ރާއްޖެއަށް ބޭނުންވާ ވެންޓިލޭޓަރުތަކުގެ ތެރެއިން 45 ވެންޓިލޭޓަރެއް މި މަހުގެ ތެރޭގައި ރާއްޖެ އަންނާނެ ކަމަށް ސަރުކާރުން ހާމަކޮށްފި އެވެ.
މެޑްޓެކް މޯލްޑިވްސް އާ ޙަވާލުކޮށްގެން ހެލްތު މިނިސްޓްރީ އަށް ގެންނަ ވެންޓިލޭޓަރުތަކުގެ ތެރެއިން، 18 ވެންޓިލޭޓަރެއް އާދިއްތަ ދުވަހު ވަނީ ރާއްޖެ ގެނެސްފަ އެވެ. 50 ވެންޓިލޭޓަރު ގެނައުމަށް މެޑްޓެކް ކުންފުންޏާ ހަވާލުކުރެވުނީ، ކޮންމެ ޔުނިޓެއް 288،914ރ. ރޭޓުން، 14،445،700ރ. އަށެވެ.
އާދިއްތަ ދުވަހުގެރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި އެ ސެންޓެރުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، ސަރުކާރުން ގެންނަ ވެންޓިލޭޓަރުގެ ތެރެއިން 10 ވެންޓިލޭޓަރުގެ މި މަހުގެ ތެރޭގައި ލިބޭނެ ކަމަށާއި، އަދި 35 ވެންޓިލޭޓަރެއް މި މަހުގެ 25 ގައި ލިބޭނެ ކަމަށެވެ. މަބްރޫކް ވިދާޅުވީ ބާކި ހުރި ވެންޓިލޭޓަރު އަންނަ މަހުގެ ތެރޭގައި ގެންނާނެ ކަމަށެވެ.
ކޮވިޑް-19 ޖެހޭ މީހުންނަށް ހާއްސަކޮށްގެން ސަރުކާރުން ވަނީ 145 ވެންޓިލޭޓަރެއް ރާއްޖެ ގެނައުމަށް ތިން ކުންފުންޏަކާއި ހަވާލުކޮށްފަ އެވެ. މިއީ ދައުލަތުން ގާތްގަނޑަކަށް 56 މިލިއަން ރުފިޔާ ހަރަދުކޮށްގެން ކުރިއަށްގެންދާ މަސައްކަތެކެވެ. މި ކުންފުނިތަކަށް މި މަސައްކަތް ހަވާލުކޮށްފައިވަނީ "ސިންގަލް ސޯސް ޕްރޮކިއުމަންޓް" އުސޫލުންނެވެ.
އެގޮތުން 20 ވެންޓިލޭޓަރު ގެނައުމަށް ނާޑް ނަމަކަށް ކިޔާ ކުންފުންޏަކާއި، 50 ވެންޓިލޭޓަރު ގެންނަން މެޑްޓެކް ކުންފުންޏާއި ވަނީ ހަވާލުކޮށްފަ އެވެ. އަދި 75 ވެންޓިލޭޓަރު ގެންނަން ހަވާލުކޮށްފައިވަނީ، ދުބާއީގެ ކުންފުންޏެއް ކަމަށްވާ އެކްސެކިއުޓަރ ޖެނެރަލް ޓްރޭޑިންއާ އެވެ.
ދުބާއީގެ ކުންފުންޏާއެކު ވެފައިވާ އެއްބަސްވުމާ ގުޅޭގޮތުން މަބްރޫކް ވިދާޅުވީ، އެ ކުންފުންޏަކީ ރާއްޖޭގައި އޮތް ޑަބްލިޔުއެޗްއޯ އޮފީހުގައި ވެންޓިލޭޓަރު ގެނައުމުގައި އެހީތެރިކަމެއް ފޯރުކޮށްދޭން އެދުމުން ހޯދައިދިން ލިސްޓަކުން މަސައްކަތް ހަވާލުކުރެވުނު ކުންފުންޏެއް ކަމަށެވެ.
އަޅުގަނޑުމެން ޑަބްލިޔުއެޗްއޯގެ އެހީއަށް އެދުނީ، ރާއްޖޭގައި އޮތް ޑަބްލިޔުއެޗްއޯ އޮފީހުގައި އަޅުގަނޑުމެންނަށް މިކަމުގައި އެހީތެރިކަމެއް ފޯރުކޮށްދޭން. ޑަބްލިޔުއެޗްއޯގެ ފަރާތުން ގެންނަ ވެންޓިލޭޓަރެއް ނޫން. އަޅުގަނޑުމެންނަށް އެހީތެރިކަމެއްގެ ދަށުން ހުރެދާނެ ކުންފުނިތައް އަޅުގަނޑުމެންނަށް ހޯދަ ދިނީމައި، ސަރުކާރާ އެ ކުންފުނިތަކާއި މަޝްވަރާކުރެވިގެން ވެންޓިލޭޓަަރސް ގެނައުމުގެ މަސައްކަތް.މުހައްމަދު މަބްރޫކް އަޒީޒް -- އެންއީއޯސީގެ ތަރުޖަމާނު
މަބްރޫކް އިތުރަށް ވިދާޅުވީ، 18 މެއި ގައި އެގްޒިކިއުޓަރސް ކުންފުނިން އޯޑަރު ކޮށްފައިވާ ވެންޓިލޭޓަރުތަކުގެ ތެރެއިން ދިހަ މެޝިނެއް ލިބޭނެ ކަމަށެވެ. އަދި 25 މެއި ގައި 35 މެޝިނެއް ލިބޭނެ ކަމަށާއި، ބާކީ ހުރި މެޝިންތައް ޖޫން މަހުގެ ތެރޭގައި ލިބޭނެކަމަށް މަބްރޫކް ވިދާޅުވި އެވެ. އެ ކުންފުންޏަށް ދޭން ޖެހޭ 34 މިލިއަން ރުފިޔާގެ ތެރެއިން 70 އިންސައްތަ އަގު ވަނީ ދައްކާފަ އެވެ.
