ކުރިއަށް ދުވަސްތަކުގައި ކޮވިޑް-19 ގެ ކޭސްތައް މަދުކުރުމަކީ ރައްޔިތުންގެ އަތްމަތީގައި އޮތް ކަމެއް ކަމަށް ޑރ. ނަޒްލާ ރަފީގް ވިދާޅުވެއްޖެ އެވެ.
ހުކުރު ދުވަހުގެ ރޭ ނެޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ ކުރިއަށް ދުވަސްތަކުގައި ކޮވިޑް-19 ގެ ކޭސްތައް މަދުކުރުމަކީ ރައްޔިތުންގެ އަތްމަތީގައި އޮތް ކަމެއް ކަމަށެވެ.
ކުރިއަށް އޮތް 14 ދުވަސްތެރޭގައި 19000 ކޭސްތޯ ނޫނީ 29 ކޭސްތޯ ފެންނާނީ މި ތަފާތު ގެނައުން މިއޮތީ ތިބޭފުޅުންގެ އަތްމަތީގައި. އެހެންވީމަ އަޅުގަނޑުމެންގެ މިހާރު މި ނަގާފައި ހުރި ފިޔަވަޅުތަކަށް ހަމަ ހުރިހާ ބޭފުޅުންވެސް އެއްބާރުލުން ދެއްވުން ވަރަށް ވަރަށް މުހިއްމު.ޑރ ނަޒްލާ ރަފީގް
ޑރ ވިދާޅުވީ މާލެ ލޮކްޑައުންކޮށްފައިވާއިރު މަގުމައްޗަށް ނުނިކުތުމަށާއި އެއް އިމާާރާތެއްގައި އުޅޭ މީހުންވެސް އެއްތަން ނުވުމަކީ މުހިއްމު ކަމެއް ކަމަށެވެ. މި ދަނޑިވަޅުގައި އެއްބަޔަކު އަނެއްބަޔަކާއި ދިމާވެ މަސްހުނިވުމަކީ ބަލި ފެތުރުމުގެ ފުރުސަތު ބޮޑުވާނެކަމެއް ކަމަށް ޑރ. ނަޒްލާ ވިދާޅުވި އެވެ.
ކުރިންވެސް ވިދާޅުވަމުންގެންދެވީ މާލޭގައި ކޮވިޑް-19 ގެ ކޭސްއެއް އުޅެފާނެތީ ގޭގައި މަޑުކުރުމަށްކަން ފާހަގަކުރައްވާ ޑރ، ނަޒްލާ ވިދާޅުވީ މިހާރު މާލެ އިން ކޮވިޑް-19 ގެ ކޭސްތަކެއް ފެނިފައިވީނަމަވެސް ކުރެވޭނެ އެންމެ ރައްކާތެރިކަމަކީ ގޭގައި މަޑުކުރުން ކަމަށެވެ.
ކޮންޓެކްޓް ޓްރޭސިންގގެ ތެރޭގައި ގިނަ މީހުން އެއްވާ ކަހަލަ ހަރަކާތްތަކަށް ގޮސްފައިވާކަމަކީ ހިތާމަކުރަންޖެހޭ ކަމެއް ކަމަށެވެ. އަދި އަތޮޅު ތެރޭގައި ލޮކްޑައުންގެ ހާލަތުގައި ނެތް ނަމަވެސް، ގޭގައި މަޑުކޮށްލެއްވުމަށް އިލްތިމާސްކުރެއްވި އެވެ.
މިހާތަނަށް ރާއްޖެއިން ކޮވިޑް-19 ގެ 29 ކޭސްއެއް ފެނިފައިވެ އެވެ. އޭގެ ތެރެއިން 9 ކޭސް ފެނިފައިވަނީ މާލެއިންނެވެ.
