ރާއްޖެއިން އިންޑިއާ އަށް ދިޔަ ހަ މީހަކު ކޮވިޑް-19 އަށް ޕޮޒިޓިވް ވެއްޖެ އެވެ.

އިންޑިއާގެ ނޫސްތަކުން ރިޕޯޓު ކޮށްފައިވާ ގޮތުން ޕޮޒިޓިވްވި ހަ މީހުންނަކީ ޓެމިލްނާޑޫ ސްޓޭޓްގެ ކަންޔާކުމަރީ، ޗެންނާއިގެ އިތުުރުން ޕުޑުކޮއްޓާއި އަށް ނިސްބަތްވާ މީހުން ކަމަށެވެ. އިތުރު މައުލޫމާތެއް އެ ނޫހުން ހާމައެއް ނުކުރެއެވެ. އަދި އެ މީހުން އިންޑިއާ އަށް ދިޔަ ތާރީޚެއް ވެސް ރިޕޯޓުކޮށްފައެއް ނުވެއެވެ.

ރާއްޖެއިން ދިޔަ ހަ މީހަކު ޕޮޒިޓިވްވެފައިވާ ކަމަށް ނޫސްތަކުން ރިޕޯޓު ކޮށްފައި ވާއިރު، އިންޑިއާގެ ރައްޔިތުން ބަލާ އައި މަނަވަރުން ދިޔަ ދެ މީހަކު ޕޮޒިޓިވް ވެފައިވާ ކަމަށް އިންޑިއާގެ ނޫސްތަކުން މީގެ ކުރިންވެސް ރިޕޯޓު ކޮށްފައި ވެއެވެ.

އެކަމާއި ގުޅުވައިގެން ނޫސްވެރިޔަކު ސުވާލު ކުރުމުން އެންއޯއީސީގެ ތަރުޖަމާނު މަބްރޫކް އަޒީޒް ވިދާޅުވެފައި ވަނީ އިންޑިއާގެ ރަސްމީ އެއްވެސް ފަރާތަކުން އެފަދަ އެއްވެސް މައުލޫމާތެއް ހިއްސާކޮށްފައި ނުވާ ކަމަށެވެ. އިތުރަށް ޕޮޒިޓިވްވި މީހުންނާއި ބެހޭ އެއްވެސް މައުލޫމާތެއް އަދި މިހާތަނަށް ސަރުކާރުން ހާމަކޮށްފައެއް ނުވެއެވެ.

ރާއްޖެގައި ކޮވިޑް-19ށް ޕޮޒިޓިވްވި މީހުންގެ އަަދަދު ހާހަަށްވުރެ މައްޗަށް އަރާފައި ވާއިރު، އޭގެ ތެރޭގައި އިންޑިއާގެ 99 މީހަކު ހިމެނެއެވެ.