ތަކުރާރުކޮށް ކޮވިޑް-19 ގެ ވާހަކަ ދެއްކުމަކީ މިހާގެ ނަފްސާނީ ދުޅަހެޔޮ ކަމަށް އަސަރުކުރާ ކަމެއް ކަމަށް އައިޖީއެމްއެޗްގެ ނަފްސާނީ ބަލިތަކާއި ބެހޭ ޑރ. އާރިފް މުހައްމަދު ވިދާޅުވެއްޖެއެވެ.

އަންގާރަ ދުވަހު ނެޝަނަލް އިމަރޖެންސީ އޮޕަރޭޝަން ސެންޓަރުގައި ވާހަކަ ދައްކަވަމުން ޑރ. އާރިފް ވިދާޅުވީ، މިހާރު ރާއްޖެ މިއޮތް ހާލަތާއި ގުޅިގެން ނަފްސާނީ ގޮތުން އެތައް ބަޔަކަށް އެކި ގޮތް ގޮތުން އަސަރުކުރަމުންދާ ކަމަށެވެ.

މިދިޔަ އަހަރުގެ އެޕްރީލް މަހާއި އަޅާއި ބަލާއިރު، މި އަހަރުގެ އޭޕްރީލް މަހުގައި ނަފްސާނީ ކަންތައްތަކުގައި ޑޮކްޓަރަކަށް ދެއްކި މީހުންގެ އަދަދު ދެ ގުނައަށް އިތުރުވެގެން ދިޔުމުންވެސް ކޮވިޑް-19 ގެ އަސަރު ނަފްސާނީ ގޮތުން މީހުންނަށް ކޮށްފައިވާކަން ފާހަގަކުރެވިފައިވާ ކަމަށް ޑރ. ވިދާޅުވިއެވެ.

ޝޯޝަލް މީޑިއާއި، ނޫސްކޮންފަރެންސް ތަކުގެ އިތުރުން ޓީވީ ތަކުގައި އަބަދު ކޮވިޑް-19 އާ ގުޅޭ ގޮތުން ވާހަކަ ދެއްކުމަކީ ގިނަ ބަޔަކަށް އޭގެ އަސަރުކުރާ ކަމެއް ކަމަށް އޭނާ ވިދާޅުވިއެވެ.

ޑރ. ވިދާޅުވީ، އެކަންތައްތަކުގެ އަސަރު ކުޑަކުދިންނަށް ވެސް ކުރާ ކަމަށާއި، އޭގެ ތެރޭގައި އެ ކުދިން ހާސްވުންފަދަ ގިނަ ކަންތައްތައް ހިމެނޭ ކަމަށެވެ. އެހެން ކަމުން މައިންބަފައިން އެ ކުދިންނާ ވީހާވެސް ގިނައިން އެ ވާހަކަ ދައްކާ އެ ކުދިންނަށް ހިތްވަރުދީ ކަންތައްތަކުގެ މުހިއްމުކަން އޮޅުން ފިލުވައިދޭން ޖެހޭ ކަމަށް ޑރ. ވަނީ ފާހަގަ ކުރައްވާފައެވެ.

އައިސޮލޭޝަން އަދި ކަރަންޓީނުގައި ބައިތިއްބާފައި ތިބޭ މީހުންނާ ބެހޭ ގޮތުން ސާބިތު ނުހިފޭ ވާހަކަތައް ދެއްކުމަކީ އިތުރު ނަފްސާނީ މައްސަލަތައް ކުރިމަތިކުރުވާ ކަމެއް ކަމަށް ވުމުން އެފަދަ ވާހަކަތައް ނުދެއްކުމަށް ޑރ. ވަނީ އިލްތިމާސް ކުރައްވާފައެވެ.