މާލެ ލޮކްޑައުން ކުރުމުގެ ސަބަބުން އެކި ސަބަބުތަކާހުރެ މާލެ ނާދެވިފައިތިބި މީހުންގެ މައުލޫމާތު ހިއްސާކުރުމަށް ހުޅުވާލި ފުރުސަތުގައި 24 ގަޑިއިރު ތެރޭގައި 400ށް ވުރެ ގިނަ މީހުން މައުލޫމާތު ހިއްސާކޮށްފައިވާ ކަމަށް މާލެ ސިޓީ ކައުންސިލުން ބުނެފިއެވެ.

މާލެ ސިޓީ ކައުންސިލުން ބުނީ، މާލޭ ސިޓީގައި ދިރިއުޅޭ ފަރާތްތަކުގެ ތެރެއިން އެކި ބޭނުމަށް ރަށްރަށަށް ދަތުރުކޮށް މާލޭ ސީޓީގެ ލޮކްޑައުންއާ ގުޅިގެން އެނބުރި ނާދެވިފައި ގިނަ ބަޔަކު ތިބި ކަމަށެވެ. އަދި އެމީހުން ގެނައުމުގެ މަސައްކަތްތައް ކުރަމުންދާއިރު، މައުލޫމާތުތައް ކައުންސިލްއާ ހިއްސާކުރުމަށް އެދިފައިވެއެވެ.

މިމަހުގެ 30 ވަނަ ދަވަހު ހުޅުވާލި މިފުރުސަތުގައި 24 ގަޑިއިރު ނުވަނީސް 454 މީހުން މާލެއަށް އައުމަށް އެދި ނަންނޯޓު ކޮށްފައިވާ ކަމަށް ކައުންސިލުން ބުނެއެވެ.

ރަށްރަށުގައި ތާށިވެފައި ތިބި މީހުން 3 މެއި 2020 ވަނަ ދުވަހުގެ 14:00ގެ ކުރިން ކައުންސިލްގެ ނަންބަރު 9955788 އަށް މެސެޖުކޮށް އެ މައުލޫމާތުތައް ހިއްސާކުރުމަށް ވަނީ އެދިފައެއެވެ.

ފުރިހަމަ ނަމާއި، އައިޑީކާޑް ނަމްބަރާއި، ދާއިމީ އެޑްރެސްގެ އިތުރުން، އަތޮޅާއި ރަށް އަދި މިހާރު އުޅޭ އެޑްރެސްގެ މައުލޫމާތު ހިމަނަން ޖެހެއެވެ. އޭގެއިތުރުން، ގުޅޭނެ މޯބައިލް ނަމްބަރަކާއި އީމެއިލްގެ އިތުރުން މާލެއިން ފުރި ތާރީޚުވެސް ހިމަނަން ޖެހޭއިރު، ދަތުރުކުރަން ބޭނުންވާ ސަބަބުވެސް ބަޔާންކުރަން ޖެހެއެވެ.

މާލެ ސިޓީ ލޮކްޑައުން ކުރުމުގެ ސަބަބުން ގިނަ ބަޔަކު ރަށްރަށުގައި ތާށިވެފައި ތިބިއިރު، ރަށްރަށުން އެކި ސަބަބުތަކާހުރެ މާލެ އައިސް މާލޭގައި ތާށިވެފައި ތިބި އެތައް ބަޔަކުވެސް އެބަތިއްބެވެ. އަދި އެ ފަރާތްތަކުގެ މައުލޫމާތު ރަށްރަށުގެ ކައުންސިލުންވެސް ދަނީ ހޯދަމުންނެވެ.