ޒަރޫރީ ބޭނުންތަކުގައި ބޭރަށް ނިކުމެ އެއް ވަގުތެއްގައި މާލޭ މަގުމަތީގައި އުޅޭނީ، 625 ކަމަށް ފުލުހުން ބުނެފިއެވެ.

އާދިއްތަ ދުވަހު ނެޝަނަލް އެމެޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނަރ އޮފް ޕޮލިސް (އޭސީޕީ) އަބްދުﷲ ފައިރޫޝް ވިދާޅުވީ، ޒަރޫރީ ބޭނުންތަކުގައި ބޭރަށްދާ މީހުންނަށް ފުލުހުން ގާއިމްކޮށްފައިވާ ޕޯޓަލްއާ ގުޅޭ މައުލޫމާތު ބައެއް ފަރާތްތަކަށް ނޭގުމުގެ އިތުރުން އޮޅުން އަރާ ބައެއް ކަންތައްތައް ހުރުމުން ފުލުހުންނަށް ފޯންކޯލްތައް ލިބެމުންދާ ކަމަށެވެ. ފައިރޫޝް ވިދާޅުވީ، ވެބް ޕޯޓަލަށް އަށް ބަދަލެއް ގެނެސްފައިނުވާ ކަމަށާއި، ނަމަވެސް އަމަލު ކުރަމުން ދިޔަ ގޮތަށް ބަދަލުތަކެއް ގެނެސްފައިވާ ކަމަށެވެ.

އެ ވެބްޕޯޓަލް މެދުވެރިކޮށް އެމީހަކު ދިރިއުޅޭ ތަނާއި، މީހާއާ ގުޅޭ މައުލޫމަތު ފުރިހަމަ ކުރުމުން އެ މީހާއަށް ހުއްދަ ލިބިގެންދާނެ ކަމަށެވެ. ސޮޮފްޓްވެއަރ އަށް ގެނެވުނު ބަދަލުތަކާއި އެކު އޮޓޮމެޓިކް ''އަލްގެރިތަމް'' އަކުން އޮޓޮމެޓިކުން ބަދަލުތަކެއް ގެެނެވިގެން ދާނެ ކަމަށާއި، އެ ބަދަލުތަކާއި އެކު މަގުމައްޗަށް މީހުން ނިކުންނައިރު ވީހާވެސް ބޮޑަކަށް އެއް ފަހަރަކާ ގިނަ މީހުންނަށް ނުނިކުމެވޭ ގޮތަށް ކަންތައްތައް ކުރިޔަށް ގެންދާނެ ކަމަށް ވިދާޅުވިއެވެ.

ވެބްޕޯޓަލުގެ މަސައްކަތް ފެށިއިރު ސިސްޓަމަށް ގިނަ ކޯލްތަކެއް އައިސްފައިވާކަން ފާހަގަ ކުރައްވަމުން އޭސީޕީ ވިދާޅުވީ، ފޯމް ފުރަން ނޭނގޭ ފަރާތްތަކަށް މާ ބޮޑު އިސްކަމެއް ކުރިން ދީފައި ނެތުމުން އެއް ގެނެވިފައި ނެތުމުން ބައެއް ފަރާތްތަކަށް އޮޅުން އަރާފައިވާ ކަމަށެވެ. ފޯމް ފުރެން ނެތް ފަރާތްތަކުން ފުލުހުންގެ ނަންބަރާ ގުޅުމުން އެ ފަރާތްތަކުގެ ގެތަކަށް ފުލުހުންގެ އޮފިސަރުން ގޮސް އެހީތެރިކަން ފޯރުކޮށް ދޭނެއެވެ.

މިހާރު ފޯމް ޑިޒައިން ކޮށްފައިވަނީ ވިޔަފާރި ކުރަންދާ ފަރާތްތަކަށާއި ސިއްހީ ކަންތައްތަކުގައި އާއި ޑިއުޓީ ތަކަށް ކޮންމެހެން ބޭރަށްދާން ޖެހޭ ފަރާތްތަކަށެވެ.

އެ ޕްރެސްކޮންފަރެންސް ގައި ވާހަކަ ދައްކަވަމުން ޑެޕިއުޓީ ކޮމިޝަނަރ އޮފް ޕޮލިސް އަބްދުލް މަންނާނު ޔޫސުފް ވިދާޅުވީ، މި ބަދަލުތަކާއި އެކު ޒަރޫރީ އެހެން ބޭނުމެއްގައި މީހުން ނިކުންނަ ޖެހިއްޖެނަމަ ފުލުހުންނާ ގުޅައިގެން އެކަންތައް ހަމަޖެހޭނެ ކަމަށެވެ. ރާއްޖެ.އެމްވީ ކުރި ސުވާލަކަށް ޖަވާބު ދެއްވަމުން މަންނާނު ވިދާޅުވީ، ދޫކުރާ ފާސްތަކާއި އެކު މާލޭގެ މަގުމަތީގައި އެއް ވަގުތެއްގައި އުޅޭނީ 625 ހާ މީހުން އުޅޭ މީހުން ކަމަށެވެ. އެކަމަކު އެ މީހުން ނިކުމެ އުޅޭނީ އެއް ތަނެއްގައި ނޫންކަން އޭނާ ފާހަގަކުރެއްވިއެވެ.