ވިޔަފާރިވެރިންނަކީ ގައުމެއްގެ ތަރައްގީގެ ބޮޑެތި ހިއްސާދާރުން ކަމަށާއި، ވިޔަފާރިވެރިންގެ އަޑު ސަރުކާރުން އަހާނެ ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވެފައި މިވަނީ ކޮވިޑް-19 ގުޅިގެން ފަތުރުވެރިކަމުގެ ދާއިރާއަށް ސަރުކާރުން ޚާއްޞަކުރި ރިލީފް ޕެކޭޖް ކަނޑައެޅުމުގެ ކުރިން މަޓީއާއެކު މަޝްވަރާނުކުރާ ކަމަށް ބުނެ މަޓީން ސަރުކާރަށް ވަރަށް ބޮޑަށް ފާޑު ކިޔާފައިވަނިކޮށްށެވެ.

ރައީސް ނަޝީދު ވިދާޅުވީ ސަރުކާރުން، މަޓީ އަދި އެހެން ހުރިހާ ފަރާތެއްގެ ވެސް ހެޔޮލަފާ އިރުޝާދު ބަލައި ގަންނާނެ ކަމަށެވެ. ވިޔަފާރިވެރިންނަކީ ގައުމެއްގެ ތަރައްގީގެ ބޮޑެތި ހިއްސާދާރުން ކަމަަށް އެމަނިކުފާނު ވިދާޅުވިއެވެ.

އުފެއްދުންތެރިކަން ނުކުންނާނީ މަސައްކަތްތެރިންނާއި، ވިޔަފާރިވެރިންނާއި އަދި ގުދުރަތީ ވަސީލަތްތައް އެކުވީމަ ކަމަށް ރައީސް ނަޝީދު ސިފަކުރައްވާފައިވެއެވެ.

މިމަހުގެ 6 ވަނަ ދުވަހު މަޓީން ކަންބޮޑުވުންފާޅުކޮށް ނެރިފައިވާ ބަޔާނުގައި ބުނީ ފަތުރުވެރިކަމުގެ ދާއިރާއަށް ލިބޭނެ ގެއްލުމުގެ މައްޗަށް ސަރުކާރުން އެސްޓިމޭޓް ކޮށްފައިވަނީ ހަގީގަތާ އެއްގޮތަށް ނޫން ކަމަށެވެ. ވިޔަފާރި ބަގުރޫޓްވެ، ވަޒީފާތައް ގެއްލެމުންދާކަން ފާހަގަކޮށް މަޓީން ބުނީ މިކަމުން އަރައިގަތުމަށް އެކަށީގެންވާ ފިޔަވަޅުތައް އަޅަންޖެހޭ ކަމަށެވެ. ނަމަވެސް މިހާތަނަށް އެކަށީގެންވާ ފިޔަވަޅެއް ސަރުކާރުން އަޅާފައިނުވާކަން މަޓީން ފާހަގަކޮށްފައިވެއެވެ.

މީގެ އިތުރުން މަޓީން ބުނީ އަވަސް ފިޔަވަޅުތަކެއް ނާޅައިފިކަމުވާނަމަ ޓުއަރިޒަމް ދާއިރާގެ ވިޔަފާރިވެރިން ބަނގުރޫޓުވެ، އެތައް ބައެއްގެ ވަޒީފާ ގެއްލި ކޭޝްފްލޯ މެނޭޖް ކުރުމަށް ދަތިތަކާ ކުރިމަތިލާން ޖެހޭނެކަމަށެވެ. ރިލީފް ޕެކޭޖަށް އަލިއަޅުއްވާ މަޓީން ބުނީ އެހީގެ ޕެކޭޖް ދިނުމުގައި ކަނޑައަޅާފައިވާ ޝަރުތުތަކުގެ ސަބަބުން ދާއިރާގެ ގިނަ ބަޔަކަށް އެ ޕެކޭޖަށް ޝަރުތު ހަމަނުވާތީ އެހީ ނުލިބޭނެ ކަމަށެވެ.

ނަމަވެސް މިމަހުގެ 7 ވަނަ ދުވަހުގެ މެންދުރުފަހު ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި މަޓީން ނެރުނު ބަޔާނާއި ގުޅުވައި ނޫސްވެެރިޔަކު ސުވާލުކުރުމުން ސަމާސާ ރާގަކަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވީ، ޕެކޭޖާއި ބެހޭ ގޮތުން ''މަޓީ ކިޔާ'' ބަޔަކާއި ވާހަކަތަކެއް ދައްކާފައިވާނެ ކަމަށާއި، އެކަމަކު މަޝްވަރާ ނުކުރާ ކަމަށް މަޓީން ބުނުމުން އޭރު ވާހަކަ ދެކެވުނީ ސިފަ ބަދަލުކޮށްގެން ތިބި މަޓީގެ ބޭފުޅުންކަމާއި މެދު ޝައްކު" ކަމަށެވެ.

މަޓީގެ ބަޔާން މިނިސްޓަރ ސިފަ ކުރައްވާފައިވަނީ، ސަރުކާރު "ގައިގައި ކޮޅުފައިން ޖެހުން" ފަދަ ޢަމަލެއްގެ ގޮތުގައެވެ.