ކޮންމެ ރަށެއްގެ ރަށު ކައުންސިލަކުންވެސް އެ ރަށެއްގައި މަސައްކަތްކުރަމުންދާ ބިދޭސީންގެ ދަފްތަރެއް އެ ބިދޭސީއަކު މަސައްކަތް ކުރަމުންދާ ދާއިރާ ސާފުވާނެގޮތަށް އެކުލަވާލާ އެލް.ޖީ.އޭއަށް ފޮނުވުމަށް ރައްޔިތުންގެ މަޖިލީހުގެ ލާމަރުކަޒީ ކޮމިޓީން ހުށަހަޅައިފި އެވެ.

އެކޮމިޓީން މިގޮތަށް ހުށަހަޅާފައިވަނީ ކޮވިޑް -19 ރޯގާ ފެތުރުނަ ނުދިނުމަށް އަޅާ ފިޔަވަޅުތަކުގެ ސަބަބުން ޢާއިލާތަކާއި ވިޔަފާރިތަކުގެ ޢާމްދަނީއަށް އަންނަ ނުރަނގަޅު ބަދަލުތަކުން އަރައިގަތުމަށް، ސަރުކާރުން ހިންގުމަށް ނިންމާފައިވާ ޕްރޮގްރާމް ތަންފީޒުކުރުމަށް މަޖިލީހުން ދެކޭގޮތް ކަނޑައެޅުމާ ގުޅޭ ގޮތުން ރައްޔިތުންގެ މަޖިލީހަށް ހުށަހެޅި މައްސަލަ އެކޮމިޓީން ދިރާސާކޮށް ނިންމުމަށްފަހު ހުށަހެޅި ރިޕޯޓުގައެވެ. މިރިޕޯޓް އަންގާރަ ދުވަހުގެ ޖަލްސާގައި ވަނީ ފާސްކޮށްފައެވެ. އެއީ ވޯޓުގައި ބައިވެރިވެ ވަޑައިގެންނެވި 54 މެންބަރުންގެ ވޯޓުންނެވެ.

މިރިޕޯޓުގައި ކޮމިޓީން މައިގަނޑު 4 ކަމަކަށް ހުށަހެޅުންތައް ހުށަހަޅާފައި ވެއެވެ. އަދި އެއާގުޅިގެން ކޮމިޓީއަށް ފާހަގަކުރެވިފައިވާ 6 ކަމެއްވެސް ވަނީ ފާހަގަކޮށްފައެވެ.

ކޮމިޓީން ހުށަހަޅާފައިވާ އެއް ކަމަކީ ލާމަރުކަޒީ ޤާނޫނަށް އެންމެ ފަހުން ގެނެވުނު އިޞްލާޙުގެ ދަށުން ކައުންސިލްތަކަށް ލިބިފައިވާ ބާރުތަކާ ގުޅޭގޮތުން ކައުންސިލްތަކަށް އެލް.ޖީ.އޭއިން ލަފާ ދިނުމަށްފަހު ވީހާވެސް އަވަހަކަށް ކައުންސިލްތަކުގެ މަސައްކަތްތައް ފަށައިގަތުމެވެ. އަދި އެކިއެކި އިޤްތިސާދީ މަސައްކަތްތައް ކުރުމަށް ދޫކޮށްފައިވާ ބިންތައް އެ ބިންތައް ދޫކޮށްފައިވާ ބޭނުމަށް ބޭނުން ކުރަމުންނުދާނަމަ އެފަދަ ފަރާތްތަކާއެކު ހަދާފައިވާ އެއްބަސްވުން ބާޠިލުކުރުމަށްވެސް ވަނީ ހުށަހަޅާފައެވެ.

މީގެއިތުރުން ކޮވިޑް-19ގެ ސަބަބުން ދިމާވެފައިވާ ޙާލަތުގައި އިޖްތިމާޢީ ގައިދުރުކަމަށް އިސްކަންދީގެން ކައުންސިލްގެ ބައްދަލުވުންތައް ބާއްވައި، ކައުންސިލްގެ އެހެނިހެން މަސައްކަތްތައް ކުރެވޭނެ އިންތިޒާމު ކައުންސިލްތަކުގައި ހަމަޖެހިފައިވާކަން އެލް.ޖީއޭ.އިން ކަށަވަރުކުރުމަށްވެސް ކޮމިޓީންވަނީ ހުށަހަޅާފަ އެވެ.

ކޮވިޑް- 19ގެ ސަބަބުން ދިމާވެފައިވާ ޙާލަތުގައި އެތައް ރައްޔިތުންނަކަށް ނަފުސާނީގޮތުން އަސަރުކޮށްފައިވާއިރު، އެފަދަ ފަރާތްތަކުގެ ތެރެއިން ކައުންސެލިން ބޭނުންވާ ފަރާތްތަކަށް ރަށުގައި ތިބެގެން އެޚިދުމަތް ހޯދޭނެ އިންތިޒާމު ހަމަޖެހިފައިވާކަން އަތޮޅު ހޮސްޕިޓަލްތަކާ ގުޅިގެން ކައުންސިލްތަކުން ކަށަވަރުކުރުމަށްވެސް ކޮމިޓީ ރިޕޯޓްގައި ހުށަހަޅާފައިވެ އެވެ.

ކުދި އަދި މެދު ފަންތީގެ ވިޔަފާރި ތަކަށާއި، ދަނޑުވެރިންނާއި، ރިސޯޓުތަކާއި، ގެސްޓް ހައުސްތަކާއި، މަސްވެރިންނަށް ތަފާތު ސްކީމްތަކުގެ ތެރެއިން ލޯނާއި، ފައިސާ ދޫކުރުމަށް ސަރުކާރުން ނިންމަވާފައިވުމާއި ގުޅިގެން ކޮމިޓީން ހުށަހަޅާފައިވަނީ ރަށްރަށުގެ އަމިއްލަ ވިޔަފާރިތަކަށް ކޮށްފައިވާ ނުރަނގަޅު އަސަރުތައް ކައުންސިލްތައް މެދުވެރިކޮށް އެލް.ޖީ.އޭއިން ހޯދުމަށެވެ. އަދި އެ ފަރާތްތަކަށް ލޯނު ނަގައިގެން ނުވަތަ އެނޫންވެސް ގޮތަކުން ލިބިފައިވާ ގެއްލުންތަކުން އަރައިގަނެވޭނެ ގޮތް ހަމަޖައްސައިދިނުމުގެ ގޮތުން ސަރުކާރުން މި ދަނޑިވަޅުގައި ތަފާތު ސްކީމްތަކުގެ ދަށުން ދެމުންގެންދާ ފައިސާ ހޯދުމަށްއެދި ހުށަހެޅޭނެ ފަސޭހަ އިންތިޒާމުތަކެއް ރަށްރަށުގައި ދިރިއުޅޭ މީހުންނަށް ލިބިފައިވާކަން ކަށަވަރުކުރުމަށެވެ.

ކޮވިޑް-19އާ ގުޅިގެން ވަޒީފާ ގެއްލޭ މުވައްޒަފުންގެ ފަރާތުން ހުށަހަޅާ މައްސަލަތައް ބެލުމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓުގެ ދަށުން ހިންގަމުންދާ ލޭބަރ ރިލޭޝަންސް އޮތޯރިޓީން ކުރަމުންދާ މަސައްކަތްތަކާއި ގުޅޭގޮތުން ކޮމިޓީން ހުށަހަޅާފައިވަނީ ކޮންމެ ރަށެއްގެ ރަށު ކައުންސިލުން އެ ރަށެއްގައި ރަށްވެހިވެފައިވާ ރައްޔިތުންގެ ތެރެއިން ވަޒީފާ ގެއްލިފައިވާ މީހުންގެ ތަފާސްހިސާބެއް ހަދައި އެލް.ޖީ.އޭއާ ހިއްސާކުރުމަށެވެ. އަދި ވަޒީފާ ގެއްލޭ ފަރާތްތަކަށް ސަރުކާރުން ދިނުމަށް ނިންމާފައިވާ ޢިނާޔަތްތަކުގެ މަޢުލޫމާތުތަކަށް ރަށްރަށުގައި އުޅޭ މީހުން އަހުލުވެރި ވެފައިވާކަން ކަށަވަރުކުރުމާއެކު މި ފައިސާ ހޯދުމަށް އެދި ހުށަހެޅޭނެ ފަސޭހަ އިންތިޒާމުތަކެއް ރަށްރަށުގައި ދިރިއުޅޭ މީހުންނަށް ހަމަޖެހިފައިވާކަން ކަށަވަރުކުރުމަށެވެ.