ހުކުރު ދުވަހު މާލެއިން ކޮވިޑް-19 އަށް ޕޮޒިޓިވްވި މީހުންގެ ތެރެއިން ދެ ކޭސްއަކީ އެންމެ ފުރަތަމަ މާލެއިން ޕޮޒިޓިވްވި މީހާއާ ގުޅުން ނެތް ކޭސްތަކެއް ކަން ހާމަވެއްޖެ އެވެ.

ހުކުރު ދުވަހު އޮންލައިންކޮށް ކުރިޔަށް ގެންދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުން ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ މެޑިކަލް އޮފިސަރު ޑރ. ނަޒްލާ ރަފީޤް ވިދާޅުވީ، އެ ދެމީހުންނަކީ ރޯގާގެ އަލާމާތްތައް ހުރެގެން ފްލޫ ކްލިނިކަށް ދެއްކި ދެ މީހުން ކަމަށެވެ.

އެ ދެމީހުންނަސް ބަލި އެރިގޮތް ހޯދުމުގެ މަސައްކަތް އެޗްޕީއޭއިން ދަނީ ކުރަމުންނެވެ.

ޑރ. ނަޒްލާ ވިދާޅުވީ، އެމީހުންގެ ތެރެއިން ބައެއް މީހުން ގައިން ކޮވިޑް-19 އަށް ޝައްކުވާ އަލާމާތްތަކެއް ފެނިގެން އެ މީހުންގެ ސާމްޕަލް ނަގައި ޓެސްޓު ކުރުމުގެ މަސައްކަތުގެ އިތުރުން ކޮންޓެކްޓް ޓްރޭސިންގެ މަސައްކަތްވެސް ކުރިޔަށްދާ ކަމަށެވެ. ޑރ. ވަނީ، ކޭސްތަކާއި ގުޅިގެން ވާހަކަ ދައްކާ ފަރާތްތަކުން ވީހާސްވެސް ބޮޑަށް ތެދު މައުލޫމާތު ދިނުމަށް އިލްތިމާސް ކުރައްވާފަ އެވެ.