މިސްރުގެ އުތުރު ސިނާއީ ޕެނިންސިއުލާގައި ދިން ހަމަލާތައް ރާއްޖެއިން ކުށްވެރިކޮށްފިއެވެ.
ފޮރިން މިނިސްޓްރީން ބުނީ މިޞްރުގެ އުތުރު ސިނާއީގެ ބީރް އަލްއަބްދު ސިޓީގައި ދަތުރުކުރަމުން ދިޔަ މިސްރުގެ އަސްކަރިއްޔާގެ ވެހިކަލަކަށް ދިން ހަމަލާއެއްގައި ސިފައިންގެ ބައެއް މީހުން މަރުވެ، ބައެއް މީހުން ޒަޚަމްވުމާ ގުޅިގެން، އެހަމަލާ ދިވެހި ސަރުކާރުން ކުށްވެރިކޮށްފައިވާ ކަމަށެވެ. އަދި ޓެރަރިޒަމްގެ މިފަދަ ހަމަލާތަކުގެ ސަބަބުން، ހަމަނުޖެހުންތަކަށް ހައްލެއް ހޯދުމަށް މަސައްކަތްކުރާ ފަރާތްތަކުގެ މަސައްކަތްތަކަށް ހުރަސް އެޅިގެންދާ ކަމަށް މިނިސްޓްރީން ބުންޏެވެ.
އިސްލާމީ އުއްމަތަށް މުޤައްދަސް މައްސަރެއްކަމަށްވާ ރަމަޟާން މަހު، އަދި ވަކިން ޚާއްސަކޮށް ކޮވިޑް-19 އާ ދެކޮޅަށް މުޅި ދުނިޔެއިން އެކަތިގަނޑެއްގެ ގޮތުގައި މަސައްކަތްކުރަން ޖެހިފައިވާ މިދަނޑިވަޅުގައި މިފަދަ ހަމަލާތަކުގެ ސަބަބުން ނިކުންނަ ނަތީޖާ އެތައް ގުނައެއް ގޯސްވެގެންދާނެ ކަމަށް މިނިސްޓްރީން ބުނެއެވެ.
މިދަނޑިވަޅުގައި ދިވެހިންނާ ދިވެހި ސަރުކާރު، މިސްރުގެ އަޚުވަންތަ ރައްޔިތުންނާ، އެގައުމުގެ ސަރުކާރާއެކުގައި އޮތްކަމުގެ ޔަގީންކަން އަރުވާ ފޮރިން މިނިސްޓްރީން ބުނީ ޓެރަރިޒަމްއާއި ދެކޮޅަށް ދިވެހި ސަރުކާރުން އަބަދުވެސް ތެދުވާނެ ކަމަށެވެ.
