ފުލުހުން މެދުވެރިކޮށް ވިޔަފާރިކުރުމުގެ ހުއްދަ ދޫކުރުން ވަގުތީ ގޮތުން މެދުކަނޑާލައިފި އެވެ.

އިކޮނޮމިކް މިނިސްޓްރީން ބުނީ އާންމު ޞިއްހަތު ރައްކާތެރިކުރުމުގެ ގާނޫނުގެ ދަށުން އާންމު ސިއްޙަތުގެ ކުއްލި ނުރައްކަލުގެ ހާލަތު އިއުލާނުކުރުމާ ގުޅިގެން، ގޭބިސީތަކުން ބޭރަށް ނުކުމެ އުޅުން މަނާކޮށްފައިވާ މުއްދަތުގައި ފުލުހުން މެދުވެރިކޮށް ޒަރޫރީ ބޭނުންތަކަށް މުދާ ވިއްކާ ފަރާތްތަކަށް ހުއްދަ ދޫކުރުން، 28 މެއި 2020ގެ ނިޔަލަށް، ވަގުތީ ގޮތުން ހުއްޓާލާފައިވާ ކަމަށެވެ.

ނަމަވެސް، މި މުއްދަތުގެ ތެރޭގައި މާލެ ޕޯޓުގައި، މުދާ ކްލިއަރ ކުރުމަށް މޯލްޑިވްސް ޕޯޓްސް ލިމިޓަޑްއިން ކަނޑައަޅާ ފަރާތްތަކަށް ހުއްދަ ދޫކުރާނެ ކަމަށް މިނިސްޓްރީން ބުނެ އެވެ.

ވިޔަފާރިކުރުމުގެ ހުއްދަ ދޫކުރުން ވަގުތީ ގޮތުން ހުއްޓާލާފައި މިވަނީ ކުރިއަށް ދެ ހަފުތާ ތެރޭގައި، މާލެސިޓީގައި ކޮވިޑް-19 ފެތުރޭ މިންވަރު އިތުރުވާނެ ކަމަށް އެންއޯއީސީގެ ޑޮކްޓަރުންގެ ޓީމުން ވިދާޅުވެފައިވަނިކޮށެވެ.

އެގޮތުން އޭޕްރީލް މަހުގެ 15 ގައި އިއުލާންކުރި ލޮކްޑައުންގެ މުއްދަތު ވަނީ އިތުރުކޮށްފަ އެވެ. މިހާރު އަޅާފައިވާ ފިޔަވަޅުތައް ހަރުކޮށި ކޮށްފައިވާއިރު، ސިނަމާލެ ބްރިޖް ދަންވަރު 1:00ން ހެނދުނު 9:00ށް ބަންދު ކުރުމަށް ވެސް ވަނީ ނިންމާފަ އެވެ. އަދި ކުރިން ކޮންމެ ގޭބިސާއަކުން ވިޔަފާރިކުރުމަށް ކޮންމެ ތިން ދުވަހަކުން އެއް ދުވަހު ލިބޭ ހުއްދަ މިހާރު ދޫކުރަން ހަމަޖެހިފައިވަނީ ހަފުތާއަކު އެންމެ ދުވަހަކު އެވެ.