ޕީއެސްޖީއަށް ކުޅެމުން އަންނަ ބްރެޒިލްގެ ތަރި ނޭމާ ގަތުމަށް ބާސެލޯނާއިން އެންޓޮއިން ގްރީޒްމަން ދިނުމަށް ނިންމައިފައިވާ ކަމަށް ރިޕޯޓުތައް ބުނެފިއެވެ.
ނިމިދިޔަ ފިނި މޫސުމުގެ ޓްރާންސްފާ ބާޒުރުގައިވެސް ނޭމާ ގަތުމަށް ބާސެލޯނާއިން ވަނީ މަސައްކަތް ކޮށްފައެވެ. ނަމަވެސް ޕީއެސްޖީން އެކަން ވަނީ ހުއްޓުވައިފައެވެ. އަނެއްކޮޅުން ގްރީޒްމަން އަކީ މި ސީޒަނުގައި ބާސާއާއި ގުޅުނު ކުޅުންތެރިޔެކެވެ. ނަމަވެސް ބާސާ އާއި އެކު އޭނާއަށް އެންމެ އެކަށޭނެ ކުޅުމެއް ދެއްކިފައެއް ނުވެއެވެ.
ރިޕޯޓުތައް ބުނާގޮތުން ނޭމާ ގަތުމަށް 100 މިލިއަން ޔޫރޯ ހަރަދުކުރަން ބާސާއިން އޮތީ ތައްޔާރަށެވެ. ނަމަވެސް ޕީއެސްޖީން ނޭމާ ވިއްކާލާނެ އަގެއް ކަމުގައި ބެލެވެނީ 150 މިލިއަން ޔޫރޯއަށެވެ.
ބާސާއިން ނޭމާ ގަތުމަށް 100 މިލިއަން ޔޫރޯ ހަރަދުކުރުމަށް ތައްޔާރުވަމުން އަންނައިރު ބާސާގެ ކެޕްޓަން ލިއޮނަލް މެސީ ވަނީ ދުނިޔޭގައި މިހާރު ހަލުވިކަމާއިއެކު ފެތުރެމުން އަންނަ ކޮރޯނާވައިރަސްގެ ސަބަބުން ކްލަބަށް ލިބޭނެ މާލީ ގެއްލުން ތަކުން އަރައިގަތުމަށް ކުޅުންތެރިން އެ ކުޅުންތެރިންގެ މުސާރާއިން 70 އިންސައްތަ އުނިކުރަން ނިންމައިފައިވާކަން އިއުލާން ކޮށްފައެވެ.
ރިޕޯޓްތައް ބުނާ ގޮތުން ގްރީޒްމަން ގަބޫލުކުރާ ގޮތުގައި ބާސާއިން އޭނާ ދޫކޮށްލުމުގެ ވިސްނުމެއް ނުގެންގުޅެއެވެ. ސަބަބަކީ މި ސީޒަނުގައި އޭނާއަށް ދިމާވި އަނިޔާގެ މައްސަލަތަކާއި ހެދި ގިނަ މެޗުތަކުގައި އޭނާގެ ބޭނުން ނުހިފުން ކަމަށާ އަދި ކުރިޔަށް އޮތް މެޗުތަކުގައި އަނިޔާއިން ސަލާމަތްވެ ވަރުގަދަ ކޮށް ކުޅެވޭނެ ކަމުގެ ޔަގީންކަން އޮތުމެވެ.
