ގެވެށި އަނިޔާގެ ޢަމަލެއް ހިނގާކަމުގެ މަޢުލޫމާތެއް ލިބިފައިވާ ނަމަ އެކަން ރިޕޯޓުކޮށް ދިނުމަށް މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އިން އެދިއްޖެއެވެ.

ޖެންޑަރ މިނިސްޓްރީން ބުނީ ގެވެށި އަނިޔާގެ ޢަމަލެއް ތަޙައްމަލު ކުރާނަމަ ނުވަތަ އެ ފަދަ ޢަމަލެއް ހިނގާކަމުގެ މަޢުލޫމާތު ލިބިފައިވާނަމަ، އެކަން ލަސްނުކޮށް ރިޕޯޓުކޮށްދިނުމަށް އެދޭ ކަމަށެވެ. މިފަދަ ކަންކަމުގައި ޢާންމު ރައްޔިތުން އެއްބާރުލުން ބޭނުންވާކަމަށް މިނިސްޓްރީން ބުނެއެވެ.

ޖެންޑަރ މިނިސްޓްރީން ބުނީ ގެވެށި އަނިޔާ ލިބޭ ކަމުގައިވާނަމަ ސިއްރުނުކޮށް އެހީތެރިކަން ހޯދުމަށް ވެސް އެދިފައިވެއެވެ. އެގޮތުން ޖެންޑަރ މިނިސްޓްރީގެ ހޮޓްލައިން 3328393 އަދި 1412ށް ގުޅުމަށް އެދިފައިވެފައިވެއެވެ.

ގެވެށި އަނިޔާގެ މައްސަލަތައް ރިޕޯޓު ކޮށްދިނުމަށް ޖެންޑަރ މިނިސްޓްރީން އެދިފައިވާއިރު، ފިރިހެން ކުއްޖަކަށް ގެވެށި އަނިޔާކުރި މައްސަލާގައި ފިރިހެނަކު ހައްޔަރުކޮށް، އެ މައްސަލަ ބަލަން ފަށާފައިވާ ކަމަށް ހުކުރު ދުވަހު ފުލުހުން ބުނެފައިވެއެވެ.

ފުލުހުން ބުނީ، މިމަހުގެ 7ވީ ބުރާސްފަތި ދުވަހުގެރޭ ޝޯޝަލް މީޑިއާގައި ކުއްޖަކު ހިއްސާކޮށްފައިވާ ގެވެށި އަނިޔާއެއްގެ ސީރިއަސް މައްސަލަ އެއް ބަލަމުންދާ ކަމަށެވެ. އަދި އެ ހާދިސާ ހިނގިތާ ކުޑައިރުކޮޅެއްގެ ތެރޭގައި ފުލުހުންނަށް ތުހުމަތު ކުރެވޭ ފަރާތް ފެނިގެން އެ މީހާ ފުލުހުންގެ ބެލުމުގެ ދަށަަށް ގެނެސް މައްސަލަ ތަހުގީގު ކުރަމުންދާ ކަމަށެވެ.

ގެވެށި އަނިޔާގެ މައްސަލަތަކާ ގުޅޭ ގޮތުން 29 އޭޕްރީލްވީ ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނަރ އޮފް ޕޮލިސް ޢަބްދުﷲ ފައިރޫޝް ވިދާޅުވީ ކޮވިޑް-19އާ ގުޅިގެން ރާއްޖޭގައި ގެވެށި އަނިޔާކުރާ މައްސަލަތައް ހުށަހެޅޭ މިންވަރު މަދު ކަމަށާއި، ފުރަބަންދުވުމުގެ ކުރިން ވެސް ފުރަބަންދަށް ފަހު ވެސް މިފަދަ މައްސަލަތައް ހުށަހަޅާފައިވާ ގެތަކުގެ ޙާލަތު ވަރަށް ގާތުން ބަލަމުންދާ ކަމަށެވެ. އަދި މިދަނޑިވަޅުގައި މިފަދަ މައްސަލަތައް ކުރިމަތިވިޔަ ނުދިނުމަށް ކުރަންޖެހޭ މަސައްކަތްތައް ކުރުމަށް ޚާއްޞަ އިސްކަމެއްދިންކަން ފައިރޫޝް ފާހަގަކުރެއްވިއެވެ.