ކޮވިޑް-19 އާ ގުޅިގެން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ މުވައްޒަފުންގެ ސަލާމަތާއި ރައްކާތެރިކަމަށްޓަކައި އަޅަންޖެހޭ ފިޔަވަޅުތައް އަޅާފައިވާ ކަމަށް އެ ކުންފުނީގެ ސީއީއޯ އާދަމް އާޒިމް ވިދާޅުވެއްޖެއެވެ.

ފޯނު މެދުވެރިކޮށް ރާއްޖެޓީވީއާ ވާހަކަދައްކަވަމުން އާޒިމް ވިދާޅުވީ، ކޮވިޑް-19 އާ ގުޅިގެން ކުރިޔަށް ގެންދާ އޮޕަރޭޝަންގައި އެމްޓީސީސީގެ މުވައްޒަފުން ޝާމިލްވުން ބޮޑު ކަމަށެވެ. އެގޮތުން ފުލުހުންގެ އަދި އެމްއެންޑީއެފްގެ ބޭނޫންތަކަށް އުޅަނދުތައް ދޫކޮށްފައިވާ ކަމަށާއި، އެ އުޅަނދުތަކުގައިވެސް ތިބޭނީ އެމްޓީސީސީގެ މުވައްޒަފުން ކަމަށް ވިދާޅުވިއެވެ.

އާޒިމް ވިދާޅުވީ، އެންމެ އިސްްކަމެއް ދެއްވަނީ މުވައްޒަފުންގެ ސަލާމަތާއި ރައްކާތެރިކަމަށްޓަކައި ކަަމަށެވެ. އެގޮތުން ރައްކާތެރިކަމުގެގޮތުން ބޭނުންވާނެ ޕްރޮޓެކްޓިވް އިކުއުޕްމެންޓްވެސް ތައްޔާރަށް ހުންނާނެ ކަމަށާއި، އެމްއެންޑީއެފްގެ ފަރާތުން މުވައްޒަފުންނަށް ތަމްރީނު ލިބިފައިވާ ކަމަށެވެ.

އޭނާ ވިދާޅުވީ، ލޮކްޑައުން ކުރުމާއި ގުޅިގެން ފެރީގެ ހިދުމަތްތައް ހުއްޓާލިޔަސް ކުއްލި ހާލަތެއްގައި ވިލިމާލެ އަށް ދާން ބޭނުންވާ، ސިއްހީ ދާއިރާގައި މަސައްކަތްކުރާ ޑޮކްޓަރުންގެ އަދި ނަރުހުންނަށް ދެވެނޭ އިންތިޒާމް ހަމަޖައްސާފައިވާ ކަމަށެވެ.

ހުސްވި މާޗް މަހު އެމްޓީސީސީން ކޮށްފައިވާ ދަތުރުތަކުގެ ތަފާސް ހިސާބުތަކަށް ބަލާއިރު، ގްރޭޓާ މާލެ ސަރަހައްދުގައި 8،866 ދަތުރު ކޮށްފައިވާއިރު، އެ ދަތުރުތަކުގައި 490،600 މީހުން ވަނީ އުފުލާފައެވެ.