މިހާރު ދުނިޔޭގައި ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން މެދުކަނޑާލާފައިވާ ފުޓްބޯޅަ ލީގުތަކުގެ މެޗުތައް ޖުލައި މަހު ފެށުމަށް މަސައްކަތް ކުރަމުން އަންނަ ކަމަށް ރިޕޯޓުތައް ބުނެފި އެވެ.

ކޮވިޑް-19 ގެ ސަބަބުން ޔޫރަޕްގެ ގަދަ ފަސް ލީގުގެ ކުޅުން ވަނީ މެދުކަނޑާލާފައެވެ. އެއީ އިނގިރޭސި ޕްރިމިއާ ލީގާއި، ސްޕެނިޝް ލީގާއި، އިޓާލިއަން ލީގާއި، ޖަރުމަން ލީގުގެ އިތުރުން ފްރެންޗް ލީގެވެ. އަދި ޔުއެފާ އިން ވަނީ ޔުއެފާ ޗެމްޕިއަންސް ލީގާއި ޔުއެފާ ޔޫރޮޕާ ލީގުވެސް ފަސްކޮށްފައެވެ. އަދި ކުރިއަށް އޮތް ހޫނު މޫސުމަށް ތާވަލުކޮށްފައި އޮތް ޔޫރޯ ފުޓްބޯޅަ މުބާރާތާއި ކޮޕަ އެމެރިކާ ފުޓްބޯޅަ މުބާރާތް ވަނީ އަންނަ އަހަރަށް ފަސްކޮށްފައެވެ.

ޔޫރަޕްގެ ގަދަ ފަސް ލީގު މެދުކަނޑާލި ނަމަވެސް، ބެލަރޫސްގައި ލީގުގެ ކުޅުން ކުރިއަށްދެއެވެ. ބެލަރޫސިއަން ޕްރިމިއާ ލީގަކީ މިހާތު ޔޫރަޕްގައި ކުރިއަށްދާ ހަމައެކަނި ފުޓްބޯޅަ ލީގެވެ.

ރިޕޯޓުތައް ބުނާ ގޮތުން ޔުއެފާ އިން ވަނީ އެ އިދާރާގެ ލަފާ ނުހޯދައި އެއްވެސް ލީގެއް ކެންސަލް ނުކުރަން މެމްބަރު 55 ގައުމަށް އަންގާފައެވެ. އެކަމަކު ޔުއެފާގެ ބަހެއް ނުހޯދައި ބެލްޖިއަމް ޕްރޯ ލީގު ކެންސަލް ކުރަން ނިންމާފައިވާ ކަމަށް ރިޕޯޓުތައް ބުނެއެވެ.

ޔުއެފާއިން މެމްބަރު ގައުމުތަކަށް ފޮނުވި ސިޓީއެއްގައި ބުނެފައިވަނީ މިވަގުތު ހުރިހާ ގައުމަކުންވެސް ފުޓްބޯޅަ ސަލާމަތްކުރުމަށް އެކީ މަސައްކަތް ކުރަން ޖެހޭ ކަމަށާއި، އެހެންކަމުން މެދުކަނޑާލާފައިވާ ލީގުތައް ކެންސަލް ނުކުރަން އެދޭ ކަމަށެވެ. އަދި ޖޫން މަހުގެ ނިޔަލަށް އާންމުކޮށް ނިމޭ ފުޓްބޯޅަ ސީޒަން، މިއަހަރުގެ ޖުލައި މަހުން ފެށިގެން ނަމަވެސް ކުރިއަށް ގެންދެވޭތޯ މަސައްކަތް ކޮށްދިނުމަށް ވަނީ އެދިފައެވެ.

ކޮވިޑް-19 ގެ ސަބަބުން ދުނިޔޭގެ ފުޓްބޯޅަ ހުއްޓުމަކަށް އައިސްފައިވާއިރު، މެދުކަނޑާލާފައިވާ ޔޫރަޕްގެ ފުޓްބޯޅަ މުބާރާތްތަށް އަލުން ފަށަން ކަނޑައަޅާފައިވާ ޕްލޭނާ އެއްގޮތަށް ނުގޮސްފިނަމަ ފުޓްބޯޅަ ސީޒަން ގެއްލުމުގެ ބިރު އެބައޮތް ކަމަށް ޔުއެފާ ރައީސް ސްލޮވީނިއާގެ އަލެކްސަންޑަ ސެފެރިން ދާދި ފަހުން ވަނީ ވިދާޅުވެފައެވެ.