ރާއްޖޭގެ ކޮމިއުނިކޭޝަން ދާއިރާ ހަރުދަނާ ކޮށް އިންޓަރނެޓްގެ ހިދުމަތް ލިބުމުގައި ލުއި ފަސޭހަ ތަކެއް ލިބިގެންދާނީ އެއީ އަސާސީ ހިދުމަތަކަށް ހަދައިގެން ކަމަށް ކޮމިއުނިކޭޝަން މިނިސްޓަރު މަލީހު ޖަމާލް ވިދާޅުވެއްޖެ އެވެ.
ރާއްޖެޓީވީގެ ފަލަ ސުރުހީ ޕްރޮގްރާމުގައި ވާހަކަ ދައްކަވަމުން މިނިސްޓަރު މަލީހު ވިދާޅުވީ މި ދާއިރާ ރެގިއުލޭޓް ކުރުމަށްޓަކައި ވަރަށް ބޮޑު ބަދަލުތަކެއް އަންނަން ޖެހޭ ކަމަށެވެ. އަދި ރައްޔިތުންގެ މަޖިލީހުގެ ގިނަ މެންބަރުން ތަކެއް ބޭނުންވާ ކަމުގައިވާނަމަ އިންޓަރނެޓަކީ އަސާސީ ހިދުމަތެއް ކަމަށް ކަނޑައަޅުއްވައިދެއްވިދާނެ ކަމަށެވެ.
އިންޓަރނެޓަކީ އަސާސީ ހިދުމަތަކަށް ވެއްޖެއްޔާ އެއާއެކު ރައްޔިތުންނަށް ލިބިގެންދާނެ ވަރަށް ގިނަ ފަސޭހަތަކެއް ހުންނާނެ ކަމަށް މިނިސްޓަރު ވިދާޅުވި އެވެ.
އެންމެފަހުން ރައްޔިތުންގެ މަޖިލީހުގެ ކޮމިޓީއެއްގައި އަޅުގަނޑު ވާނެ ފާހަގަކޮށްފައި އިންޓަރނެޓަކީ އަސާސީ ހިދުމަތެކޭ. އެކަން އަޅުގަނޑުމެން ކަނޑައަޅަން އެބަޖެހޭ. ދެން އެކަން ބެލުމުގައި ރައްޔިތުންގެ މަޖިލީހުންވެސް ވަރަށް ގިނަ ކަންކަން ހުންނާނެ ބަލަންޖެހޭ. އެ މިސްރާބަށް ދިޔާމަ ރަނގަޅުވާނެ ކަމަށް ގަބޫލުކުރަނީކޮމިއުނިކޭޝަން މިނިސްޓަރު މަލީހު ޖަމާލް
މިނިސްޓަރު ވިދާޅުވީ ސަރުކާރުގެ ވިސްނުން ހުރީ މި ދާއިރާއަށް ރަނގަޅު ބަދަލުތަކެއް އަންނަކަމުގައި ވާނަމަ އެކަމަށް މަރުހަބާ ކިޔުން ކަމުގައި ކަމަށެވެ. އަދި އޭގެ ތެރޭގައި އިތުރު ސަރވިސް ދޭ ފަރާތްތަކަށް ލައިސަންސް ދިނުމަށް ނިންމާފައި ނުވި ނަމަވެސް، ލައިސަންސް ނުދޭން ސަރުކާރުގެ ވިސްނުމެއް ނެތް ކަމަށެވެ.
އެގޮތުން މި ދާއިރާ އިތުރަށް ހަރުދަނާ ކުރުމަށްޓަކައި އަދި ރާއްޖޭގައި ދޭ މުއާސަލާތީ ހިދުމަތް އިތުރަށް ފުރިހަމަ ކުރުމަށްޓަކައި އިތުރު ކުންފުންޏަކުން ރަނގަޅު ޕްރޮޕޯސަލްއެއް އައިކަމުގައިވާނަމަ އެކަމަށް އަޅުގަނޑުމެން އިޖަބަދޭނެކަން ކުރިން ވެސް ފާހަގަ ކުރައްވާފައިވާނެ ކަމަށް މަލީހު ވިދާޅުވި އެވެ.
އިންޓަރނެޓް އަގުހެޔޮކުރަން ސަރުކާރުން ނިންމާފައިވަނީ އަންނަ އަހަރުގެ ތެރޭގަ އެވެ. އިންޓަރނެޓް އަގު ހެޔޮ ނުކުރާ މައްސަލައިގައި ސަރުކާރަށާއި، މަލީހުގެ އިތުރުން ރާއްޖޭގައި މުއާސަލާތީ ހިދުމަތްދޭ ދެ ކުންފުނިތަކަށް ގިނަ ބަޔަކު އަންނަނީ ފާޑުކިޔަމުންނެވެ. އިންޓަރނެޓްގެ އަގު ހެޔޮ ކުރުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ.
