ދުނިޔޭގެ ސިއްހަތު ޖަމިއްޔާ ޑަބްލިޔުއެޗްއޯއިން އިތުރު 5،000 ޓެސްޓްކިޓް ދިވެހިރާއްޖެއަށް ހަދިޔާ ކޮށްފި އެވެ.

ކޮވިޑް-19 އަށް ޓެސްޓްކުރާ އިތުރު 5،000 ޓެސްޓްކިޓް ޑަބްލިޔުއެޗްއޯއިން ހޯމަ ދުވަހު ރާއްޖެއަށް ހަދިޔާކުރިއިރު، މީގެކުރިން ދެ ފަހަރެއްގެ މަތިން 6،000 ޓެސްޓްކިޓް ވަނީ ރާއްޖެއަށް ހަދިޔާ ކޮށްފަ އެވެ. އެހެންކަމުން ޑަބްލިޔުއެޗްއޯއިން ރާއްޖެއަށް ޖުމްލަ 11،000 ޓެސްޓްކިޓް މިވަނީ ހަދިޔާ ކޮށްފަ އެވެ.

މި ޓެސްޓްކިޓްތައް ހަވާލުކުރުމުގެ ލިޔުމުގައި ސޮއިކުރުމުގެ ރަސްމިއްޔާތު ހޯމަ ދުވަހު ހެނދުނު ދަރުބާރުގޭގައި ހުންނަ ނޭޝަނަލް އެމަޖެންސީ އޮޕަރޭޝަން ސެންޓަރުގައި ބޭއްވާފައިވާއިރު، މިލިޔުމުގައި ރާއްޖޭގެ ފަރާތުން ސޮއި ކުރެއްވީ ހެލްތް މިނިސްޓަރ އަބްދުﷲ އަމީން އެވެ. ޑަބްލިޔުއެޗްއޯގެ ފަރާތުން ސޮއި ކުރެއްވީ ޑަބްލިޔުއެޗްއޯއިން ރާއްޖެއަށް ކަނޑައަޅާފައި ހުންނަވާ މަންދޫބު ޑރ. އަރަވިންދު މާތުރު އެވެ. މިރަސްމިއްޔާތުގައި އައިޖީއެމްއެޗްގެ ސީއީއޯ އިބްރާހީމް ސަލީމް ވެސް ބައިވެރިވެވަޑައިގެންނެވި އެވެ.

މިރަސްމިޔައްޔާތުގައި ހެލްތް މިނިސްޓަރ އަމީން ވިދާޅުވީ، ރާއްޖޭގައި ކޮވިޑް-19 ނުރައްކާތެރިކަން ވަކި ކުޑަ ނޫންކަމަށާއި މިކަމަށް އެންމެންވެސް ފަރުވާތެރިވެގެން، ސަރުކާރާ ކަމާބެހޭ ފަރާތްތަކުން އަންގާ އެންގުންތަކަށް ކިޔަމަންތެރިކަން އަދާކޮށް، އިޖުތިމާއީ ގައިދުރުކަމާއި ގޭގައި ތިބުން މުހިއްމު ކަމަށެވެ. އަދި ރާއްޖޭގައި ކޮވިޑް-19 ފެތުރުން ކޮންޓްރޯލުކުރުމަށްޓަކައި ވަރަށް ހަރުދަނާ ފިޔަވަޅުތަކެއް އަޅަމުންދާ ކަމަށް މިނިސްޓަރު ވިދާޅުވި އެވެ.

އަމީން ވިދާޅުވީ މިހާތަނަށް ރާއްޖެއިން ވަނީ 1،500 އަށްވުރެ ގިނަ މީހުން ކޮވިޑް-19 އަށް ޓެސްޓުކޮށްފައި ކަމަށެވެ.

އައިޖީއެމްއެޗްގެ ސީއީއޯ ސަލީމް ވިދާޅުވީ އައިޖީއެމްއެޗުން ކޮވިޑް-19 އަށް ޓެސްޓްކުރުމުގެ ހިދްމަތް 24 ގަޑިއިރަށް މިހާރު ބަދަލުކޮށްފައިވާ ކަމަށެވެ. އެގޮތުން، އައިޖީއެމްއެޗުގައި ޓެސްޓު ހެދުމަށްޓަކައި ލެބޯޓަރީ ޓީމުން 24 ގަޑިއިރު ހުއްޓުމެއް ނެތި މަސައްކަތްކޮށް މިހާރު ދުވާލެއްގެ މައްޗަށް 200 ޓެސްޓު ހެދުމުގެ ގާބިލުކަން ހުރި ކަމަށް ސަލީމް ވިދާޅުވިއެވެ.

މީގެއިތުރުން ސަލީމް ވިދާޅުވީ، މިހާރު މަސައްކަތްކުރަމުން ދަނީ ޓެސްޓު ހެދުމަށް ބޭނުންވާ އިތުރު މެޝިނެއް ގެނެސް ޓެސްޓުކުރުމުގެ ގާބިލިއްޔަތު ދުވަހެއްގެ މައްޗަށް 300 އަށް އިތުރުކުރުން ކަމަށެވެ.