އައްޑޫ ސިޓީން ކޮވިޑް-19ށް ޕޮޒިޓިވްވެފައިވާ ޒުވާނާއާ ގިނަ ބަޔަކު ޑައިރެކްޓް ކޮންޓެކްޓްވެފައިވާ ކަމަށް އިކުއެޓޯރިއަލް ހޮސްޕިޓަލްގެ މެނޭޖަރ ޝަރަފުއްސާދަތު (ސާތު) ވިދާޅުވެއްޖެއެވެ.

ކޮވިޑް-19ގެ ކޭސްއެއް އައްޑޫން ފެނުމާ ގުޅިގެން ހޮނިހިރު ދުވަހު އައްޑޫ ސިޓީ ކައުންސިލުން އޮންލައިންކޮށް ބޭއްވި ނޫސްވެރިންގެ ބައްދަލުވުމުގައި މެނޭޖަރު ސާތު ވިދާޅުވީ ކޮވިޑް-19ށް ޕޮޒިޓިވްވި ޒުވާނާ ފަރުވާ ދެމުންދިޔައިރު އެޒުވާނާ ކައިރިއަށް ގިނަ ބަޔަކު ޤަވާއިދާ ޚިލާފަށް ވަދެފައިވާ ކަމަށެވެ.

ބަލި މީހާއަށް ޒިޔާރަތް ކުރުން މަދުކުރުމަށް ހޮސްޕިޓަލުން މަސައްކަތް ކުރިކަން ފާހަގަކުރައްވައި ސާތު ވިދާޅުވީ އެންގުމާ ޚިލާފަށް ގިނަ ބަޔަކު އައިސީޔޫއަށް ވެސް ވަދެފައިވާ ކަމަށެވެ.

ޑައިރެކްޓް ކޮންޓެކްޓްވި މީހުން ހޯދުމުގެ މަސައްކަތް ކުރަމުންދާއިރު، އެޒުވާނާ ފުރުވުމަށް ވެސް ގިނަ ބަޔަކު އެއަރޕޯޓަށް ދިޔަކަމުގެ މަޢުލޫމާތު ލިބިފައިވާ ކަމަށްވެސް ސާތު ވިދާޅުވިއެވެ.

ޕޮޒިޓިވްވި މީހާއާ ޑައިރެކްޓް ކޮންޓެކްޓްވި 26 މީހަކު ވަނީ ފާހަގަކުރެވިއެވެ. މީގެ ތެރޭގައި 7 ޑޮކްޓަރަކާއި 10 ނަރުހުން ހިމެނެއެވެ.

އައްޑޫ ސިޓީން ކޮވިޑް-19ގެ ފުރަތަމަ ކޭސް ފެނުމާ ގުޅިގެން ހޮނިހިރު ދުވަހުން ފެށިގެން 14 ދުވަހަށް އެސިޓީ ވަނީ ލޮކްޑައުން ކޮށްފައެވެ.