މިއޮތް ހާލަތުގައި ރާއްޖޭގެ ރައްޔިތުން ބަނޑަށް ޖެހޭނެ ހާލަތަކަށް ދާނެކަމަށް ގަބޫލުނުކުރައްވާކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.

ކޮވިޑް-19 އާއި ގުޅޭ އެންމެ ފަހުގެ މައުލޫމާތު ދިނުމަށް ދަރުބާރުގޭގައި ގާއިމްކޮށްފައިވާ ނޭޝަނަލް އެމެޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރ ފައްޔާޒް ވިދާޅުވީ، ސަރުކާރުން ދަނޑުވެރިކަމުގެ އުފެއްދުންތެރިކަން އިތުރުކޮށް އިގްތިސާދު ކުރިއެރުވުމަށްޓަކައި ގިނަ މަަސައްކަތްތަކެއް ކުރަމުންދާކަމަށާއި އެގޮތުން، ދަނޑުވެރިކަމަށް ހާއްސަ އަހަމިއްޔަތުކަމެއް ދީގެން ކުރަމުންގެންދާ މަސައްކަތުން އެ ލަނޑުދަނޑި ހާސިލްވާނެކަމަށެވެ. މިނިސްޓަރ ވިދާޅުވީ، ރާއްޖޭގެ ރައްޔިތުން ބަނޑަށް ޖެހޭނެ ހާލަތަކަށް ގޮސްދާނެކަމަށް އަދި ގަބޫލު ނުކުރައްވާކަމަށާއި ނަަމަވެސް ދުނިޔެ ބަނޑަށް ޖެހިއްޖެ ހާލަތުގައި ރާއްޖެއަށްވެސް އެކަމުގެ އަސަރުކުރާނެކަމަށެވެ.

އިތުރަށް ވާހަކަ ދައްކަވަމުން މިނިސްޓަރ ފައްޔާޒް ވިދާޅުވީ، ރާއްޖޭގެ އިގްތިސާދަށް ހީނަރުކަމެއް އަޔަސް ދަނޑުވެރިކަން ކުރާ ފަރާތްތަކުން އެ މަސައްކަތް ކުރާނެކަމަށެވެ. މިނިސްޓަރ ވިދާޅުވީ، އިގްތިސާދީ ހީނަރުކަމުގައިވެސް ގައުމީ އުފެއްދުންތެރިކަން އިތުރުކުރުމަށް ކުރާ މަސައްކަތަށް ބުރޫ ނާރާ އެ މަސައްކަތް ކުރިޔަށް ދާނެކަމަށެވެ. އިގްތިސޯދު ހަލާކުވެގެން ކާނެ ބޯނެގޮތެއް ނެތިއްޖިޔާ ދައުލަތުން ރައްޔިތުންނަށް އިތުރު އިންތިޒާމްތައް ހަމަޖައްސައިދެއްވާނެކަމަށެވެ.

ނޫސްވެރިންގެ ބައްދަލުވުމުގައި އިތުރަށް ވާހަކަދައްކަވަމުން މިނިސްޓަރ ވިދާޅުވީ އާންމުކޮށް ދިރިއުޅޭ ވައްޓަފާޅިއަށް ނަޒަރުހިންގާއިރު، އާންމުކޮށް ބޭނުންކުރާ ކާބޯތަކެތި ރައްޔިތުންނަށް މި ދަނޑިވަޅުގައިވެސް ކުރިޔަށް އޮތް އަހަރަށް ވާވަރަށް ސަޕްލައި ކުރާނެކަމަށާއި ރައްޔިތުން ބަނޑަށް ނުޖެހޭނެކަމަށެވެ. އަދި މި ދަނޑިވަޅުގައި ކުރާ މަސައްކަތަކީ އަޅައިނުލެވި އޮތް ސިނާއަތް ކުރިއަރުވައި ރައްޔިތުންނަށް މަންފާ ލިބޭނެ އިންތިޒާމް ހަމަޖެއްސުންކަމަށްވެސް މިނިސްޓަރ ފާހަގަކުރެއްވިއެވެ.