ރާއްޖޭގައި އާއްމުންގެ ތެރެއަށް ކޮވިޑް-19 ފެތުރިފައި މިހާރު އޮތްގޮތަށް ބަލާއިރު މިވައިރަސް އާންމުންގެ ތެރެއަށް ފެތުރެން ދިމާވީ މީހާ (އިންޑެކްސް ކޭސް) ހޯދުމަކީ އުނދަގޫ ކަމެއް ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.

ކޮވިޑް-19ގެ ޓާސްކް ފޯހުގެ ފަރާތުން ބޭއްވި ނޫސްވެރިންގެ ބައްދަލުވުމުގައި އިންޑެކްސް ކޭސް ހޯދުމާއި ގުޅޭގޮތުން ނޫސްވެރިއަކު ކުރި ސުވާލަށް ޖަވާބު ދެއްވަމުން އެޗްޕީއޭގެ ޑޮކްޓަރ އިބްރާހީމް އަފްޒަލް ވިދާޅުވީ ރާއްޖޭގެ ހާލަތު މިހާރު މިއޮތްގޮތަށް ބަލާއިރު އިންޑެކްސް ކޭސް ހޯދުމުގެ ބޭނުމެއް މިހާރު ނެތްކަމަށެވެ. ޑރ އަފްޒަލް ވިދާޅުވީ އިންޑެކްސް ކޭސް ހޯދުމަކީ ކޮންމެ ގައުމެއްގައިވެސް އެންމެ ފުރަތަމަ ކޭސް ފެންނައިރު ކުރާ ކަމެއް ކަމަށާއި އޭގެފަހުން ގިނަ ކޭސްތަކެއް ފެނި ގިނަ ކްލަސްޓަރ ތަކެއް ފެންނަމުންދާއިރު އެހިސާބުން އިންޑެކްސް ކޭސް ހޯދަން ކުރަންޖެހޭ މަސައްކަތާއި އަދި އެކޭސް ފެނުމުން ދެން އަޅަންޖެހޭނެ ފިޔަވަޅުތަކަކުން މާބޮޑު ފައިދާ އެއް އެކަމުން ނުކުރާނެ ކަމަށް ޑރ އަފްޒަލް ވިދާޅުވި އެވެ.

މާލޭގައި ދިރިއުޅޭ މީހެއް ގައިން އެންމެ ފުރަތަމަ ކޮވިޑް-19 ޖެހިފައިވާކަން އެނގިފައިވަނީ މިމަހުގެ 15 ވަނަ ދުވަހު އެވެ. އޭގެ ފަހުން މާލެ ސިޓީ ލޮކްޑައުން ކޮށްފައިވާއިރު ލޮކްޑައުންއަކަށް ދިޔުމާއެކު ޑެލިވަރީގައި ދިމާވި ދަތިތަކުގެ ސަބަބުން ފުރަތަމަ ދެދުވަހު ގިނަ ބަޔަކު މަގުމައްޗަށް ނިކުމެފައިވެ އެވެ. އޭގެފަހުން ފުލުހުން މިހާރު ވަނީ ހުއްދަ ދޫކުރެވިފައިވާ ވަކި ބަޔަކަށް ނޫނީ މަގުމައްޗަށް ނިކުމެ ނޫޅެވޭގޮތަށް ސިސްޓަމް އެކުލަވާލާފައެވެ.

ބުދަ ދުވަހުގެ މެންދުރާ ހަމައަށް އާއިރު ރާއްޖެއިން މިވައިރަސް އަށް ޕޮޒިޓިވްވެފައިވާ 86 މީހަކު ފެނިފައިވާއިރު މާލެ ސިޓީން މިވައިރަސް އަށް ޕޮޒިޓިވްވެފައިވާ މީހުންގެ އަދަދު ވަނީ 66 ށް ވަނީ އަރާފަ އެވެ.