ދިވެހިރާއްޖޭގެ ޖަލުތަކާއި ޕެރޯލްގެ ޤާނޫނު ގެ ދަށުން އުފައްދާފައިވާ ޕެރޯލް ބޯޑުގެ ބައްދަލުވުންތައް އޮންލައިންކޮށް ކުރިއަށް ގެންދަން ފަށައިފި އެވެ.

ބުރާސްފަތި ދުވަހު މޯލްޑިވްސް ކަރެކްޝަނަލް ސަރވިސަސްއިން ކުރި ޓްވީޓެއްގައި ބުނީ، ކޮވިޑް-19 އާއި ގުޅިގެން ޕެރޯލް ބޯޑްގެ ބައްދަލުވުންތައް މެދުކެނޑިފައި ވީނަމަވެސް، އޮންލައިންކޮށް އަނެއްކާވެސް ބައްދަލުވުންތައް ކުރިއަށް ގެންދަން ފަށާފައިވާ ކަމަށެވެ.

އެގޮތުން ބުރާސްފަތި ދުވަހުގެ ބައްދަލުވުމުގައި ޤައިދީންނާއި އިންޓަވިއު ކުރުން ކުރިއަށް ގެންގޮސްފައިވާކަމަށް ކަރެކްޝަންސް އިން ބުނެ އެވެ.

ގިނަ ދުވަސްތަކެއްގެ މެދުކެނޑުމަކަށް ފަހު ޕެރޯލް ބޯޑުގެ ބައްދަލުވުންތައް އަލުން ފަށާފައިވާއިރު، ޖަލު ބަންދުގައިވާ ޤައިދީންގެ ތެރެއިން މިހާތަނަށް ޕެރޯލްއާއި ކްލެމެންސީ ހަމަވެފައި ތިބި ފަރާތްތަކަށް ލަސްނުކޮށް އެ ފުރުޞަތު ފަހި ކޮށްދިނުމަށް މަޖިލީހުގެ ހިއުމަން ރައިޓްސް އެންޑެ ޖެންޑަރ ކޮމިޓީން ވެސް ވަނީ ގޮވާލާފަ އެވެ.

އެގޮތުން ކޮވިޑް-19 ފެތުރިއްޖެ ޙާލަތެއްގައި ޖަލުތަކަށް ދިމާވާނެ އެންމެ ބޮޑު ގޮންޖެހުމަކީ ޖަލުގެ އާބާދީކަން ފާހަގަކޮށް ކޮމިޓީ ރިޕޯޓުގައި ބުނެފައިވަނީ، މިހާރުވެސް ބޮޑެތި ޖަލުތަކުގައި އެތަނެއްގެ ޖާގައަށްވުރެ %40 އިތުރަށް މީހުން ގައިދުކޮށްފައިވާ ކަމަށެވެ. އަދި އެއާއެކު ޕެރޯލް ޙައްޤުވާ ފަރާތްތަކަށް ލަސްނުކޮށް އެ ފުރުސަތު ފަހިކޮށްދެވިއްޖެނަމަ އެކަމަށް ކޮންމެސް ވަރެއްގެ ހައްލެއް އަންނާނެކަމަށް ބުނެފައި ވެއެވެ.