އިނގިރޭސިވިލާތުން އައި އިތުރު ދިވެއްސަކު ކޮވިޑް-19 އަށް ޕޮޒިޓިވްވެއްޖެއެވެ.

މިޔާއެކު، ކޮވިޑް-19 އަށް ޕޮޒިޓިވްވި ދިވެހިންގެ އަދަދު ވަނީ 4 އަށް އަރާފަ އެވެ. އަދި އެ ހަތަރު މީހުންނަކީވެސް އިނގިރޭސިވިލާތުން ދަތުރުކުރުމަށްފަހު، ރާއްޖެ އައި ދިވެހިން ކަމަށް ސަރުކާރުން ބުންޏެވެ.

މިކަން ހާމަކޮށް އެޗްޕީއޭއިން ކޮށްފައިވާ ޓުވީޓެއްގައި ބުނެފައިވަނީ، ވެލިދޫ އައިސޮލޭޝަން ފެސިލިޓީގައި އައިސޮލޭޓް ކޮށްފައިވާ ދިވެއްސެއްގެ ފަރާތުން ކޮވިޑް-19 ގެ އަލާމާތްތައް ފެނި، ސާމްޕަލް ނަގައި ހެދި ޓެސްޓުގެ ނަތީޖާ ޕޮޒިޓިވް ވެފައިވާކަމަށެވެ.

އަލަށް ޕޮޒިޓިވް ވި ކޭސްއާއިއެކު ރާއްޖެ އިން މިހާތަނަށް ކޮވިޑް -19 އަށް ޕޮޒިޓިވް ވެފައިވާ މީހުންގެ އަދަދު މިވަނީ 19 އަށް އަރާފައެވެ. އެއީ 15 ބިދެސީންނާއި 4 ދިވެހިންނެވެ. ރާއްޖެއިން ޕޮޒިޓިވްވި ސާމްޕަލްތަކުގެ ތެރޭގައި ރާއްޖެއިން ފުރުފާލާފައިވާ އިޓަލީވިލާތުގެ ދެ ރައްޔިތެއްގެ ސާމްޕަލް ހިމެނެއެވެ. އެހެންކަމުން މި ވަގުތު ރާއްޖޭގައި ފަރުވާ ހޯދަމުން އަންނަނީ ޕޮޒިޓިވްވީ ހަތަރު ދިވެހިންނެވެ.