވެގެން އެދިގެން ފޮނުވި މީހުން ކަމަށެވެ. ބިދޭސީން ފުރުވާލުމުގައި ފޮރިން މިނިސްޓްރީ، އިކޮނޮމިކް މިނިސްޓްރީ، ބަންގްލަދޭޝްގެ އެމްބަސީގެ އިތުރުން އިންޑިއާގެ ހައިކޮމިޝަނުން ލިބުނު އެހީތެރިކަމަށް އައިމާއިން ވަނީ ޝުކުރު އަދާކޮށްފައެވެ.

ރާއްޖޭގައި ގަވާއިދާ ހިލާފަށް ދިރިއުޅެމުންދާ ބިދޭސީން ފުރުވާލުމުގެ މަސައްކަތް ފަށައި، މި ލޮކްޑައުންގެ ތެރޭގައި ގިނަ އަދަދެއްގެ ބަޔަކު ވަނީ ގައުމަށް ގެންގޮސްފައި އެވެ.