ކޮވިޑް-19ގެ ބަލިމަޑުކަމުން ރައްކާތެރިވުމަށް އަޅަމުންދާ ފިޔަވަޅުތަކުގެ ދަށުން މާލެ ލޮކްޑައުން ކުރުމުން ޙާލުގައި ޖެހުނު 96 މީހަކަށް މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އިން އެހީތެރިކަން ފޯރުކޮށްދީފިއެވެ.

ބުދަ ދުވަހު ނޭޝަނަލް އެމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ، ޙާލުގައި ޖެހިފައިވާ 96 މީހަކަށް ޖެންޑަރ މިނިސްޓްރީން އެހީތެރިކަން ފޯރުކޮށްދީފައިވާ ކަމަށާއި، އޭގެ ތެރޭގައި ކުލި ނުދެއްކުމުގެ ސަބަބުން ތިބި ތަނުން ނެރިފައިތިބި މީހުން ހިމެނޭ ކަމަށެވެ.

އޭގެ އިތުރުން، ޚާއްސަ އެހީއަށް ބޭނުންވާ މީހުންވެސް އޭގެތެރޭގައި ހިމެނޭކަން ފާހަގަ ކުރައްވައި މަބްރޫކު ވިދާޅުވީ، އެމީހުންނަށް ބޭނުންވާ ފަރުވާގެ އިންތިޒާމް ހަމަޖައްސަވަމުން ގެންދަވާ ކަމަށެވެ. އަދި މިނިސްޓްރީން އެހީތެރިކަން ފޯރުކޮށްދިން ބައެއް މީހުންގެ ތެރޭގައި ޑްރަގްގެ ވަބާގައި ޖެހިފައިވާ ފަރާތްތަކެއްވެސް ހިމެނޭއިރު، އެމީހުން ވަކިތަނަކަށް ގެންގޮސް ރިހެބިލިޓޭޓް ކުރުމުގެ އިންތިޒާމްތައް ހަމަޖައްސަވަމުން ގެންދަވާކަންވެސް މަބްރޫކު ފާހަގަކުރެއްވިއެވެ.

މަބްރޫކު ވިދާޅުވީ، އެއްވެސް ސަބަބަކާހުރެ މަގުމަތިވެ ޙާލުގައި ޖެހޭ ފަރާތެއް ހުރިނަމަ ޖެންޑަރ މިނިސްޓްރީގެ ނަންބަރު 3328393ށް ގުޅައި، އެ މައުލޫމާތު ހިއްސާކުރުމަށް އެދޭ ކަމަށެވެ.

މީގެކުރިން ބޭއްވި ނޫސްވެރިންގެ ބައްދަލުވުމެއްގައި އެސިސްޓެންޓް ކޮމިޝަނަރ އޮފް ޕޮލިސް ޑރ. އަބްދުﷲ ފައިރޫޝް ވިދާޅުވެފައިވަނީ، މާލޭގެ މަގުމަތީގައި އުޅޭ މީހުންގެ ތެރެއިން ފުލުހުންގެ ބެލުމުގެ ދަށަށް ގެންގޮސްފައިވާ ބައެއް ފަރާތްތަކަކީ ވަންނާނެ ތަނެއް ނެތިގެން މަގުމަތީގެ އެތައް ސަރަހައްދަކުން ގެންދެވިފައިވާ މީހުން ކަމަށެވެ.

މާލެ ލޮކްޑައުން ކޮށްފައިވާ މި ދަނޑިވަޅުގައި ކުއްޔަށް އުޅޭ ފަރާތްތަކަށް ކުލި ނުދެއްކުމުގެ ސަބަބުން ގެތަކުން ބޭރުކުރާ މައްސަލަ ވަނީ ބޮޑުވެފައެވެ. އެގޮތުން މާލޭ ސަރަހައްދުގައި ހާލުގައި ޖެހިފައިވާ މީހުންގެ މައްސަލަ ސަރުކާރުގެ ސަމާލުކަމަށް ގެނައުމަށް ބުދަ ދުވަހުގެ މަޖިލިސް ޖަލްސާއަށް ކުއްލި މައްސަލައެއްވެސް ހުށަހަޅާފައިވެއެވެ.