ކޮވިޑް-19އާ ގުޅިގެން މާލެ ސަރަޙައްދު ލޮކްޑައުންކޮށްފައިވާ މި މުއްދަތުގެ ތެރޭގައިވެސް އެއްވެސް ބާވަތެއްގެ ގެވެށި އަނިޔާގެ މައްސަލައެއް ފެންމަތިވެއްޖެނަމަ ލަސްނުކޮށް ރިޕޯޓް ކުރުމަށް މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއިން އެދިއްޖެއެވެ.

ހޯމަ ދުވަހުގެރޭ ރާއްޖެޓީވީން ކުރިއަށް ގެންދިޔަ ކޮވިޑް-19 ކަވަރޭޖަށް ދެއްވި ޚާއްސަ އިންޓަވިއުއެއްގައި ޖެންޑަރ މިނިސްޓްރީގެ ޑެޕިއުޓީ މިނިސްޓަރ ފާތިމަތު ޔުމްނާ ވިދާޅުވީ، މިނިސްޓްރީގެ ހެލްޕްލައިން މެދުވެރިކޮށް ކޮވިޑް-19 އާ ގުޅިގެން މީހުންނަށް ކުރިމަތިވާ ދަތިތައް ދެނެގަތުމަށް މަސައްކަތް ކުރަމުންދާ ކަމަށެވެ. އެގޮތުން ކުލި ދެއްކުމާއި، ބޭސްފަރުވާ ހޯދުމުގައި ދިމާވާ އެކި ދަތިތަކާއި، ނަފްސާނީ ދުޅަހެޔޮކަމާ ގުޅޭ މައްސަލަތައް ފާހަގަކުރެވިފައިވާކަމަށް ވިދާޅުވިއެވެ.

އޭގެއިތުރުން، ލޮކްޑައުންގެ މި މުއްދަތުގައިވެސް ގެވެށި އަނިޔާފަދަ މައްސަލަތައް ރިޕޯޓް ކުރެވެމުންދާކަން ފާހަގަކުރައްވައި ޔުމްނާ ވިދާޅުވީ، ވޭތުވެދިޔަ މަސްތަކާ އަޅާބަލާއިރު، އެފަދަ މައްސަލަތައް ކުރިއަށްވުރެ އިތުރުވެފައިވާކަން އަދި ފާހަގަކުރެވިފައިނުވާ ކަމަށެވެ. އަދި އެފަދަ ކަމެއް ހިނގާކަން އެނގޭނަމަ އެކަން ރިޕޯޓް ކުރުމަށް އެދިވަޑައިގަންނަވާ ކަމަށް އޭނާ ވިދާޅުވިއެވެ.

ޔުމްނާ އެހެން ވިދާޅުވެފައިވާއިރު، ލޮކްޑައުންއާ ގުޅިގެން ގޭގައި ތިބެންޖެހޭ ވަގުތު އިތުރުވުމާއެކު ގެވެށި އަނިޔާފަދަ މައްސަލަތައް ބައެއް ޤައުމުތަކުގައި ގިނަވި ނަމަވެސް ރާއްޖެއިން އެފަދަ ޙާލަތެއް މިހާތަނަށް ފާހަގަ ވެފައިނުވާކަން ހޯމަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ކޮވިޑް-19 ގެ ޓާސްކްފޯސްގެ ތަރުޖަމާނު މަބްރޫކު އަޒީޒްވެސް ވިދާޅުވެފައިވެއެވެ.

ޔުމްނާ އިތުރަށް ވިދާޅުވީ، ފުލުހުންނާއި މޯލްޑިވްސް ރެޑް ކްރެސެންޓުގެ އެހީގައި ބޯހިޔާވަހިކަން ނެތް ފަރާތްތަކާއި އަސާސީ ޚިދުމަތް ނުލިބޭ ފަރާތްތަކަށް އެހީތެރިވެދިނުމުގެ ގޮތުންވެސް މިނިސްޓްރީން މަސައްކަތްތަކެއް ކުރަމުންދާ ކަމަށެވެ. އަދި އެކަންކަން ކުރުމުގައި މިނިސްޓްރީގެ މުވައްޒަފުންގެ ސަލާމަތާއި ރައްކާތެރިކަން ކަށަވަރު ކުރުމަށް ކުރަންޖެހޭ ކަންކަންވެސް ކުރަމުންދާނެ ކަން އޭނާ ފާހަގަކުރެއްވިއެވެ. އެގޮތުން މުވައްޒަފުން ގޭގެއަށް ޒިޔާރަތް ކުރައިރުވެސް ރައްކާތެރިކަން ކަށަވަރު ކުރުމާއި، މައްސަލަތަކާއި ގުޅިގެން ގޭގެއަށް ޒިޔާރަތް ކުރަންޖެހޭ ޙާލަތްތަކުގައިވެސް އެ ގެއަކީ އެޗްޕީއޭގެ ފަރާތުން މޮނިޓަރ ކުރަމުންދާ ގެއެއްތޯ ބަލަމުންދާނެކަމަށް ވިދާޅުވިއެވެ.

އޭގެއިތުރުން، ކޮންމެހެން ދާންޖެހޭ ޙާލަތްތަކުގައިވެސް ބޭނުންކުރަންޖެހޭ ރައްކާތެރިކަމުގެ ވަސީލަތްތައް ބޭނުންކުރައްވާނެ ކަން ޔުމްނާ ފާހަގަކުރެއްވިއެވެ.