މާވަށު ދާއިރާގެ ޕީއެންސީ މެންބަރ މުޙައްމަދު ސަޢީދު މިހާރު ރައްޔިތުންގެ މަޖިލީހަށް ހުށަހަޅުއްވާފައިވާ ކޮވިޑް-19 އެހީތެރިކަމުގެ ބިލު ރައްޔިތުންގެ މަޖިލީހުގެ ޤަވާއިދަށް ނުފެތޭތީ އެބިލު ބަލައިގަނެވެން ނެތް ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެ އެވެ.
މިބިލުގެ ފުރަތަމަ ކިޔުން އިއްވުމަށް ހަމަޖެހިފައިވަނީ މިދިޔަ ހަފުތާގެ އަންގާރަ ދުވަހު ކުރިޔަށް ދިޔަ މަޖިލީހުގެ ޖަލްސާގަ އެވެ. އެޖަލްސާގައި މިބިލާއި ގުޅޭގޮތުން ވާހަކަ ދައްކަވަމުން ރައީސް ނަޝީދު ވިދާޅު ވެފައިވަނީ ބިލު މިހާރު އޮތްގޮތުން މަޖިލީހުގެ ޤަވާއިދަށް ނުފެތޭތީ ދެން އެބިލު ހުށަހެޅުމަށް ކުރެވިދާނެ ކަންކަމާއި ގުޅޭގޮތުން މަޖިލީހުގެ ސިޔާސީ ޕާޓީތަކުގެ ލީޑަރުންނާ މަޝްވަރާކުރައްވާނެ ކަމަށެވެ. ރައީސް ނަޝީދު ވިދާޅުވީ ރައްޔިތުންގެ މަޖިލީހަށް މާވަށު ދާއިރާގެ މެންބަރ ހުށަހަޅުއްވާފައިވާ ބިލުގައި ޢާމްދަނީން އުނިވާ އަދި އިތުރުވާ ބައިތަކެއް ހިމެނޭ ކަމަށެވެ.
އެދުވަހުގެ ޖަލްސާގައި ރައީސް ނަޝީދު މި މޭރުމުން ވާހަކަ ދެއްކެވުމުން އެ ދުވަހު ޖަލްސާގައި ސަޢީދު ވަނީ ނިޒާމީ މައްސަލަ ނަންގަވާފަ އެވެ. އަދި މި ބިލު ހުށަނޭޅޭނެ ކަމަށް މަޖިލީހުގެ ރައީސް ބަޔާންކުރައްވާ ޙާލަތެއް ނެތްކަމަށް ސަޢީދު ވިދާޅުވިއެވެ. ދައުލަތުން ކުރިން ރައްކާކޮށްފައި ހުރި ފައިސާ (ޕެންޝަން ފައިސާ) އޭގެ ޙައްޤު ވެރިންނަށް ފޯރުކޮށް ދިނުމަށް އެދި ދެންނެވުމަކީ މަޖިލީހުގެ ޤަވައިދުގެ ރޫޙާއި ޚިލާފު ކަމެއް ނޫންކަމަށް ސަޢީދު ވިދާޅުވިއެވެ. އަދި މިއީ ދައުލަތަށް ސީދާ އަސަރުކުރާނެ ނޫންކަމަށްވެސް ސަޢީދު ވިދާޅުވިއެވެ.
މިކަމަށް ޖަވާބު ދެއްވަމުން ރައީސް ނަޝީދު ވިދާޅުވީ ބިލުގައި މާލިއްޔަތަށް އަސަރުނުކުރާ ކަންކަން ހުރިކަަމަށް ދެންނެވެން ނެތްކަމަށެވެ. މިހާރު މިއޮތީ ޚާއްޞަ ޙާލަތެއްކަމަށާއި، ނަމަވެސް މިޙާލަތުގައިވެސް ޤާނޫނާއި ޤަވާއިދު ހިފަހައްޓަން ޖެހޭނެ ކަމަށެވެ.
ބުދަ ދުވަހު ކުރިޔަށްދިޔަ މި ދައުރުގެ 36 ވަނަ ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ މިބިލާއި ގުޅޭގޮތުން ސައީދު ސިޓީއެއް ފޮނުއްވާފައިވާ ކަމަށެވެ.
ދަންނަވަންޖެހެނީ މިބިލަކީ މަޖިލީހުގެ ގަވާއިދު ވަރަށް ސަރީހަ އިބާރާތުން ބުނާ ފައިސާ އާ ގުޅޭ ބިލެކޭ. ދަންނަވަން އޮތީ މިބިލަކީ މެމްބަރަށް ހުށަހެޅެން ނެތް ބިލެކޭ. އެއިރެއްގައި ސަރުކާރުގައި ތިއްބަވާ ބޭފުޅުން ނުވަތަ ސަރުކާރު ހިންގާ ޕާޓީގެ ފަރާތުން ހުށަހެޅޭ މައްސަލަ އެކޭމީ. އެހެންވީމާ މެމްބަރުގެ ބިލް ބަލައިގަނެވެން ނެތް ވާހަކަ ދަންނަވަން.ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރައްޔިތުންގެ މަޖިލީހުގެ ޤަވާއިދު ބުނާގޮތުން ދައުލަތުގެ ޢާމްދަނީން އުނިވާ ގޮތަށް އަދި އިތުރުވާ ގޮތަށް ކަންކަން ހިމަނާފައި ބިލު ހުށަހެޅޭނީ ސަރުކާރުގެ ފަރާތުންނެވެ. ދައުލަތުގެ ޢާމްދަނީއަށް އެކަމަކުން އަސަރު ކުރާ ކަމެއް ބިލުތަކުގައި ހިމަނައިގެން ހުށަހެޅޭނީ ސަރުކާރު ފަރާތުން ސަރުކާރު ޕާޓީގެ މެންބަރުންނަށެވެ.
