މުސްލިމުންގެ ތިންވަނައަށް އެެންމެ މުޤައްދަސް ބިނާކަމުގައިވާ މަސްޖިދުލް އަޤްޞާ އަންނަ ފިިޠުރު ޢީދުގެ ބަންދަށް ފަހު ނަމާދު ކުރުމަށް ހުޅުވާލަން ނިންމައިފި އެވެ.
ޤުދުސްގައި ހުންނަ އަޤްޞާ މިސްކިތް ހިންގާ ޤާނޫނީ ގުނަވަން ކަމުގައިވާ، ޤުދުސް އިސްލާމިކް ވަޤްފުގެ އެންމެ މަތީ މަޖިލީހުން އަޤްޞާ މިސްކިތް ހުޅުވަން މި ނިންމީ ކޮވިޑް-19 ބަލިމަޑުކަމާއި ގުޅިގެން އަޅުކަން ކުރާ މީހުންގެ ސަލާމަތާ ރައްކަލަކަށް މިސްކިތް ބަންދުކޮށްފައި ހުންނަތާ ދެމަސް ފަހުންނެވެ.
އުރުދުންގެ ސަރުކާރުން ކަނޑައަޅާފައިވާ މި މަޖިލީހުން ޢާންމު ކުރި ބަޔާނުގައި ބުނެފައި ވަނީ ފިޠުރު ޢީދާއި ގުޅުވައިގެން ތިންދުވަހުގެ މުއްދަތަކަށް ފަހު އަލް-އަޤްޞާ މިސްކިތް އަޅުވެރިންނަށް ޢާންމުކޮށް ހުޅުވާލާނެ ކަމަށެވެ. އަދި ހުޅުވާލުމުން އެތަނަށް ޒިޔާރަތް ކުރާ ފަރާތްތަކުން ޢަމަލުކުރަން ޖެހޭނެ ގޮތުގެ އޮނިގަނޑެއް ވަރަށް އަވަހަށް ޢާންމު ކުރާނެކަމަށް ބަޔާނުގައި ވެއެވެ.
ކޮވިޑް-19ގެ ނުރައްކާ ބޮޑުވެ، ސަލާމަތާއި ރައްކާތެރިކަމުގެ ފިޔަވަޅެއްގެ ގޮތުން އަޤްޞާ މިސްކިތް ބަންދު ކުރީ މިދިޔަ މާރޗު މަހުގެ ފަނަރަ ވަނަ ދުވަހު އެވެ. މިއީ ފާއިތުވެ ދިޔަ 50 އަހަރުގެ ތެރޭގައި އަޤްޞާ މިސްކިތް ބަންދު ކުރި މިއީ ފުރަތަމަ ފަހަރެވެ.
