ކޮވިޑް-19 އާއި ގުޅިގެން ހާލުގައި ޖެހިފައިވާ ބިދޭސީންނަށް އެހީވާން މޯލްޑިވިއަން ރެޑް ކްރެސެންޓް (އެމްއާރުސީ) އިން ހުޅުވާފައިވާ ރިލީފް ފަންޑަށް މިހާތަނަށް 8 ލައްކަ އަށްވުރެ ގިނަ ރުފިޔާ ލިބިއްޖެ އެވެ.
ރެޑް ކްރެސެންޓުން ހުކުރު ދުވަހު ހާމަކޮށްފައިވާ ގޮތުގައި، މި ފަންޑަށް މިހާތަނަށް 881,787.44 ރުފިޔާ ލިބިފައިވާ ކަމަށެވެ. މި ފަންޑު ހުޅުވާފައިވަނީ މި މަހުގެ އެއްވަނަ ދުވަހު އެވެ.
މިމަހުގެ 3 ވަނަ ދުވަހު، ނެޝަަނަލް އިމަރޖެންސީ އޮޕަރޭޝަން ސެންޓަރ ގައި ބޭއްވި ނޫސްވެރިންގެ ބައްދަލުވުމުގައި ދިވެހި ރެޑް ކްރެސެންޓްގެ ރައީސް އަލީ ނާޝިދު ވިދާޅުވެފައިވަނީ، ކޮވިޑް-19 އާ ގުޅިގެން އިގްތިސާދީ އަދި އިޖްތިމާއި ހީނަރުކަމުގެ ސަބަބުން ހާލުގައި ޖެހިފައިވާ ބިދޭސީންނަށް އެހީތެރިކަން ފޯރުކޮށް ދިނުމުގެ ގޮތުން ''ކޮވިޑް-19 މައިގްރެންޓު ރިލީފް ފަންޑު'' ގެ ނަމުގައި ފަންޑެއް މޭ މަހުގެ އެއްވަން ދުވަހު ހުޅުވާފައިވާ ކަމަށެވެ.
މި ފަންޑަކީ ދިވެހި ރެޑްކްރެސެންޓުން މިހާރުވެސް ހާލުގައި ޖެހިފައިވާ ބިދޭސީންނަށް ކުރަމުންދާ މަސައްކަތް އިތުރަށް ފުޅާކޮށް ދެމެހެއްޓިނިވި ގޮތެއްގައި އެހީ ބޭނުންތެރިވާ ފަރާތްތަކަށް އެހީ ފޯރުކޮށް ދިނުމުގެ މަގްސަދުގައި ހުޅުވާފައިވާ ފަންޑެއް ކަމަށް ވެސް ނާޝިދު ވިދާޅުވެފައި ވެއެވެ.
ފަންޑަށް ފައިސާ ހަދިޔާ ކުރެެވޭނީ ދިވެހި ރެޑް ކްރެސެންޓުގެވެބްސައިޓްމެދުވެރިކޮށެވެ. ވެބްސައިޓްގައިވާ ބޭންކު އެކައުންޓްތައް މެދުވެރިކޮށް ފައިސާ ހަދިޔާ ކުރެވޭނެ އިންތިޒާމް ވަނީ ހަމަޖައްސާފަ އެވެ. އެމްއާރްސީން ބުނީ، ފަންޑަށް ޖަމާވާ ފައިސާގެ އަދަދު ހާމަކުރަމުންދާނެ ކަމަށެވެ.
ނާޝިދު ވިދާޅުވެފައިވަނީ، ބިދޭސީންނަށް އެހީތެރިކަން ފޯރުކޮށް ދިނުމަށްކުރާ ކަންތައްތަކުގެ ތެރެއިން، އެ ފަރާތްތަކަށް ކާނާ ފޯރުކޮށް ދިނުމާއި، ކައްކާ ކެއުމުގެ އިންތިޒާމް ހަމަޖެހިފައިވާ ތަންތަނުގައި ދިރިއުޅޭ ބިދޭސީންނަށް ކާޑުގެ އިތުރުން ޒަރޫރީ ބޭނުންވާ ތަކެތި ފޯރުކޮށް ދިނުން ހިމެނޭ ކަމަށެވެ.
އެމްއާރްސީން ބުނީ، ކަރަންޓީނުގެ އިތުރުން އައިސޮލޭޝަން ގައި ތިބި ބިދޭސީންނަށް ހައިޖީނިިކް ކިޓް ފޯރުކޮށް ދިނުމުގެ މަސައްކަތްވެސް ކުރަމުންދާ ކަމަށެވެ.
ކޮވިޑް-19 އާ ގުޅިގެން ތޮއްޖެހިން ދިރިއުޅޭ ބިދޭސީން އެހެންތަނަކަށް ބަދަލު ކުރުމުގެ މަސައްކަތް ސަރުކާރުން ވަނީ ފަށާފަ އެވެ. އެގޮތުން ބައެއް ބިދޭސީންތައް ވަނީ މިހާރު ގުޅީފަޅަށް ބަދަލުކޮށްފަ އެވެ. އަދި ކުރިޔަށް އޮތް ދުވަސްތަކުގައި އިތުރު ބިދޭސީންތަކެއް އެހެން ދިމަދިމާލަށް ބަދަލު ކުރުމުގެ މަސައްކަތް ދަނީ ކުރަމުންނެވެ.
