ކޮވިޑް-19 ރާއްޖޭގައި ފެތުރުނަ ނުދިނުމަށް ރާއްޖޭގައި އަޅާފައިވާ ރައްކާތެރިކަމުގެ ފިޔަވަޅުތަކާއެކުވެސް، ރައްޔިތުންގެ މަޖިލީހުގެ މަސައްކަތްތައް ކުރިއަށް ގެންދަންޖެހޭ ކަމަށާއި، އަޅާފައިވާ ފިޔަވަޅުތަކަކީ، މަޖިލީހުގެ މަސައްކަތްތައް މަޑު ޖައްސާލައިގެން ތިބުމުގެ އުޒުރެއް ނޫންކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖޭގައި ފެތުރުނަށް ނުދިނުމަށް ޢާންމު ޞިއްޙަތުގެ ކުއްލި ނުރައްކަލުގެ ޙާލަތު އިޢުލާނުކޮށް، ސަރުކާރާއި ސްކޫލްތައް ބަންދުކޮށްފައެވެ. އަދި ޢާންމު އެއްވެ ނޫޅުމަށް ނޭޝަނަލް އިމަޖެންސީ އޮޕަރޭޝަން ސެންޓަރުން ކޮށްފައިވާ އިލްތިމާސާ އެއްގޮތަށް ރައްޔިތުންގެ މަޖިލީހުން ވެސް ވަނީ ވީޑިއޯ ކޮންފަރެންސް މެދުވެރިކޮށް، މަޖިލީހުގެ ޖަލްސާތައް ކުރިއަށް ގެންގޮސްފައިވެއެެވެ.

އަންގާރަ ދުވަހު، މަޖިލީހުގެ ހުރިހާ ކޮމެޓީތަކެއްގެ މުޤައްރިރުންނާއެކު ބޭއްވި ބައްދަލުވުމުގައި ރައީސް ނަޝީދު ވިދާޅުވީ، ކޮވިޑް-19 ޙާލަތު ނިމުމަކަށް އަންނާނެ ވަކިދުވަހެއް ބުނަން ނޭނގޭ ކަމަށެވެ. ނަމަވެސް ރައީސް ނަޝީދު ވިދާޅުވީ، ޞިއްޙަތާބެހޭ ބައެއް މާހިރުން ވިދާޅުވާ ގޮތުގައި ކޮވިޑް-19 ރޯގާ މަދުވެގެން 210 ދުވަހަށް ދެމިގެންދާނެ ކަމަށެވެ.

އެހެންކަމުން، ރައްޔިތުންގެ މަޖިލީހުގެ އިދާރާގައި ރަސްމީ ޖަލްސާތައް ނުބޭއްވި، ކޮމެޓީތަކުގެ މަސައްކަތްތައް ކުރިއަށް ނުގެންގޮސް ތިއްބެވުމަކީ ކުރެވޭނެ ކަމެއް ނޫން ކަމަށް ރައީސް ނަޝީދު ވިދާޅުވި އެވެ.

ކޮމެޓީތަކުގެ މުޤައްރިރުންނާއެކު ބޭއްވި ބައްދަލުވުމުގައި، ރައީސް ނަޝީދު ވިދާޅުވީ، މަޖިލީހުން އަވަހަށް ނިންމަން ޖެހޭ ކަންތައްތަކެއް އެބަހުރި ކަމަށެވެ. އެގޮތުން ލޯކަލް ކައުންސިލްތަކުގެ އިންތިޚާބު ލަސްކުރުމާ ގުޅޭ ގޮތުން މަޖިލީހުން ގޮތެއް ނިންމުން ވެސް ހިމެނޭކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ، ކޮވިޑް-19 ފެތުރޭތީ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކަނޑައަޅާފައިވާ ގައިޑްލައިންތަކާ އެއްގޮތަށް އިޖުތިމާޢީ ގައިދުރުގައި ތިބެގެން ވެސް މަޖިލިސް ކުރިއަށް ގެންދެވިދާނެ ކަމަށެވެ.

މިބައްދަލުވުމުގައި، މަޖިލީހުގެ ޖަލްސާތަކާއި ކޮމެޓީތަކުގެ މަސައްކަތްތައް މަޖިލީހުގެ އިދާރާގައި ބޭއްވުމާމެދު ގިނަ މެންބަރުން ތާޢީދު ކުރެއްވިއެވެ.

ރައީސް ނަޝީދު ވިދާޅުވީ، މަޖިލީހުގެ ޤަވާއިދުގައި، މަޖިލީހަކީ ގޮނޑިތަކެއްގެ މައްޗަށް، އަދި ހާޒިރީއަށް ބަލައިގެން، ވޯޓަށް އަހައިގެން ކަންކަން ނިންމަންޖެހޭ ތަނަކަށްވާއިރު، އެކަން އެންމެ ރަނގަޅަށް ކުރެވެން އޮތީ، މަޖިލީހުގެ އިދާރާގައި ޖަލްސާތައް ބާއްވައިގެން ކަމަށެވެ.