ތޮއްޖެހިގެން މާލެ ސަރަހައްދުގައި ބިދޭސީން ދިރިއުޅެމުން އަންނަ އިތުރު ފަސް ތަނެއް ދެނެގަނެވިފައިވާކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރު (އެންއީއޯސީ) އިން ހާމަކޮށްފި އެވެ.
އާދީއްތަ ދުވަހުގެ ރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި، ސެންޓަރުގެ ތަރުޖަމާން މަބްރޫކް އަޒީޒް ވިދާޅުވީ އަލަށް މި ދެނެގަނެވުނު، ފަސް ތަނާއެކު، ކޮންޓެއިންމެންޓް ސައިޓްތަކުގެ ގޮތުގައި ފާހަގަކުރެވުނު ތަންތަނުގެ އަދަދު 33ށް އަރާފައިވާކަން މަބްރޫކް ވަނީ ފާހަގަކުރައްވާފަ އެވެ.
ކޮންޓެއިންމަންޓް ސައިޓްތައް، މާނައަކީ މާލޭގައި ބިދޭސީން ދިރިއުޅެމުން ދާ ތަންތަން، އެ ތަންތަން މޮނީޓަރިންގގްގެ ހާލަތައް ގެންދެވި ސާމްޕަލް ނެގުމުގެ މަސައްކަތް ކުރައްވާކަން އެނގިފައި އޮންނާނެ. އެންމެ ފަހުން އަޅުގަނޑު މިކަމާއި ބެހޭގޮތުން ތަފްސީލް އެރުވި ދުވަހު 28 ތަނެއްގެ ވާހަކަ ބުނިން. މީގެއިތުރުން، އިތުރު 5 ތަނެއްވެސް ކޮންޓެއިންމެންޓް ސައިޓްސްތަކުގެ ގޮތުގައި ފާހަގަ ކުރެވިފައިވޭ. އެއާއި އެކު ޖުމްލަ 33 ތަނެއް މިހާރު އެބަ ބެލޭ.އެންއީއޯސީގެ ތަރުޖަމާން މަބްރޫކް އަޒީޒް
ރާއްޖޭގައި މިހާތަނަށް ކޮވިޑް-19 އަށް ޕޮޒިޓިވްވި މީހުންގެ ތެރެއިން ގިނަ އަދަދެއްގެ މީހުންނަކީ ބިދޭސީންނެވެ. އޭގެ ތެރޭގައި މިފަދަ ތަންތަނުން ފެނިފައިވާ ކްލަސްޓަރތައް ގިނަ އެވެ. އަދި މިފަދަ ބައެއް ތަންތަނުން ނެގި ސާމްޕަލްތަކުގެ 100 އިންސައްތަ ޕޮޒިޓިވްވެފައިވާ ކަމަށް މީގެކުރިން ވަނީ ހާމަވެފަ އެވެ.
މިތަންތަނުގައި ދިރިއުޅޭ މީހުންނަށް ސަރުކާރުން ގާއިމްކޮށްފައިވާ ކަރަންޓީން ފެސިލިޓީސްތަކަށް ބަދަލުކުރުމުގެ މަސައްކަތް ވަނީ ފަށާފަ އެވެ. އެގޮތުން ހުޅުމާލެ ފޭސް 2، ގުޅިފަޅު އަދި ވިލިވަރުގައި އަންނަނީ ބިދޭސީންނަށް ޚާއްޞަކޮށްގެން ކަރަންޓީނު ފެސިލިޓީތައް ހަދަމުންނެވެ.
މިހާރު ހުރި ބިދޭސީ ކަރަންޓީން ފެސިލިޓީސްތަކުގައި 612 މީހަކު އެބަތިއްބެވެ. އަދި މީގެ ތެރެއިން 475 މީހުންނަކީ ތޮއްޖެހިގެން އުޅޭ ތަންތަނުން އައިސޮލޭޝަނަށް ގެންދެވޭ މީހުން ކަމަށް މަބްރޫކް ވަނީ ވިދާޅުވެފަ އެވެ.
އޭގެ އިތުރުން މާލޭގައި އުޅޭނެ ތަނެއް ނެތި، ވަކި ވަޒީފާއެއް އަދާ ނުކުރާ މީހުން އެހެން ތަނަކަށް ބަދަލުކުރުމަށް އެޗްޕީއޭއިން ކުރަމުންދާ މަސައްކަތުގެ ތެރެއިން 566 ބިދޭސީއަކު އެފަދަ އެކޮމަޑޭޝަން ތަކަށް ބަދަލުކުރެވިފައިވާކަމަށް މަބްރޫކް ވަނީ ވިދާޅުވެފަ އެވެ.
