ކަރަންޓީނު ފެސިލިޓީއެއްގެ ގޮތުގައި ބޭނުންކުރަމުންދާ ހެރަތެރަ އައިލެންޑް ރިސޯޓުގައި ކަރަންޓީނުކޮށްފައި ތިއްބާ ފިލި ފަސް މީހުންގެ ބަންދަށް 15 ދުވަސް ޖަހައިފިއެވެ.
ފުލުހުން ބުނީ މި މީހުންގެ ބަންދުގެ މުއްދަތާމެދު ގޮތެއް ނިންމުމަށް ހުޅުމީދޫ ކޯޓަށް ގެންދިއުމުން އެމީހުންގެ ބަންދަށް 15 ދުވަސް ޖަހާފައިވާ ކަމަށެވެ.
ފުލުހުންގެ މީޑިއާއިން ބުނީ، ބުރާސްފަތި ދުވަހުގެ ފަތިހުގެ ވަގުތެއްގައި، ފިލި ފަސް މީހުގެ ތެރެއިން ދެ މީހަކު ބުރާސްފަތި ދުވަހު ހޯދައި، ހައްޔަރުކޮށްފައިވާ ކަމެވެ. އަދި އަނެއް ތިން މީހުން ބުދަ ދުވަހުގެ ރޭ އެކި ވަގުތުތަކުގައި ހޯދައި، ހައްޔަރު ކޮށްފައިވާކަމަށެވެ.
އެ ފަސް މީހުން ފިލާފައިވާކަން ރިޕޯޓުކޮށްފައިވަނީ ބުދަ ދުވަހުގެ އިރު އޮއްސުނުފަހުން ކަމަަށްވެސް ފުލުހުން ބުނެއެވެ.
ރާއްޖޭގައި ޢާންމު ޞިއްޙީ ކުއްލި ނުރައްކަލުގެ ޙާލަތު އިޢުލާނުކޮށް، އެއް ރަށުން އަނެއް ރަށަށް ދިޔުން މަނާކޮށްފައިވާއިރު، ހުއްދަ ނެތި އެއް ރަށުން އަނެއް ރަށަށް ދިޔުމަކީވެސް މަނާ ކަމަކެވެ. އެހެންނަމަވެސް، މިޢަމުރާއި ޚިލާފުވާ މީހުން ރިޕޯޓުކުރެވޭ މިންވަރުވަނީ އިތުރުވެފައެވެ.
އެފަދަ ފަރާތްތަކުގެ ބަންދުގެ މުއްދަތު ކޯޓަށް ހާޒިރުކޮށްގެން އިތުރުކޮށްފައި ވެސް ވެއެވެ. އަދި އެމައްސަލަތައް ތަޙުޤީޤު ކުރަމުންދާކަމަށް ވެސް ފުލުހުންގެ އިދާރާއިން ބުނެއެވެ.
