މާލެ ލޮކްޑައުން ކޮށްފައިވާ މި ދަނޑިވަޅުގައި ގޭބަންދުގައި ތިބޭ މިވަގުތަކީ ތާރީޚާއި ޘަޤާފަތާއި ތަރިކައާއި ފަންނުވެރިކަމުގެ މަޢުލޫމާތު ހޯދުމަށް ލިބިފައިވާ ފުރުޞަތަކަށް ހެދުމަށް ހެރިޓޭޖް މިނިސްޓަރު ޔުމްނާ މައުމޫން އިލްތިމާސް ކުރައްވައިފި އެވެ.
ހޯމަ ދުވަހު ފާހަގަކުރަމުންދާ ބައިނަލްއަޤުވާމީ ދާރުލްއާސާރުތަކުގެ ދުވަހުގެ މުނާސަބަތުގައި މިނިސްޓަރު ޔުމްނާ ދެއްވި ޚިޠާބުގައި ވިދާޅުވީ، ކޮވިޑް-19 އާ މުޅި ދުނިޔެ ހަނގުރާމަ ކުރާ މި ބިރުވެރި ދުވަސްވަރު ތާރީޚާއި، ޘަޤާފަތާއި ފަންނުވެރިކަމުގެ މުހިއްމުކަން އިހުނަށްވުރެ ބޮޑަށް އިހުސާސް ކުރެެވޭ ކަމަށެވެ. ޘަޤާފަތާއި ތަރިކައާއި ފަންނުވެރިކަން އެއީ އެންމެން ގުޅުވައިދީ އެއްބައިވަންތަ ކޮށްދޭ ވަޞީލަތެއްގެ ގޮތުގައި މިނިސްޓަރ ޔުމްނާ ފާހަަގަކުރެއްވި އެވެ.
އަޅުގަނޑުމެންގެ ސިކުނޑިތައް ހުޅުވައިލަދޭތީ. އަޅުގަނޑުމެންނަށް އުއްމީދު ގެނުވައިދޭތީ. މި އާލަމީ ވަބާއިން ރައްކާތެރިވުމަށް ގޭބަންދުގައި ތިބޭ މިވަގުތަކީ ތާރީޚާއި ޘަޤާފަތާއި ތަރިކައާއި ފަންނުވެރިކަމުގެ މަޢުލޫމާތު ހޯދުމަށް ލިބިފައިވާ ފުރުޞަތަކަށް ހައްދަވާށޭ.ހެރިޓޭޖް މިނިސްޓަރު - ޔުމްނާ މައުމޫން
ކުދިންގެ ތަޢުލީމީ ބިންގާ އެޅިގެން ދާއިރު އެ ކުދިންނަކީ ކާބަފައިންގެ އާދަކާދަތަކާއި، ތާރީޚާއި، ޘަޤާފަތުގެ މަޢުލޫމާތު ލިބިފައިވާ އެކަން ކަމަށް ލޯބިކުރާ ކުދިންކަމުގައި ހެދުމަށް މިނިސްޓަރު ޔުމްނާ ވަނީ ބާރުއަޅުއްވާފަ އެވެ.
ދުނިޔޭގެ ދާރުލްއާސާރު ދުވަހަކީ އިންޓަރނޭޝަނަލް ކައުންސިލް އޮފް މިއުޒިއަމްސް (އައިކޮމް)ގެ ފަރާތުން ފާހަގަކުރަމުން އަންނަ ދުވަހެކެވެ. އެދުވަހެއް ފާހަގަކުރުމުގެ ބޭނުމަކީ މުޖުތަމަޢުތަކުގައި ދާރުލްއާސާރުތަކާއި އާރޓް ގެލެރީތަކުގެ މުހިންމު ދައުރާމެދު ފަރުދުންގެ މެދުގައި ހޭލުންތެރިކަން އިތުރުކުރުމެވެ.
މިއަހަރުގެ ދާރުލްއާސާރު ދުވަހުގެ ޝިޢާރަކީ "ހަމަހަމަކަމަށްޓަކައި ދާރުލްއާސާރުތައް: ތަފާތުތަކާއެކުވެސް ބައިވެރިކުރުން" ނުވަތަ "މިއުޒިއަމްސް ފޮރ އިކުއަލިޓީ: ޑައިވަރސިޓީ އެންޑް އިންކްލޫޝަން" މި އެވެ.
މި ޝިއާރުން ބާރުއަޅަނީ ދާރުލްއާސާރުތަކާއި އާރޓް ގެލެރީތަކަކީ މުޖްތަމައެއްގައި ހުރި ތަފާތުތަކާއެކުވެސް، އެންމެންގެ ބައިވެރިވުމާއިއެކު، އެ މުޖްތަމަޢެއްގެ ތާރީޚާއި ޘަޤާފަތާއި ތަރިކައާއި ފަންނުވެރިކަން އެ ދާރުލްއާސާރެއް ހުރި މުޖްތަމަޢަކަށާއި ޒިޔާރަތްކުރާ ފަރާތްތަކަށް ދައްކުވައިދޭ ތަންތަން ކަމުގައި ހެދުމަށެވެ.
