އިޒްރޭލްގެ ބޮޑުވަޒީރު ބެންޖަމިން ނަތަންޔާހޫގެ އެޑްވައިސަރ ރިވްކާ ޕަލޫކް ވެސް ކޮވިޑް-19 އަށް ޕޮޒިޓިވްވެއްޖެއެވެ.
ހޯމަ ދުވަހު ނަތަންޔާހޫގެ އެޑްވައިސަރ ޓެސްޓުތައް ޕޮޒިޓިވްވެފައިވާއިރު، ޕަލޫކް ވަނީ ބުރާސްފަތި ދުވަހުވެސް ބޮޑުވަޒީރާ ބައްދަލު ކޮށްފައެވެ. އެގޮތުން މިހާރު ނަތަންޔާހޫ ގެންދަވަނީ ސެލްފް އައިސޮލޭޓް ވެވަޑައިގެން ކަރަންޓީންއަށް ތައްޔާރުވަމުންކަމަށް ރިޕޯޓްތައް ބުނެއެވެ.
ނަތަންޔާހޫގެ އެޑްވައިސަރ ރިވްކާ ޕަލޫކް ވައިރަސްއަށް ޓެސްޓުކޮށްފައިވަނީ އޭނާގެ ފިރިމީހާ ވައިރަސްއަށް ޕޮޒިޓިވްވެ އެޑްމިޓް ކުރުމާއި ގުޅިގެންނެވެ.
ނަތަންޔަހޫގެ އިތުރުން، އެޑްވައިސަރާއެކު ބައްދަލުކުރި މުވައްޒަފުން ވެސް މިހާރު ދަނީ ސެލްފް އައިސޮލޭޓް ކުރަމުންނެވެ. އެގޮތުން އެ ހުރިހާ ފަރާތްތަކެއް، 14 ދުވަހުގެ ކަރަންޓީން މުއްދަތު ފުރިހަމަކުރަން ޖެހޭނެއެވެ.
އިޒްރޭލުން ވައިރަސްއަށް ޕޮޒިޓިވްވި މީހުންގެ އަދަދު 4300 އަށްވުރެ އިތުރުވެފައިވާއިރު، އޭގެ ތެރެއިން 16 މީހަކު މަރުވެފައިވާކަމަށް ރިޕޯޓްކޮށްފައިވެއެވެ.
