ކޮވިޑް-19 އާ ގުޅިގެން އިންޑިޔާގެ ބެންގަލޫރާއި, ކޮޗިންގައި ރާއްޖެއަށް ނާދެވިފައި ތިބި 159 ދިވެހިން ރާއްޖެ ގެނެސްފިއެވެ.

މޯލްޑިވިއަންގެ ޕީއާރް އެންޑް ކޮމިއުނިކޭޝަންސް މެނޭޖަރ މޫސާ ވަސީމް "ރާއްޖެ އެމްވީ" އަށް މަޢުލޫމާތު ދެއްވަމުން ވިދާޅުވީ މިމީހުން ގޮވައިގެން އައި ފްލައިޓް ޖައްސާފައިވަނީ އަންގާރަ ދުވަހުގެ މެންދުރު އެކެއް ޖެހިއިރުކަމަށެވެ. އިންޑިޔާގެ ބެންގަލޫރާއި، ކޮޗިން އިން މާލެއަށް ގެނައި މީހުންނަކީ އާސަންދަ މެދުވެރިކޮށް ބޭސްފަރުވާއަށް ގޮސްތިބި ދިވެހިންނެވެ.

ހޯމަ ދުވަހުގެރޭ ނޭޝަނަލް އެމެޖެންސީ ސެންޓަރ (އެންއީއޯސީ) ގައިި ބޭއްވީ ނޫސްވެރިންގެ ބައްދަލުވުމުގައި ކޮވިޑް-19 ޓާސްކް ފޯހުގެ ތަރުޖަމާނު މަބްރޫކް އަޒީޒް ވިދާޅުވީ، ބަންގްލަދޭޝްގައި ތިބި ދިވެހިންގެ ރާއްޖެ ގެނައުމުގެ މަޝްވަރާތަކެއް ކުރިޔަށްދާ ކަމަށެވެ. ނަމަވެސް ކަނޑައެޅިގެން ސީދާ ދުވަހެއް ދަންނަވަން ދަތިކަމަށް މަބްރޫކް ވިދާޅުވިއެވެ.

ކޮވިޑް-19 ގެ ބިރާ ހެދި ރާއްޖެއަށް އަންނަ ހުރިހާ އެންމެން ކަރަންޓީނު ކުރަމުންދާއިރު، މަބްރޫކް ވިދާޅުވި ގޮތުގައި، ބޭރުގައި ތިބި ދިވެހިން ގެނެވޭނީ ކަރަންޓީނު ފެސިލިޓީގައި ޖާގަހުރި މިންވަރުންކަމަށެވެ. މިހާތަނަށް އާއިރު ސްރީލަންކާ، މެލޭޝިޔާ އަދި އިންޑިޔާގެ ބެންގަލޫރާއި ކޮޗިން އަދި ޓްރިވެންޑްރަމްގައި ތިބި ދިވެހިން ވަނީ ރާއްޖެ ގެނެސްފަ އެވެ.