އަވައްޓެރި އިންޑިއާ ރައްޔިތުންގެ ތެރެއިން ރާއްޖޭގައި މިވަގުތު ތާށިވެފައި ތިބި މީހުން އަނބުރާ ޤައުމަށް ގެންދަން އައި އެ ޤައުމުގެ ކަނޑުގެ އަސްކަރިއްޔާގެ މަނަވަރު ހުކުރު ދުވަހުގެ ހަވީރު ފުރުމަށް ހަމަޖެހިއްޖެއެވެ.

އެކަމާ ގުޅޭގޮތުން ރާއްޖޭގައި ހުންނަ އިންޑިއަން ހައިކޮމިޝަނުގެ އޮފީހުން ބުނީ، ރާއްޖޭގައި ތިބި އިންޑިއާ ރައްޔިތުން އަނބުރާ އެ ޤައުމަށް ގެންދިއުމުގެ މަސައްކަތް ފަށާފައިވާ ކަމަށާއި، އެ މަސައްކަތުގެ ދަށުން ފުރަތަމަ ދަތުރު 8 މެއި ވާ ހުކުރު ދުވަހުގެ ހަވީރު ކުރުމަށް ހަމަޖެހިފައިވާ ކަމަށެވެ. އެގޮތުން ފުރަތަމަ ބުރުގައި 700 މީހުންނަށް ޖާގަ ލިބިގެންދާނެކަމަށް މީގެ ކުރިން ބުނެފައިވީ ނަމަވެސް، އިތުރު 50 މީހުންނާއެކު ޖުމުލަ 750 މީހުން މިއަދު ރާއްޖެއިން ފުރާނެ ކަމަށް އިންޑިއަން ހައި ކޮމިޝަނުން މަޢުލޫމާތު ދެއެވެ.

ކޮމިޝަނުން ބުނީ، ފުރުމުގެ ކުރިން އިމިގްރޭޝަނުން ފުރިހަމަ ކުރަންޖެހޭ މަސައްކަތްތައް މިހާރު ކުރަމުންދާ ކަމަށެވެ.

ރާއްޖޭގައި ތިބި އިންޑިއާ ރައްޔިތުންގެ ތެރެއިން އެނބުރި ޤައުމަށް ދާން ބޭނުން މީހުން ފޮނުވުމަށް ދިވެހި ސަރުކާރާއެކު ކޮމިޝަނުން ގިނަ މަސައްކަތްތަކެއް ދަނީ ކުރަމުންނެވެ. އެގޮތުން އެމަސައްކަތުގެ ފުރަތަމަ ފިޔަވަހީގެ ދަށުން އައި އަސްކަރީ މަނަވަރު ރާއްޖޭގައި ބަނދަރުކުރީ ބުރާސްފަތި ދުވަހުގެ ވަގުތެއްގައެވެ.

އިންޑިއާއަށް ގެންދާ މީހުންގެ ތެރެއިން އެންމެ ބޮޑަށް އިސްކަމެއް ދެނީ މާބަނޑު މީހުންނާއި، ވަޒީފާ ގެއްލިފައިވާ މީހުންނާއި، ތާށިވެފައި ތިބި ފަތުރުވެރިން ކަމަށް އިންޑިއާގެ ނޫސްތަކުގައި ރިޕޯޓުކޮށްފައިވެއެވެ. އަދި އެ އެންމެންވެސް ޤައުމަށް އެނބުރި ދިއުމަށް ފަހު 14 ދުވަހުގެ ކަރަންޓީން މުއްދަތެއް ފުރިހަމަކުރަން ޖެހެއެވެ.

އިންޑިއާ ސަރުކާރުން ދަނީ ކޮވިޑް-19 އާ ގުޅިގެން އެކި ޤައުމުތަކުގައި ތާށިވެފައި ތިބި އެ ޤައުމުގެ ރައްޔިތުން އަނބުރާ ޤައުމަށް ގެންދިއުމަށް ޚާއްޞަ އޮޕަރޭޝަނެއް ހިންގަމުންނެވެ.