ކޮވިޑް-19 އަށް ވެކްސިންއެއް އުފެއްދެންދެން "ވައިރަސްއާއެކު" ދިރިއުޅެން ދަސްކުރަންޖެހޭ ކަމަށާއި، އެގޮތުން ކަމާބެހޭ ފަރާތްތަކުން އަޅަމުންދާ ފިޔަވަޅުތަކަށް ހޭނެންޖެހޭކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.

ބުރާސްފަތި ދުވަހު "ރާއްޖެއެމްވީ" އަށް ދެއްވި ޚާއްސަ އިންޓަރވިއުއެއްގައި ޑިޒާސްޓަރ މެނޭޖްމަންޓް އޮތޯރިޓީގެ ޑެޕިއުޓީ ޗީފް އެގްޒެކެޓިވް އުމަރު މޫސާ ފިކުރީ ވިދާޅުވީ، ކޮވިޑް-19 އަކީ މުޅި ދުނިޔެއަށްވެސް ކުރިމަތިވެފައިވާ ޙާލަތަކަށްވާއިރު، ވައިރަސްއާ ގުޅިގެން އެކި ޤައުމުތަކުންވެސް ފިޔަވަޅުތައް އަޅަމުންދާ ކަމަށެވެ.

އެގޮތުން ރާއްޖޭގައިވެސް ކޮވިޑް-19 އާއި ގުޅިގެން އެކި ފިޔަވަޅުތައް އަޅަމުންދާއިރު، އެކަންކަމަށް ބޯލެނބުމަށް އޭނާ ވަނީ އިލްތިމާސްކުރައްވާފަ އެވެ.

އުމަރު ވިދާޅުވީ، އެންޑީއެމްއޭއާ ޙަވާލުވެވަޑައިގެން ހުންނެވި ޑިފެންސް މިނިސްޓަރ މާރިޔާ އަހުމަދު ދީދީގެ އިރުޝާދުގެ ދަށުން، ކޮވިޑް-19 އިން ރައްކާތެރިވުމަށް ކުރެވޭ މަސައްކަތުގައި ސަރުކާރާ ގުޅިގެން މަސައްކަތްތަކެއް ކުރަމުންދާ ކަމަށެވެ.

އެގޮތުން ނޭޝަނަލް އެމަރޖެންސީ އޮޕަރޭޝަންސް ސެންޓަރ (އެންއީއޯސީ) އުފެދުނު ހިސާބުން އިތުރު 46 މުއައްސަސާއަކާ ގުޅިގެން އެންޑީއެމްއޭއިން ވެސް މަސައްކަތް ކުރަމުންދާ ކަމަށާއި، ހުޅުމާލެއާއި ފަރުކޮޅުފުށީގައި ޤާއިމު ކުރާ މެޑިކަލް ފެސިލިޓީތަކުގެ އިތުރުން، އައިސޮލޭޝަން ފެސިލިޓީތަކުގެ މަސައްކަތް ވެސް ގުޅުންހުރި އިދާރާތަކާއި ގުޅިގެން ކުރަމުންދާ ކަމަށް އުމަރު ވިދާޅުވި އެވެ.