މި ބައްޔަށް ވެކްސިން އެއް ފަރުވާ އެއް ހޯދިފައި ނުވާއިރު، އެޅެން އޮތް މުހިއްމު ފިޔަވަޅަކީ ގޭގައި ތިބުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
މާލެއިން ކޮވިޑް-19 އަށް ޕޮޒިޓިވްވެފައިވާ މީހަކު ފެނުމާ ގުޅިގެން ގައުމާ މުހާތަބު ކުރައްވާ ދެއްކެވި ވާހަކަފުޅުގައި ރައީސް ވަނީ މި ދަނޑިވަޅުގައި ދިމާވެދާނެ ދަތިތަކަށް ރައްޔިތުންގެ ކިބައިން މައާފަށް އެދިފަ އެވެ. ނަމަވެސް، މިއީ އެންމެންގެ ސަލާމަތާ ރައްކާތެރިކަމަށްޓަކާ އެޅުނު ފިޔަވަޅެއް ކަމަށް ވިދާޅުވެ، މިކަމުގައި އެއްބާރުލުން ދިނުމަށް ރައީސް ވަނީ އެދިވަޑައިގެންފަ އެވެ.
ރައީސްގެ ހިތާބުގައި ވަނީ ޕޮޒިޓިވްވީ މީހާއާ ގުޅިގެން ބައެއް މައުލޫމާތުތައް ހިއްސާކޮށްފަ އެވެ. އެގޮތުން އޭނާ ޓެސްޓުކުރެވުނީ އަންގާރަ ދުވަހު ކަމަށާއި، ޕޮޒިޓިވްވީ ކަމުގެ މައުލޫމާތު އެ މަނިކުފާނަށް ލިބިވަޑައިގެންނެވީ މިއަދު (ބުދަ ދުވަހު) ކަމަށް ވިދާޅުވިއެވެ. އަދި މިހާތަނަށް އޭނާއާ ޑައިރެކްޓް ކޮންޓެކްޓް ވެފައިވާ 11 މީހެއްގެ ސާމްޕަލްތައް ނެގިފައިވާ ކަން ހާމަކުރެއްވިއެވެ.
އޭގެ އިތުރުން، ކާބޯތަކެއްޗާއި ބޭހާއި ޒަރޫރީ ކަންކަމުގައި ބޭނުންވާ ތަކެތީގެ ސްޓޮކްހުރި ކަމުގެ ޔަގީންކަން ރައީސް އެރުވި އެވެ. އަދި ޒަރޫރީ އެހެން ބޭނުންތައް ފުއްދޭނެ އިންތިޒާމްތައް ކަމާބެހޭ އިދާރާތަކުން ހަމަޖައްސާފައިވާ ކަމަށް ވިދާޅުވި އެވެ.
ރައީސް ވަނީ ސިއްހީ މާހިރުން ދެއްވާ ލަފަޔާ އިރުޝާދަށް ބޯލެނބުމަށް އެންމެހާ ރައްޔިތުންގެ ކިބައިން ވަރަށް އަސަރާއެކު އެދިވަޑައިގެންފަ އެވެ. އަދި މި ކަމުގައި މަސައްކަތްކުރައްވާ ހުރިހާ ސިއްހީ މަސައްކަތްތެރިންނަށް ޝުކުރު އަދާކުރެއްވި އެވެ. ރައީސް ގެ ވާހަކަފުޅު ނިންމަވާލެއްވީ މި ވަބާއިން ދިވެހިރާއްޖެ ސަލާމަތް ކުރުމަށް މާތް ﷲ ގެ ހަޒްރަތުގައި ދުއާ ދަންނަވަމުންނެވެ.
