ކޮވިޑް-19 އާއި ގުޅިގެން ރާއްޖެއިން ރައްކާތެރިވުމުގެ ގޮތުން އެއްވެސް ފިޔަވަޅެއް ނާޅައިފިނަމަ ރާއްޖެއިން 10،891 މީހުން މަރުވާނެކަމަށް ބެލެވޭ ކަމަށް އެޗްޕީއޭއިން ރާއްޖޭގެ ޙާލަތާ ގުޅޭގޮތުން ތައްޔާރުކޮށްފައިވާ ރިޕޯޓުގައި ބުނެފިއެވެ.

ކޮވިޑް-19 އެމަރޖެންސީ ރެސްޕޮންސްގެ މައްޗަށް ބިނާކޮށް ތައްޔާރުކޮށްފައިވާ ރިޕޯޓް އަންގާރަ ދުވަހު މީޑިއާތަކާ ހިއްސާކޮށްފައިވާއިރު، އެ ރިޕޯޓްގައިވާގޮތުން ކޮވިޑް-19 އިން ރައްކާތެރިވުމަށް ރާއްޖެއިން އެއްވެސް ފިޔަވަޅެއް ނާޅައިފިނަމަ 10،891 މީހުން މަރުވާނެކަމަށް ބެލެވޭ ކަމަށް ބަޔާންކޮށްފައިވެއެވެ. އަދި "ފުލް ލޮކްޑައުން" އަކަށް ގޮސްފިނަމަ މަރުވާނެ ކަމަށް ބެލެވެނީ އެންމެ 4 މީހުން ކަމަށް ރިޕޯޓްގައި ބުނެފައިވެއެވެ.

އެކަމާ ގުޅޭގޮތުން އަންގާރަ ދުވަހުގެރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ޑރ ނަޒްލާ ވިދާޅުވީ، ރާއްޖޭގައި މުޖުތަމައުގެ ތެރޭގައި ބަލި ފެތުރިއްޖެނަމަ ޖުމުލަކޮށް މާލެ ސަރަޙައްދުން 46،627 އަށްވުރެ ގިނަ މީހުންނަށް ބަލި ޖެހޭނެ ކަމަށް ލަފާ ކުރެވޭ ކަމަށެވެ. އަދި އަތޮޅުތަކުން 51،874 މީހުން ބައްޔަށް ޕޮޒިޓިވްވާނެކަމަށް ބެލެވޭއިރު، ޖުމްލަ 98،501 މީހުންނަށް ކޮވިޑް-19 ޖެހެނޭކަމަށް ބެލެވެއެވެ. އެގޮތުން އެއްވެސް ފިޔަވަޅެއް ނާޅައިފި ނަމަ ގާތްގަނޑަކަށް ދުވާލެއްގެ މައްޗަށް އިތުރަށް އެތައް އަދަދަކަށް ވައިރަސްއަށް މީހުން ޕޮޒިޓިވްވާނެ ކަަމަށެވެ. އަދި 47 ދުވަސް ތެރޭގައި ޕީކްއަށް ދާނެ ކަމަށް ބެލެވޭ ކަމަށް ޑރ ވިދާޅުވިއެވެ.

ނަމަވެސް މިހާރާއި ލައިގެން ރައްކާތެރިކަމުގެ ފިޔަވަޅު އަޅައި އެއަށް އަމަލުކޮށްފިނަމަ، މި އަދަދު މަދު ކުރެވޭނެ ކަަމަށާއި، އެންމެ ޕީކަށްދާ ދުވަހުގަގއިވެސް ބަލި ޖެހޭނީ 2000 އެއްހާ މީހުންނަށް ކަމަށް ޑރ ވިދާޅުވިއެވެ. އަދި ބަލި ކޮންޓްރޯލް ކުރުމަށް މިހާރު އަޅާފައިވާ ފިޔަވަޅުތައްވެސް އިތުރަށް ވަރުގަދަ ކުރައްވާނެ ކަމަށް ޑރ ވިދާޅުވިއެވެ.

ރިޕޯޓްގައި ބަޔާންކޮށްފައިވާގޮތުން ވައިރަސް ފެތުރުން ކޮންޓްރޯލް ކުރުމަށް ގިނަ ފިޔަވަޅުތަކެއް އަޅަންޖެހޭއިރު، ޚާއްސަކޮށް މާލެފަދަ އާބާދީ ބޮޑު ސަރަޙައްދުތަކަށް އިސްކަންދޭންޖެހެއެވެ. އަދި ހޮސްޕިޓަލުތަކުގެ ތޮއްޖެހުން މަދުކޮށް، ވައިރަސް ފެތުރުން ކޮންޓްރޯލް ކުރުމަށް ފިޔަވަޅުތަކެއް އަޅަން ޖެހެއެވެ. އެކަން ޑރ ނަޒްލާގެ ވާހަކަފުޅުގައިވެސް ފާހަގަކުރެއްވިއެވެ.

ރިޕޯޓާ ޙަވާލާދީ ޑރ ނަޒްލާ އިތުރަށް ވިދާޅުވީ، ބަލި ކޮންޓްރޯލް ކުރުމަށް އެކަށީގެންވާ ފިޔަވަޅު ނޭޅިއްޖެނަމަ އެންމެ ޕީކްގައި 13000 މީހުން އެއްދުވަހާ ހޮސްޕިޓަލަށް ގެންދެވޭނެ ކަމަަށެވެ. ނަމަވެސް ހަރުކަށި ފިޔަވަޅު އަޅައިފިނަމަ ބަލި ފެތުރިއްޖެ ޙާލަތެއްގައިވެސް އެންމެ ގިނައިން ފަރުވާދޭން ޖެހޭނީ 300 އެއްހާ މީހުންނަށް ކަމަށް ޑރ ވިދާޅުވިއެވެ. އަދި އައިސީޔޫގައި ފަރުވާދޭން ޖެހޭ މީހުންވެސް މި ދެ ޙާލަތުގައި 400 އިން 100 އަށް މަދު ކުރެވޭނެ ކަމަށް ޑރ ވިދާޅުވިއެވެ.

އޭގެއިތުރުން، އުމުރުފުރާއަށް ބަލާއިރު، ވައިރަސްގެ ނުރައްކާ ރާއްޖޭގައި އެންމެ ބޮޑީ އުމުރުން ދުވަސްވީ މީހުންނަށްކަމަށް ބަޔާންކޮށްފައިވާއިރު، ސިވިއަރ ހާލަތެއްގައި އުމުރުން ދުވަސްވީ މީހުންގެ ތެރެއިން 60 އަހަރުން މަތީގެ މީހުންގެ 35 އިންސައްތަ މީހުން މަރުވުމުގެ ފުރުސަތު އެބައޮތެވެ. އަދި އެފަދަ ޙާލަތެއްގައިވެސް 1403 މީހަކު މަރުވާނެ ކަމަށް ބެލެވޭކަމަށް ރިޕޯޓްގައި ބަޔާންކޮށްފައިވެއެވެ.