މިހާރު މުޅި ދުނިޔެއަށް އަދި ރާއްޖެއަށްވެސް ކުރިމަތިވެގެން މިއުޅޭ ކޮވިޑް-19 ކަންތަކުގައި ދިވެހި ރައްޔިތުން ވީހާވެސް ބޮޑަށް އެއްބައިވަންތަވެ ސިއްހީ މާހިރުން ދެއްވާ ލަފަޔާ އެއްގޮތަށް ޢަމަލުކުރުމަށް ރައްޔިތުންނަށް ކުރީގެ ރައީސް އަލްއުސްތާޛު މައުމޫން އަބްދުލްޣައްޔޫމް އިލްތިމާސްކުރައްވައިފި އެވެ.
ރާއްޖެޓީވީން ކޮވިޑް-19 އާ ގުޅިގެން ކުރިޔަށް ގެންދާ ޚާއްސަ ކަވަރޭޖަށް ދެއްވި އިންޓަރވިއުގައި ރައީސް މައުމޫން ވިދާޅުވީ ދިވެހިންނަށް ދިމާވި މިފަދަ އުނދަގޫ ކޮންމެ ހާލަތެއްގައިވެސް ވަރަށް ބޮޑަށް ގައުމީ ރޫހެއްގައި އެއްބާރުލުން ދީގެން ގައުމަށްޓަކައި މަސައްކަތްކޮށްފައިވާ ކަމަށެވެ. އެގޮތުން ކޮރެލާ އާއި ޝިގެއްލާ އަދި ސުނާމީ ކާރިސާގެ ހާލަތުގައި ދިވެހިން ދައްކުވައިދީފައިވާ އެއްބައިވަންތަކަށް ރައީސް މައުމޫން ފާހަގަކުރެއްވި އެވެ. އެހެންކަމުން މިހާރުވެސް ދިމާވެފައިމިވާ ދަތި އުނދަގޫ ދުވަސްތަކުން ސަލާމަތްވެވޭނީ އަދި މިކަމުން ސަލާމަތްވުމަށް މިކުރާ މަސައްކަތުގައި ފައިދާ ވާނީ އެންމެން ގުޅިގެން މަސައްކަތްކޮށްގެން ކަމަށް ރައީސް މައުމޫން ވިދާޅުވި އެވެ.
މިކަންކަން ދިމާވީމާ ދިވެހި ރައްޔިތުން ކެތްކުރަން ޖެހޭކަމަށާއި ހިތްވަރުކޮށް މާތް ﷲ އަށް ވަކީލުކުރަން ޖެހޭ ކަމަށް ރައީސް މައުމޫން ވިދާޅުވި އެވެ. އަދި މީގައި އެންމެ މުހިންމު ކަމަކީ ސިއްހީ މާޙިރުން ދެއްވާ ލަފާ އެންމެންވެސް ގަބޫލުކޮށް އެގޮތަށް އަމަލުކުރުން ކަމަށް ރައީސް މައުމޫން ވިދާޅުވި އެވެ.
މިހާރު މިއޮތީ އަންގާފައި އެއްގޮތަކަށްވެސް ގެއިން ބޭރަށް ނުނިކުންނާށޭ. އެހެންވީމާ އަޅުގަނޑުމެން އެބަޖެހޭ ހަމަ ކޮންމެ މީހަކުވެސް ގޭގައި މަޑުކުރަން. ޒަރޫރީ ހާލަތްފިޔަވައި ގެއިން އެއްގޮތަކަށްވެސް ނުނިކުންނަން. އަދި ވިދާޅުވަނީ ގެއިން ބޭރަށް ނިކުމެ އުޅޭއިރުވެސް ބަޔަކާއި ދިމާވިއްޖިއްޔާ ފިޒިކަލް ޑިސްޓެންސް ގެންގުޅުމަށް. ދުރުމިން ހިފަހައްޓާށޭ. އެއީ ގައިން ގަޔަށް އެބަލި އަރާފާނެތީ ތަންކޮޅެއް ދުރުގައި ތިބޭށޭ. ހަމަގެއަށް އައިސް އަތްދޮވެ ތިމާ ދިރިއުޅޭ ތަނާއި ހެދުމާއި ތަން ހުންނަންޖެހޭނީ ހަމަ ވަރަށް ސާފުތާހިރުކޮށް. މިއީ އިސްލާމްދީނުގައިވެސް އަންގަވާފައި އޮތްގޮތް. އެހެންވީމާ އަޅުގަނޑުމެން އެންމެން މިގޮތަށް ކަންތައް ކޮށްފިއްޔާ އިރާދަކުރެއްވިއްޔާ ލަހެއް ނުވެ މިކަމުން އަރައިގަނެވޭނެ.ކުރީގެ ރައީސް އަލްއުސްތާޛު މައުމޫން އަބްދުލްޣައްޔޫމް
ރައީސް މައުމޫން އިތުރަށް ވިދާޅުވީ ރާއްޖޭގައި މިހާރު މިއޮތް ހާލަތު މިއޮތީ މިކަމުން ރައްކާތެރިވުމަށް ސަރުކާރުން އަޅާފައިވާ ފިޔަވަޅުތަކުގެ ސަބަބުން ކަމަށެވެ. އެހެން ނޫންކަމަށްވާނަމަ މިއަށްވުރެވެސް ހާލަތު ގޯސްވާނެކަމަށް ރައީސް މައުމޫން ވިދާޅުވި އެވެ.
މިކަމުގައި އަޅުގަނޑުމެންނެއް ނޫން ބަސްކިޔާނީ. މިކަމުގެ މާހިރުން. އެއީ ސިއްހީ މާހިރުންނާއި މިކަން ކުރައްވަން ތިއްބެވި ބޭފުޅުން. އެބޭފުޅުންނަށް އެނގިވަޑައިގަންނަވާނީ . އަދި ޑަބްލިޔުއެޗްއޯ އާއި ހުރިހާ ފަރާތްތަކުގެ އިރުޝާދާއެކު އެބޭފުޅުން ރާއްޖޭގެ ހާލަތަށް ވިސްނަވާފައި ދިރާސާކުރައްވާފައި ރާއްޖެއަށް އެންމެ އެކަށީގެންވާ ގޮތުގައި ފިޔަވަޅު އެޅުމަށް އަންގަވަނީ. އެހެންވީމާ އެއަށް އަޅުގަނޑުމެން ޖެހޭނެ ތަބާވާން. އެއަކާއެއްގޮތަކަށްވެސް ދެކޮޅު ހަދައިގެން ނުވާނެ. ވަކި މީހަކަށް އެއަށް ގޮތެއް ނުހެދޭނެ. އެކަމަށް އިތުރު ގޮތްތަކެއް ނުހެދޭނެ.ކުރީގެ ރައީސް އަލްއުސްތާޛު މައުމޫން އަބްދުލްޣައްޔޫމް
ރައީސް މައުމޫންގެ ވާހަކަފުޅުގައި ވަނީ އެކަކު އަނެކަކަށް އެހީތެރިވެ ގައުމީ ރޫހެއްގައި ގުޅިގެން މަސައްކަތް ކުރުމަށް ހުރިހާ ރައްޔިތުންގެ ކިބައިން އެދިވަޑައިގަންނަވާފަ އެވެ.
