ދައުލަތާއި ޢާންމު ފަރުދުން ކޮވިޑް-19 އާ ގުޅިގެން ޢަމަލު ކުރަންޖެހޭގޮތުގެ ގައިޑްލައިނެއް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރުސީއެމް) އިން އެކުލަވާލައިފިއެވެ.
އެޗްއާރުސީއެމުން ބުނީ އިޤްތިޞާދީގޮތުންނާއި، އިޖްތިމާޢީގޮތުން ޤައުމަށް ކުރިމަތިވެފައިވާ ނާޒުކު ޙާލަތުގައި އެކަކު އަނެކެއްގެ އިންސާނީ ޙައްޤުތައް ރައްކާތެރިކޮށް، އެ ޙައްޤުތަކަށް ޙުރުމަތްތެރިކޮށް ހިތުމާއެކު އިޖްތިމާޢީ ގޮތުންނާއި، އިޤްތިޞާދީގޮތުން އަދި މަދަނީ ގޮތުންނާއި ސިޔާސީގޮތުން ރައްޔިތުންނަށް ލިބިގެންވާ ޙައްޤުތައް ޞިއްޙީ ކުއްލި ނުރައްކަލުގެ ޙާލަތުގައި ހިފެހެއްޓޭނެކަމަށް އިޢުލާނުކުރެވިފައިވާހިނދު މިފަދަ ޙާލަތްތަކުގައި ރައްޔިތުންނަށް ލިބިގެންވާ ޙައްޤުތައް ހަނިކުރުމުގައި މިނިވަން ދިމިޤްރާތީ މުޖުތަމަޢުތަކުގައި ޙައްޤުތައް ހަނިކުރެވޭ މިންވަރަށް ރިޢާޔަތްކުރަންވާނެކަމަށެވެ. އެގޮތުން އެ ގައިޑްލައިންގައި ވަނީ އެކި ޙާލަތްތަކުގައި ފިޔަވަޅުތައް އަޅަންޖެހޭނެގޮތްތައް ބަޔާންކޮށްފައެވެ.
އެ ގައިޑްލަިއންގައިވާގޮތުން ޞިއްޙީ ކުއްލި ނުރައްކަލުގެ ޙާލަތުގައި ރައްޔިތުންނަށް ލިބިދޭ ބައެއް އިންސާނީ ޙައްޤުތައް ހަނިކުރުމުގެ ބާރު ސަރުކާރަށް ލިބިގެންވީނަމަވެސް، ކޮވިޑް-19 އާ ގުޅިގެން އަޅާ ފިޔަޅުތައް އަޅަންވާނީ ކުރިމަތިވެފައިވާ ޙާލަތަށް ރިޢާޔަތްކޮށް، އެކަށީގެންވާ މިންވަރަށެވެ. އަދި މި ފިޔަވަޅުތައް އެޅުމުގައި ޚާއްޞަ ރައްކާތެރިކަން ފޯރުކޮށްދޭންޖެހޭ ފަރާތްތަކަށް ދެވޭ ޚާއްޞަ ލުއިތަކުގެ އިތުރުން އިތުރު އެއްވެސް ތަފާތުކުރުމެއް ގެންގުޅެގެންނުވާނެކަމަށް ބުނެފައިވެއެވެ. އެގޮތުން، ޢާންމު ދިރިއުޅުމަށް ވީހާވެސް ބުރޫނާރާނެފަދަ ގޮތަކަށް ފިޔަވަޅުތައް އެޅުން މުހިންމުކަމަށާއި، މިފަދަ ޙައްޞާސީ ދަނޑިވަޅެއްގައި ސަރުކާރުގެ ފަރާތުން އަޅާ ފިޔަވަޅުތަކަކީ ހުރިހާ ރައްޔިތުންގެ ސަލާމަތާ ރައްކާތެރިކަމަށް އަޅާ ފިޔަވަޅުތަކަކަށްވާތީ މި ފިޔަވަޅުތަކަށް ރައްޔިތުން ފުރިހަމައަށް ކިޔަމަންވެ ބޯލަނބަންވާނެކަމަށް ބުނެފައިވެއެވެ.
އޭގެއިތުރުން މި ދަނޑިވަޅުގައި އެއްވެސް ތަފާތުކުރުމެއްނެތި ފަސޭހައިން ރައްޔިތުންނަށް ޚިދުމަތް ފޯރުކޮށްދެވޭނޭހެން ޞިއްޙީ ޚިދުމަތުގެ ނިޒާމު ބައްޓަންކުރެވިފައި އޮންނަންވާނެކަމަށް ގައިޑްލައިންގައި ބުނެފައިވެއެވެ. އެގޮތުން، ބަލިވުމުން ބޭސް ކުރެވޭނެ އިންތިޒާމާއި އެކިއެކި ޚާއްޞަ ތެރަޕީތަކާއި ކައުންސެލިންގެ ޚިދުމަތް މެދުނުކެނޑި ކުރިއަށް ގެންދިއުމުގެ އިތުރުން ޚާއްޞަ ރައްކާތެރިކަން ބޭނުންވާ ފަރާތްތަކަށް ޚާއްޞަ ސަމާލުކަމެއްދީ ޚިދުމަތުގެ ނިޒާމު ބައްޓަންކުރެވިފައި އޮންނަންވާނެކަމަށް ބުނެފައިވެއެވެ. ހަމައެއާއެކު، މިޙާލަތުގައި މުޖުތަމަޢު، އެމީހަކާމެދު ދެކޭ ނަޒަރިއްޔާތުގެ ސަބަބުން ނުވަތަ ކުރިމަތިވެފައިވާ މާލީ ޙާލަތުގެ ސަބަބުން އެއްވެސް ފަރުދަކަށް ފަރުވާ ދިނުމުގައި ތަފާތުކޮށްގެންނުވާނެކަމަށްވެސް ގައިޑްލައިންގައި ބުނެފައިވެއެވެ.
އޭގެއިތުރުން ޞިއްޙީ ޚިދުމަތުގެ ނިޒާމުގެތެރޭގައި އެމީހަކަށް ބޭނުންވާ ޚިދުމަތް ފޯރުކޮށްދިނުމުގައާއި އަދި މި ޚިދުމަތްތައް ވަކިވަކި ފަރުދުން ލިބިގަތުމުގައި އެއްވެސް މީހެއްގެ އިންސާނީ ޙައްޤަކަށް ބުރޫއަރާފަދަ ޢަމަލެއް ހިންގައިގެން ނުވާނެކަމަށް ގައިޑްލައިންގެ ބުނެފައިވެއެވެ. އަދި މިޙާލަތުގައި ރައްޔިތުންނަށް ޚިދުމަތްދިނުމުގައި ބައިވެރިވާ ފަރާތްތަކަށް ޚާއްޞަކޮށް ޞިއްޙީ ޚިދުމަތްތެރިންގެ ޙާލަތު ވަޒަންކޮށް މަސައްކަތުގެ ތެރެއިން އެ ފަރާތްތަކަށް ކުރިމަތިވާ ގޮންޖެހުންތަކަށް ޚާއްޞަ ސަމާލުކަމެއް ދޭންވާނެކަމަށްވެސް ބުނެފައިވެއެވެ.
ގައިޑްލައިންގައިވާގޮތުން މިނިވަންކަން ގެއްލޭގޮތަށް ދައުލަތުގެ ބެލުމުގެ ދަށުގައި ބަންދުކޮށްފައިވާ ފަރާތްތަކަކީ މިފަދަ ޞިއްޙީ ވަބާއެއް ފެތުރެމުންދާ ދަނޑިވަޅުގައި ބަލި ޖެހުމުގެ ނުރައްކާ ބޮޑު ފަރާތްތަކަކަށްވާހިނދު މި ފަރާތްތަކުގެ މެދުގައި އިޖުތިމާޢީ ގައިދުރުކަން ދެމެހެއްޓުމަކީ އުނދަގޫކަމެކެވެ. އެހެންކަމުން ޞިއްޙީ ކުއްލި ނުރައްކަލުގެ ޙާލަތުގައި މި ފަރާތްތަކާމެދު ޢަމަލުކުރުމަށް ޚާއްޞަ އުޞޫލުތަކެއް އެކުލަވާލައި އެއާ އެއްގޮތަށް ޢަމަލުކުރަންވާނެކަމަށް ބުނެފައިވެއެވެ. ޞިއްޙީ ކުއްލި ނުރައްކަލުގެ ޙާލަތުގައި، ދައުލަތުގެ ފަރާތުން މި ފަދަ ފަރާތްތަކަށް އެކަށީގެންވާ މަޢުލޫމާތު ޙިއްސާކޮށް ރައްކާތެރިކަމުގެ އާލަތްތަކާއި އެހެނިހެން ޒަރޫރީ ޞިއްޙީ ފަރުވާ ފޯރުކޮށްދޭންވާނެކަމަށްވެސް ބުނެފައިވެއެވެ.
އޭގެއިތުރުން މުވައްޒަފުންނަށް މުސާރަ ލިބޭގޮތަށް ޚާއްޞަ ޗުއްޓީ ހަމަޖައްސައިދިނުމާއި އަދި ވަޒީފާއަށް ނުނިކުމެ ތިބޭ ދުވަސްތަކުގައިވެސް ޚާއްޞަ ޢިނާޔަތެއް ދިނުންފަދަ މާލީގޮތުން ޢާއްމު ރައްޔިތުންނަށް ފަހިކޮށްދެވެންހުރި ކަންކަން ފަހިކޮށްދޭންވާނެކަމަށް ގައިޑްލައިންގައި ބުނެފައިވެއެވެ. އަދި މުސާރަ ހިފެހެއްޓުމާ މުސާރަ ކުޑަކުރުމާއި އަދި ވަޒީފާ ގެއްލުމުގެ ބިރު ކުރިމަތިކުރުވުން ހުއްޓުވައި، މާލީ ގޮތުން މުވައްޒަފުންނަށް ދަތިނުވާނޭ ގޮތަކަށް ކަންކަން ބައްޓަންކުރުމަށް ސަރުކާރުން ބާރުއަޅަންވާނޭކަމަށްވެސް ބުނެފައިވެއެވެ.
އެޗްއާރުސީއެމުން އާންމުކޮށްފައިވާ ގައިޑްލައިންގައި އިތުރަށް ބުނެފައިވާގޮތުގައި ކޮވިޑް-19 ގެ ރައްކާތެރިކަމުގެ ފިޔަވަޅެއްގެގޮތުން ރައްޔިތުން ގޭގައި ތިބުމަށް ސަރުކާރުގެ ފަރާތުން ބާރުއަޅާ މިފަދަ ދަނޑިވަޅެއްގައި އެ ގެއެއްގައި ދިރިއުޅޭ ހުރިހާ ފަރުދުން ގޭތެރޭގައި ގިނަވަގުތު އެކުގައި ހޭދަކުރަންޖެހުމަކީ އިޖުތިމާޢީ ތަފާތު މައްސަލަތައް ކުރިމަތިވެދާނެ ކަމެއްކަމުގައިވާތީއާއި އަދި އެފަދަ އެއްވެސް މައްސަލައެއް ކުރިމަތިވާނަމަ ފަސްޖެހުމެއްނެތި ކަމާގުޅުން ހުރި އިދާރާތަކަށް އެފަދަ ކަންކަން ހުށަހެޅުމަށާއި އަދި ގުޅުން ހުރި އިދާރާތަކުން އެފަދަ މައްސަލަތައް އަވަސްމިނެއްގައި ބެލުމަށް އިސްކަންދޭންވާނެކަމަށެވެ.
